Bábakwatisa kikuma kya kusamuna Lufutumuku

Phetelu yi Yowani báleka phipa mu boloku kikuma bazimbudi ni Tata wetu wáfutumuna mutu wufwa. Bwosu báhyulwa kwena lukutakanu lwa bambuta ba banganga Nzambi, basongila mutu wuna wábuka watelama hahana. Bwosu báhekwa muswa mu kutelama, bámana, bénda ku nzu, bálombila, amana kifulu kyanikana.

Kapitulu 4.

Buna Phetelu yi Yowani bákala zonzila kwena batu, banganga Nzambi, pfumu wa batsinzidi bana bakala kengila nzu ya Nzambi, yi Basadise bísa kwena bawu, mu khabu ya lawu, mukuma bakala longa batu amana bakala samuna lufutumuku lwa bafwa muna Yesu. Bábakwatisi amana bábakotisi mu boloku tii yi kilumbu kyakwísa, mukuma máfwana kedi masika. Kaasi batu balawu bana báyuka Ndinga bákwikila, amana thalu ya bayakala yákala kitesu kya mafunda matanu.

Kilumbu kyakwísa, bapfumu ba bawu yi bambuta yi balongi ba mitsiku bákutakana ku Yelusalemi, yi Ana mbuta wa banganga Nzambi, yi Khayifu, yi Yowani, yi Alekizande, yi boosu bana bákala ba kisina kya mbuta wa banganga Nzambi. ^a Bábasya hana kati amana bábahyula: «Mu ngolu zabiki keti mu khumbu ya biki luhangini bwabu?»

Hanga Phetelu, wuna wafuluka Kitembu Kyatoma, wubazimbwadi: «Benu bapfumu ba batu yi bambuta, yuka ni bisi tuhyula buthwena kikuma kya mihangu mya mboti kwena mbefu mosi, mutindu kábuka, luzaya bwabu, benu boosu yi batu boosu ba Kiseledi: mu khumbu ya Yesu Kidisitu wa Nazaleti, wuna lwákhoka ha kitakani, wuna wáfutumuna Tata wetu muna bafwa—mu nzila ya yandi, mutu yandu wutelami ku thwala ya benu wa mboti. Yesu yandu yenina «tadi dina benu batungi bálosa, dyadi dikituki tadi dya mupfundila wa nzu.» ^b Luhulusu lweku mwena mukwandi; kweku khumbu yikwawu ku hana zilu yina báheka mu kati dya batu, yina yifwani kutuhulusa.»

Buna bámona kiphwanza kya Phetelu yi Yowani, amana bábakula ni bayakala ba phamba bákala konda nlongi, báyituka lawu amana bábakula ni bawu bákala yi Yesu. Buna bámona mutu wuna wábuka watelama hamosi yi bawu, bakondi kima kya kuzimbula mu kubazonzila. Hanga bábatuma ni babuka ku nganda ya kimvuka, amana bekatendana bawu yi bawu, mu kuzimbula: «Biki twasala yi batu baba? Kidimbu kya khumbwa kyasalami ku moku ma bawu, kyenina kyamonika kwena boosu bana bisi zinga mu Yelusalemi, amana tulenduku kukyimangila. Kaasi ndangu dyambu dyadi dikonda yadingana lawu mu kati dya batu, mboti tubalwengisa ni bazonzaku hika kwena mutu mu khumbu yayina.» Hanga bababokidi amana bábatuma ni bazonzaku kondilo balongaku mu khumbu ya Yesu. Phetelu yi Yowani bábavutwala: «Benu-meni luzenga keti mbwilungi ku thwala ya Tata wetu mu kutambwasa benu, keti kutambwasa yandi. Mukuma tulenduku kusisa kuzonza mambu mana twámona yi mana twáyuka.»

Kunima dya kubaheyisa hika, bábalubula, konda kumona nzila ya kubetisa bawu fimbu kikuma kya batu, mukuma boosu bakala zatula Tata wetu kikuma kya mambu mana mábwa. Mukuma mutu wuna watambula kidimbu kyeni kya kubuka wáluta mimvula makumaya.

Kikanda kisi samba homa hamosi

Buna bábalubula, bénda kwena batu ba bawu amana babásamwana moosu mana mbuta ba banganga Nzambi yi bambuta bábazimbwala. Buna báyuka bwabuna, bázangula ndinga za bawu homa hamosi kwena Tata wetu amana bázimbula: «A Tata, Pfumu, ngeyi wáhanga zilu yi tsi yi mbu yi byosu bina byeninamwa. Ngeyi wázonzila mu Kitembu Kyatoma mu munwa wa tata wetu Tavidi, muhika waku: «Kikuma kya biki bikanda bikala funga khabu amana batu bakala banza mu phamba?» Bakyamvu ba tsi bátelama, amana bapfumu bákutakana homa hamosi kikuma kya kulwisa Tata wetu yi kulwisa Wuna wandi wátsita masi.»

Mukuma kyedika, muna mbanza yayi, Eloti yi Phosi Philatu bákutakana yi baphani yi batu ba Kiseledi kikuma kya kulwisa muhika waku watoma Yesu, wuna wátsita masi, ndangu bahanga kyosu kima kina koku dyaku yi dibanza dyaku dyatekila zenga ni dyasalama. Buthwena, A Tata, tala kuheyisa kwa bawu, amana yambula ni bahika baku bazonza Ndinga yaku yi kiphwanza kyosu, mu kuyadingisa koku dyaku mu kubuka, amana biphadi yi bidimbu bya khumbwa bisalama mu khumbu ya muhika waku watoma Yesu.

Kunima dya kusamba, buna báfwana kutakana máningana; boosu báfuluka Kitembu Kyatoma amana bázonza Ndinga ya Tata wetu yi kiphwanza.

Mbundu yimosi, Kikanda kimosi

Bakwikidi boosu bákala yi mbundu yimosi yi moya wumosi; ka mutu ku kazimbula ni kuvwa kwandi kwenina kwa yandi meni, kaasi bima byosu phi bákala byawu mu kimvuka. Mu ngolu za lawu, bathumwa bakala hana kimbangi kya lufutumuku lwa Pfumu Yesu, amana khenda ya lawu yákala hana thandu ya bawu boosu. Ka mutu ku mu kati dya bawu kákala mu phasi: boosu bana bákala yi mafu kondilo nzu bakala tekisa amana bakala nata thalu ya bima bina batekisa, amana bakala sya ku bitambi bya bathumwa, amana bakala kabisa kwena kosu mutu bwosu wena mupfunu wandi.

Yozefu, mulefi mosi wa ku Siphe, wuna bathumwa bakala tela Balanabasi (disongidila Mwana wa kikesa), wátekisa kilanga kyandi, amana wánata mbongu, amana wásya ku bitambi bya bathumwa.