Tata Wukitula Bulunda Bwandi Bwa Pha
Bitini bya matadi bya mpha bázenga amana básya mu nzasa, amana Lefi wávwaduswa ni Tata wetu yandi-meni wákala kuvwa kwa bawu. Buna kiyuvu: biki kisi lomba Tata wetu kwena ngeyi? Ni wamuyuka bweya, wamuzola amana wamusadila. Yandi wisi zola muphakanu amana kisi muheka madya, buna luzola baphakanu phi.
Tata wetu kisi zonza mu mavese 1–2, 11
10 1Muna tangwa dina, Tata wetu wunzimbwadini: «Zenga bitini byodi bya matadi hanga bina byatheti, wísa kwena meni ku mongu, amana tunga nzasa wa miti. 2Yikasónika hana bitini bina ndinga zina zákala ha bitini byatheti bina wábula, amana wasya byawu mu nzasa.»
3Buna yátunga nzasa wa miti mya akasiya, yázenga bitini byodi bya matadi hanga bina byatheti, amana yázanza ku mongu yi bitini byodi mu moku. 4Wásonika hana bitini bina, hanga bwatheti, mitsiku kumi mina Tata wetu wákuzimbwala ku mongu mu kati dya mbawu, muna kilumbu kya lukutakanu. Amana Tata wetu wápheka byawu kwena meni. 5Yávutuka, yákulumuka ku mongu, amana yásya bitini mu nzasa wuna yátunga; kwakuna byenina kedi, bwosu Tata wetu kánthuma.
6Bisi Kiseledi bákatuka ku Beloti Beni-Yakani, benda ku Mosela, kwakuna Loni káfwila amana bámuzika; Eleyazadi mwana wandi wákala nganga Nzambi mu kifulu kyandi. 7Tukidila kwakuna, bénda ku Gudigoda, amana tukidila ku Gudigoda benda ku Yotabata, tsi ya misinga mya maza. 8Muna tangwa dina, Tata wetu wásola kanda dya Lefi hanga banata nzasa wa bulunda, hanga batelama ku thwala yandi, hanga bamusadila, amana basakumuna mu khumbu yandi, bwosu bisi hanga tii yi lelu. 9Yihana ni Lefi keku yi ndambu keti kimvwama yi baphangi bandi; Tata wetu kenina kimvwama kyandi, bwosu Tata wetu kámusila.
10Yákala ku mongu, hanga mbala yatheti, bilumbu makumaya bya mwini yi phipha makumaya; Tata wetu wányuka hika; Tata wetu kázolaku kuluzimbisa.
11Amana Tata wetu wunzimbwadini: «Telama, wenda ku thwala ya batu, hanga bakota amana babonga tsi yina yidya ndefi kwena bakhaka bawu ndangu yíbaheka.»
Mana Tata Wetu Kalomba Kwena Ngeyi
12Amana bwabu, ngeyi Yisaledi, kina Tata wetu kalomba kwena ngeyi, kaasi kukinzika yandi, kukangala mu nzila zandi zoosu, kumuzola, amana kumusadila mu mbundu yaku yosu yi mu moya waku woosu, 13amana kulunda mitsiku mya Tata wetu yi bizila byandi bina yikuzimbwala lelu, mu diambu dya mboti yaku? 14Talandi, mazilu, mazilu ma mazilu, tsi, yi byosu bina muna, byosu byenina bya Tata wetu. 15Kaasi Tata wetu wázola bakhaka baku, wásola butuka dya bawu kunima dya bawu, ngeyi, kuluta bikanda byosu, bwosu bwenina lelu. 16Buna yotisa kinyiku kya mbundu yaku, amana wuyambula kukala yi mutwa ngolu. a a v16 «Yotisa kinyiku kya mbundu yaku» kisi songila kuzenga byosu bina bisi kitula mbundu kukala ya ngolu yi yakangama — mu kuyizibula yoosu kwena Tata wetu. 17Mukuma Tata wetu kenina Nzambi wa banzambi, Pfumu wa bapfumu, Nzambi wa mbuta, mukwa ngolu, wa tsisi, wuna kisi tala mbunzu za batu, amana kisi tambula mbongu ya kiyekwila. 18Kisi hangila masonga kwena nsona yi mufwidi, amana kisi zola munzenza, kisi muheka madya yi miledi. 19Buna ngeyi phi wufwani kuzola munzenza, mukuma wákala munzenza mu tsi ya Ngiphiti. 20Kinzika Tata wetu, musadila, wukangama mwena yandi, amana wudya ndefi mu khumbu yandi. 21Yandi kenina khembu yaku, Tata waku, wuna wákusadila mambu mama ma mbuta yi ma tsisi mana mesu maku mámona. 22Bakhaka baku bákulumuka ku Ngiphiti, batu makumi tsambwadi; bwabu Tata wetu wukuvudisi hanga bathetimbwa ba zilu.
