Benu Lwenina Mukanda Wetu
Bambeni bakwísa, bisi nata mikanda mya kusongila. Pholu wuvutudi ni benu-benu bisi Khoditu lwenina mukanda wandi, wusonikini mu Kitembu kya Tata wetu wa moya ha mbundu za batu. Wásya bulunda buna bwásonama ha matadi, bwa khembu kaasi bwenina zanga, mu kudifwanisa yi buna bwisi zinga, mwamuna mbunzu yitombuka amana batu batukini mu kiphika.
3 1Tubati yandika hika mu kudisongila betu-betu? Holoni, bwosu ndambu ya batu, tweku yi mupfunu wa mikanda mya kusongila kwena benu holoni mitukini kwena benu? 2Benu-benu lwenina mukanda wetu, wuna wusonikini mu mbundu zetu, wuzayakani amana wutangama kwena batu boosu. 3Lwisi disongila ni lwenina mukanda wutukini kwena Kidisitu, wuna twánata—wuna wusonikini, heku ni kazasa, kaasi ni Kitembu kya Tata wetu wa moya; heku ni ha bitini bya matadi, kaasi ha bitini bya mbundu za batu.
4Kikumbwala kya mutindu wuna thwenina kyawu mwena Kidisitu ku thwala ya Tata wetu. 5Heku ni ni tulenda betu-betu mu kubanza keti kima kimosi kyatukini kwena betu-meni, kaasi bulenda bwetu bwenina butukini kwena Tata wetu. 6Yandi wátukitula basadi ba bulunda bwa pha—heku ni bwa mukanda, kaasi bwa Kitembu. Mukuma mukanda wisi honda, kaasi Kitembu kisi heka luzingu.
Bulunda bwa Pha Bwisi Kenzila Kuluta
7Yuka ni kisalu kya lufwa, kina kyásonikama mu bisona ha matadi, kyisa ni khembu ya lawu ndangu bisi Kiseledi bálendaku kutala mbunzu ya Moyize kikuma kya khembu ya yandi—khembu yina yákala zanga, 8kisalu kya Kitembu kyakwísaku ni khembu yina yalúta kitoku? 9Mukuma yuka ni kisalu kya pfundusu kyákala yi khembu, buna bwa lawu kisalu kya masonga kyavulaka khembu kuluta! 10Kina kyákala yi khembu, buthwena keku yi khembu, kikuma kya khembu yina yalutini byosu. 11Mukuma yuka ni kina kyákala zanga kyisa ni khembu, buna bwa lawu khembu ya kina kyakwámina!
12Bwosu thwenina yi kivuvu kya mutindu wuna, tubati hanga ni kikumbwala kya lawu. 13Betu tufwananaku yi Moyize, wuna wásya kibwiku ha mbunzu yandi ndangu bisi Kiseledi bálendaku kutala tsuka ya kina kyákala zanga. 14Kaasi mabanza ma bawu mazitika. Tii yi kuna lelu dyadi, kibwiku kyaki-kyaki kisinangina tangwa bulunda bwa khulu buna butangama; kikatukaku, mukuma lwesi mwena Kidisitu kyawu kisikatuka. 15Eeh, tii yi kuna lelu dyadi, kosu tangwa buna bátangama Moyize, kibwiku kyenina ha mbundu za bawu. 16Kaasi kosu tangwa mutu wosu kana kábaluka kwena Pfumu wetu Yesu, kibwiku kisi katuka. 17Pfumu wetu Yesu kenina Kitembu, amana kuna kwenina Kitembu kya Pfumu wetu Yesu, kwenina kiphwanza. a a v17 Pholu wisi songa haha kyedika kya lawu kya kimosi: Pfumu wuna Kiseledi kisi baluka kwena yi Kitembu kina kisi nata kiphwanza, bawu Nzambi mosi—heku nkutu ni ngolu zodi zisi nwanisana, kaasi Tata mosi, yi Mwana, yi Kitembu Kyatoma, bana bisi sala hanga bakangula mbundu. 18Betu boosu, ni mbunzu zetu zikonda kibwiku, bwosu tubati tala khembu ya Pfumu wetu Yesu, tubati kitukila muna kifwani kyaki-kyaki, tuka khembu tii yi khembu, bwosu butukini kwena Pfumu wetu Yesu, wuna wenina Kitembu.
