Mukanda wusonama mu matsanga
Mutu mosi kuna wásala Pholu mambi, amana batu bawombo bámuheka ndola. Pholu wuzimbudi ni dyafwana buthwena: lumulolula, ho loni kiwayi kimubasa. Wásasa mukanda wuna wásonika yi matsanga, yi kwisa kuna wásisa; myodi myawu heku ni kukonda luzolu ko, kaasi luzolu luna lwaleka kubakhukula mu mbala yikwawu.
2 1Bwabuna, yábonga lukanu mu mbundu yama ni yilembwa kwisa hika kwena benu mu mbala yikwawu ya phasi. 2Mukuma, yuka ni meni yiluyukisi kiwayi, buna nani wusadini mu kunsangalisa, kaasi kaka wuna meni yiyukisi kiwayi? 3Yásonika mambu mama hanga, tangwa yakwísa, babana bafwani kunsangalisa bambwisaku kiwayi; mukuma yenina yi kikumbwala mwena benu boosu ni kyesi kyama kyenina kyesi kya benu boosu. 4Hana kati dya kiwayi kya lawu yi ndunza ya mbundu, yálusonikina yi matsanga ma lawu; ka mu kuluyukisa kyadi ku, kaasi mu kulusongila lungongu lwa lawu luna yenina yawu kikuma kya benu.
5Kaasi yuka ni mutu kabwisa kiwayi, kambwisaku kiwayi meni kaka, kaasi, ndambu, benu boosu; nzodiku kumuyangisa lawu.
Mulolulenu amana muvutulenu yandi
6Kwena mutu wa mutindu wuna, ndola yina bámuheka batu bawombo yifwani. 7Buna buthwena, bulungini ni lumulolula amana luheka kikesa kwena yandi, ho loni kiwayi kya lawu kimubasa. 8Yihana ni, yiluhekini kikesa ni lusongila hika lungongu lwenu kwena yandi. 9Kikuma kyaki phi yásonikila, mu kuluzyamina amana yazaya keti lwenina balemvuka muna mambu moosu. 10Wuna lwisi mulolula, meni phi yimulolula. Mambu mana yálolula—yuka ni kwenina kima—yálolula kikuma kya benu ku thwala ya Kidisitu, 11hanga Satana katuhunaku, mukuma tuzayi bimeka bya yandi.
12Tangwa yakwísa ku Thowasi mu kusamuna Musamu wa Bukheti wa Kidisitu, mwelu wakanguki kikuma kya meni mu Pfumu, 13kaasi kitembu kyama kyakonda lembami, mukuma yámwanalwoku phangi wama Titi kuna. Buna yábaheka mboti amana yenda ku Masetwani.
14Kaasi matondu kwena Tata wetu, wuna kosu tangwa wisi tunatisa mu kununga mwena Kidisitu, amana mu nzila ya betu wisi mwanga muma mwosu mvumba ya kuzaya yandi. a a v14 Mviyalu wa luvunu wa bisi Loma, muna mbuta wa masodi wunungini wakala natisa bana kákanga, amana wakala yoka miti mya mvumba mu nzila. Pholu kisi fwanikisa Tata wetu kisi natisa batu bandi mu kununga kwa Kidisitu. 15Mukuma betu twenina mvumba ya Kidisitu kwena Tata wetu, hana kati dya babana bisi huluka yi babana bisi tota, 16kwena bamosi, mvumba yitukidila mu lufwa yenda ku lufwa; kwena bakwawu, mvumba yitukidila mu luzingu yenda ku luzingu. Amana nani wufwani mu mambu mama? 17Mukuma betu tukalaku, bwosu batu bawombo, bana bisi tekila ndinga ya Tata wetu; kaasi yi wengele, bwosu yitukidila kwena yandi, ku thwala yandi, tuzonza mwena Kidisitu.
