Wazodi wa Khoditu 1 FHB Father's Heart Bible™

1 ¹Meni Pholu, thumwa wa Kidisitu Yesu mu luzolu lwa Tata wetu, yi Thimoti phangi wetu. Kwena Dibundu dya Tata wetu dina dyenina ku Khoditu, hakimosi yi batu boosu ba Nzambi bana benina muna Akayi mwosu: ²Khenda yakala yi benu yi ngemba yituka kwena Tata wetu yi kwena Pfumu Yesu Kidisitu.

Tata wa Kikesa Kyosu

³Yambula Tata wetu kasakumuka, Tata wa Pfumu wetu Yesu Kidisitu, Tata wa kyadi yi kikesa kyosu, ⁴yandi wuna kisi tuheka kikesa muna phasi zetu zoosu, hanga betu phi twalenda kuheka kikesa kwena bakwawu muna phasi zawu zoosu, mu kikesa kina betu-betu tubongidini kwena Tata wetu. ⁵Bwosu phasi za Kidisitu zisi vula mwena betu, yi bwabuna phi kikesa kyetu kisi vula mu nzila ya Kidisitu. ⁶Yuka ni tubati mona phasi, kyenina kikuma kya kikesa kyenu yi luhulusu lwenu; amana yuka ni tubongidini kikesa, kyenina kikuma kya kikesa kyenu, kina kisi sala muna kikwamina kyenu mu kuvibidila phasi zimosi zina betu phi tubati mona. ⁷Thondi yetu kikuma kya benu yenina ya ngolu, bwosu tuzayi ni, bwosu lwisi kala mu kithwadi ku phasi, yi bwabuna phi lwisi kala mu kithwadi ku kikesa.

⁸Tuzodi ni luzaya, baphangi, phasi zina twamona ku Aziya: twakala yi bizitu byalútila ngolu zetu buna byalutini kitesu, hanga twabwisa thondi ata ya kuzinga. ⁹Twáyuka ni twatambula ndola ya lufwa, hanga tuyekaminaku ku betu-betu, kaasi tuyekamina kwena Tata wetu, wuna kisi futumuna bafwa. ¹⁰Yandi wátuhulula ku lufwa lwa ngolu lwalu, amana katúhulula hika; tusini thondi yetu kwena yandi ni kalánda kutuhulula, ¹¹bwosu benu phi lwisi tusadisa mu bisambu byenu, hanga batu bawu bavutula matondu kikuma kya betu, kikuma kya kabu dya khenda kina twahekwa mu nzila ya bisambu bya lawu.

Pholu Wasoba Mabanza Mandi

¹²Mukuma, lulendu lwetu lwenina lwalu: katsatsa ketu kabati ta kimbangi ni twazínga mu tsi yayi, theti-theti kwena benu, muna kuditomisa yi wengele bya Tata wetu, mbatiku mu ngangu za tsi yayi, kaasi mu khenda za Tata wetu. ¹³Tusi lusonikina keti kima kwandi, kaasi mana lwalenda kutanga yi ata kubakisa; amana thondi yenina yama ni lwabakisa buna bufwanini, ¹⁴bwosu lwabakisa betu ndambu: mu kilumbu kya Pfumu wetu Yesu, lwahakana kikuma kya betu, bwosu betu phi twahakana kikuma kya benu.

¹⁵Muna kikumbwala kyaki, yábonga lukanu lwa kwisa kwena benu theti, hanga lwabonga khenda ya mbala yazodi. ¹⁶Yábonga lukanu lwa kuluta kwena benu bwosu yakwenda ku Masetwani, amana kuvutuka kwena benu yituka ku Masetwani, hanga lwamphidisa ku Yuteya. ¹⁷Muna kubonga lukanu lwalu, yáhanga bwosu mutu wakonda simbama? Voti mabanza mama yisi bonga mu phila ya lutu, hanga nzimbwala «Eeh, eeh» yi «Heku, heku» mu tangwa dimosi? ¹⁸Bwosu Tata wetu kenina wa kusila mbundu, ndinga yetu kwena benu yikadikiku «Eeh» yi «Heku». ¹⁹Mukuma, Mwana wa Tata wetu, Yesu Kidisitu, wuna twasamuna hana kati dya benu mu nzila ya Silasi, Thimoti yi meni, kakadikaku «Eeh» yi «Heku», kaasi mu yandi mwenina «Eeh» kosu tangwa. ²⁰Bilangi byosu bina kásila Tata wetu, mu yandi byenina «Eeh»; yi hakana mu nzila ya yandi phi, tubati tela «Abwabuna» kwena Tata wetu, kikuma kya khembu yandi.

²¹Buthwena, Tata wetu wuna kisi tuzyamisa hakimosi yi benu mwena Kidisitu amana wátusita, ²²wuna phi wátunamika kidimbu amana wátuheka Kitembu Kyatoma wandi muna mbundu zetu bwosu kilangi kya mana makwísa. ^a a v22 Ndinga ya Kigeleki yina yisi songila «kilangi» yenina ndinga ya mambu ma kuta — kabu kya theti kya mbongu. Tata wetu kisi heka Kitembu Kyatoma bwosu kabu kya theti kya bima byosu bina bikasidila kwísa, kilangi kyandi ni kakála lungisa kisalu kina wáyantika. ²³Mbati tela Tata wetu bwosu mbangi, ha luzingu lwama, ni yavutukaku ku Khoditu, kikuma yizodi kuluhawula. ²⁴Keku ni tubati yala lukwikilu lwenu, kaasi tubati sala hakimosi yi benu kikuma kya kyesi kyenu, mukuma lwazyama mu lukwikilu.