Kudiheka Binwaninu kikuma kya Luzolu lwa Tata
Banduku ba thama bisi yituka tangwa wusisa kwenda yi bawu, amana Petelo wusi zimbula ni lusikila mawu. Wusi zimbula kwena batangi mu kukala ba mabanza ma mboti, ba kuyamba batu konda kunyengalakana, amana mu kusadila kabu dyosu bena dyawu. Phasi za mbawu zisiku dyambu dya kuyituka — pfundusu yisi yandika yi nzu ya Tata wetu mosi.
4 1Yihana ni, bwosu Kidisitu wányokuka mu lutu, benu phi kudihekenu binwaninu bya mabanza mamosi: wuna wisi nyokuka mu lutu wumanisini yi masumu. 2Yihana ni, lukalaku hika zinga mu tangwa dyenu dina disisidi mu lutu kikuma kya nzoluka za batu, kaasi kikuma kya luzolu lwa Tata wetu. 3Lutikisini tangwa dyafwana mu kuhanga luzolu lwa batu bana bakondi kuzaya Tata: mu kuzingila mu bizumba, tsambu, kuzela kwa malafu, kudya kwa pfita, kunwa malafu, yi kufukamina kwa nzambi za biteki kwa mbi. 4Bawu bisi yituka ni benu lukalaku hika kwenda yi bawu mu kizalu kimosi kya luzingu lwa mbi, yihana ni babati lutukwana kikuma kya mawu. 5Kaasi bawu bakavútula mvutu kwena wuna wubati yilama mu kusambisa bana benina moya yi bafwa. 6Kyakina kikuma básamuna Musamu wa Bukheti kwena bana bafwa buthwena: ndangu bamona pfundusu mu lutu bwosu batu boosu bisi sambisa, kaasi bazinga mu kitembu bwosu Tata wetu kenina.
7Tsuka ya bima byosu yenina bela-bela. Yihana ni, kalenu batu ba mabanza ma mboti yi ba kudilunda mboti-mboti hanga lulenda sambila. 8Hatheti ya bima byosu, kalenu lusi dizola benu yi benu mu lawu, mukuma lungongu lusi fidinga ndoluka ya masumu. 9Yambakenu benu yi benu konda kunyengalakana. 10Kosu mutu wa benu, sadila kabu dina dyatambudini mu kusadila bakwawu, hanga batu ba mboti bana báheka kiyekika kya khenda za mitindu myosu za Tata wetu. 11Wuna wisi zonza, kazonza hanga wuna wisi hana ndinga za Tata wetu meni. Wuna wisi sadila, kasadila mu ngolu zina kahana yandi, hanga mu bima byosu yandi kazatulwa mu nzila ya Yesu Kidisitu. Kwena yandi khembu yi ngolu mu mvula yi mvula. Abwabuna.
Kunyokuka mu Khumbu ya Tata
12Baphangi bama batondama, luyitukaku kikuma kya kimeka kya mbawu kina kisi luleya, hanga dyambu dimosi dya kuyituka disi bwila kwena benu. 13Kaasi, sangwalenu bwosu lusi bundakana mu kunyokuka kwa Kidisitu, hanga lusangwala phi mu kyesi tangwa khembu yandi yasongwana. 14Yuka ni balutukwana kikuma kya khumbu ya Kidisitu, kyesi kwena benu, mukuma Kitembu kya khembu yi kya Tata wetu kisi vwanda hana benu. 15Ka mutu ku wa benu kanyokuka hanga muhondi wa batu, ho mwifi, ho mutu wa mbi, ho wuna wisi kota mu mambu ma bakwawu. 16Kaasi yuka ni lwanyokuka hanga bakidisitu, lumónaku tsoni, kaasi luzatula Tata wetu kikuma lwenina yi khumbu yina. 17Mukuma tangwa dyenina dya pfundusu kuyandika mu nzu ya Tata wetu; yuka ni dyayandika kwena betu, biki bisi hingila bana bakondi kulemvuka Musamu wa Bukheti wa Tata wetu? 18Amana, «Yuka ni mutu wa masonga mu phasi kahuluka, biki kyakála kwena wukondi Nzambi yi musumuki?» 19Yihana ni, bana bisi nyokuka mu luzolu lwa Tata wetu, bahana moya myawu kwena Muhangi wawu wisi sila mbundu, mu kuhanga mamboti.
