Zitisa Kikanda Kina Kikuzyungidi
Dibundu difwana kutala hanga kanda dya Tata wetu: bakinunu ba bayakala hanga batata, amana masanda ma bakhetu hanga baphangi ba bakhetu. Buna mitsiku mya kisalu: bafwidi babi dibundu difwana kuba keba, amana babi bafwana sompana hika, luzitu yi lukebolo kwena bambuta, kukebisa ku meswa ma batu kikuma kya disumu dya kukwamina, amana vinu kikuma kya kundu kya Thimoti.
5 1Wukayaku kinunu kya yakala ni ndinga ya ngolu, kaasi mulomba hanga tata, amana masanda hanga baphangi, 2binunu bya bakhetu hanga bangudi, amana masanda ma bakhetu hanga baphangi ba bakhetu, muna kasemi kyosu.
3Zitisa bafwidi bana benina bafwidi ba kyedika. 4Kaasi yuka ni mufwidi kenina yi bana ho bana ba bana, bafweti theti longuka mu kusongila kinzambi kwena nzu ya bawu meni, amana mu kuvutula kwena bibuti bya bawu, mukuma bwabu bwisi musephidisa Tata wetu. 5Mufwidi wa kyedika, wuna wasala yandi mosi, wisi sila kivuvu kyandi mwena Tata wetu, amana wisi landikisa phipha yi muini mu bilomba yi mu kulomba. 6Kaasi mufwidi wuna wisi zinga mu tsambu za lutu, wufini ata buna kenina yi mu luzingu. 7Heka mituki mina phi, hanga bakala bakonda kifu. 8Yuka ni mutu kakonda tambika bima kwena batu ba bawu meni, kuluta babana benina muna nzu yandi, mutu yina wátuna lukwikilu, amana kenina mbi kuluta mutu wakonda kala mukwikidi.
9Sonika mufwidi kaka yuka ni kenina yi mimvu makumasambanu ho mihitini, amana wakala mukhetu wa yakala mosi kaka, 10wuna wasikununwa mu mihangu mya mboti: yuka ni wáyedisa bana, wáyamba banzenza, wásukula malu ma batu ba Nzambi, wásadisa bana banwa phasi, amana wásanda mihangu myosu mya mboti.
11Kaasi kandikisa mu kusonika bafwidi ba masanda; tangwa tsambu za bawu zisi bakatula mwena Kidisitu, bazodi mu kukwela, 12amana bwabu bisi diyukisila ndola, mukuma babika ndefi ya bawu ya theti. a a v12 «Ndefi ya bawu ya theti» yisi songila luyikamanu bana básila mu kusadila Kidisitu yi Dibundu, tangwa básonikama mu lisite ya bafwidi. 13Bawu phi bisi longuka mu kukala bamolu, bisi diengila nzu yi nzu; heku kaka bamolu, kaasi bisi hunina bakwawu musamu amana bakotidilaka batu bahika, bisi zonza mana mafwaniku zonza. 14Buna nzodi bafwidi ba masanda bakwela, babuta bana, batwadisaka bukheti nzu za bawu, ndangu mutendi kakonda phila ya kuhuna musamu. 15Mukuma bamosi bábaluka kala mu kulanda Satana. 16Yuka ni mukhetu wa mukwikidi kenina yi bafwidi hana kati dya biwutu byandi, kafweti basadisa, konda kutula kizitu ku Dibundu, ndangu dyawu dyalenda sadisa bafwidi ba kyedika.
17Bambuta bana bisi twadisa bukheti bafweti tambula luzitu lwa mbala zodi, kuluta bana bisi sala ngolu mu kusamuna Ndinga yi mu kulonga. 18Mukuma masonama masi zonza: «Wukasaku ngombi ku munwa buna wisi sala kisalu kya bule», amana «Musadi kafweti tambula mfutu wandi.»
19Wutambulaku kufunda kwena mbuta kaka yuka ni henina yi bambangi bazodi ho batatu. 20Bana bisi landikisa mu masumu, bakaya ku thwala ya boosu, hanga bana basidi bakala yi wonga.
21Yikusikidikisi ku thwala ya Tata wetu yi Kidisitu Yesu yi banzyo básolama: wulunda mituki mina konda kusola batu, konda kuhanga kima mu kusongila kayengu. 22Wutudikaku moku ku mutu ni tswalu, amana wukabanaku mu masumu ma bakwawu; lunda ngeyi mosi mu kasemi.
23Wunwaku kaka maza hika; bonga ndambu ya vinu kikuma kya kundu dyaku yi kikuma kya bisambu bya maladi bina bisi kubwila mbala ni mbala.
24Masumu ma batu bamosi masi monika, masi kwenda ku thwala ku ndola; kaasi masumu ma bakwawu masi landa kunima. 25Phila mosi phi, mihangu mya mboti myisi monika, amana ata mina mikondi monika, myalendaku kala mu kitsweki.
