Mbanza za Kiswaminu kikuma kya Batu ba Kwakonda Sala Mbi
Mbanza za kutina yina nzila zayo zayidika, ndangu yakala wuna sengu dya kisoka kyandi dyákatuka kalenda tina khabu za mfutisi wa menga amana katambula pfundusu. Matadi ma ndilu masala kuna bambuta ba theti bámasya. Ka mutu ku bambedisa ni mbangi mosi kaka, amana mbangi wa luvunu katambula mana kázolila phangi wandi.
19 1Tangwa Tata waku kázenga makanda mana ma tsi yina Tata waku kakúheka kwena ngeyi, amana ngeyi wábakukwasa, amana wakazínga muna mbanza za bawu yi muna nzu za bawu, 2vambika mbanza tatu muna tsi yina Tata waku kakúheka kwena ngeyi ndangu wayivwa. 3Yidika nzila amana kabula mu bitini bitatu tsi yina Tata waku kakúheka kwena ngeyi ndangu wayivwa, hanga wosu wuna kahonda mutu kalenda tina kwakuna. 4Yihana ni dyambu dya muhondi wuna kalenda tina kwakuna amana kazínga: wuna wubeta phangi wandi konda kuzaya, yandi kondi kumumenga ku luyandiku, 5bwosu yuka ni yakala dyakwenda muna musitu yi phangi wandi mu kukwanga miti, amana koku dyandi dyázanza kisoka mu kukwanga muti, amana sengu dya kisoka dyákatuka mu luketu amana dyábeta phangi wandi, amana wafwidi; mutu wawuna kalenda tina muna mbanza mimosi mya mina amana kazínga. 6Kinga, mfutisi wa menga, yi khabu zenina mu mbundu yandi, fwani katyakulila muhondi muna nzila yina yankaleyi, amana kamumona amana kamuhondisa, ata kafwaniku kufwa, mukuma kámmengaku phangi wandi ku luyandiku. a a v6 Mfutisi wa menga kákala mutu wukesidila mu kikanda kya wuna wáhondama; muna kinkulu, yandi kafweti tyakula muhondi. Mbanza za kiswaminu zikala kebila muhondi wa konda kudizaya mu mfutu yayina, yi kuna tangwa dya mfundusu ya kyedika. 7Yihana ni, meni yilutumini: Vambikenu mbanza tatu kikuma kya benu-meni. 8Yuka ni Tata waku kakayálisa tsi yaku, bwosu kázenga ndefi kwena batata baku, amana kakúheka tsi yosu yina kázenga ndefi kwena bawu, 9yuka ni wakalunda bukheti-bukheti mitsiku myosu meni yikuheka lelu—wazola Tata waku amana bilumbu byosu wákangala muna nzila zandi—buna leyisa mbanza tatu mina ha thandu ya mina mitatu, 10hanga menga ma mutu wakonda sala mbi manokaku muna tsi yina Tata waku kakúheka kwena ngeyi hanga kimvwama, amana ndola ya menga yabwílaku ha thandu yaku. 11Kaasi yuka ni mutu kamenga phangi wandi, amana kammwangamina, amana kammbwila yi kumubeta amana wafwidi, buna katini muna mbanza yimosi mya mina, 12bambuta ba mbanza yandi batuma amana bamuvutula, amana bamuheka kwena mfutisi wa menga ndangu kafwa. 13Kummonaku kyadi; losa ndola ya menga ma mutu wakonda sala mbi muna Kiseledi, hanga byakukwendila bukheti.
Zitisa Ndilu ya Phangi Waku
14Kunikisaku tadi dya ndilu ya phangi waku, dina dyasyama kwena batu ba makula ma theti, muna kimvwama kina wayivwa muna tsi yina Tata waku kakúheka kwena ngeyi ndangu wayivwa.
15Mbangi yimosi kafwaniku fundisa mutu mu disumu dimosi ho mu kukonda kwa masonga, konda kutala mutindu wa mbi. Dyambu dyisi telama kaka mu kimbangi kya bambangi bodi kondilo batatu. 16Yuka ni mbangi wa mbi kábwesuka kikuma kya mutu mu kumufundila kukonda kwa masonga, 17batu bodi bana benina mu tendu bafweti telama ku thwala ya Tata waku, ku thwala ya banganga Nzambi yi bazengi-mambu bana bakala sala muna bilumbu byabina. 18Bazengi-mambu bafweti hyula bukheti-bukheti. Yuka ni mbangi wa luvunu, wubati ta kimbangi kya luvunu kikuma kya phangi wandi, 19lumfwadikila mana kabanzila phangi wandi; losa mbi muna kati dya benu. 20Bana basyedi bayúka amana bakála yi bweya, amana bakahángaku hika disumu dya mbi dya mutindu wuna muna kati dya benu. 21Kummonaku kyadi: luzingu muna luzingu, disu muna disu, dinu muna dinu, koku muna koku, kulu muna kulu.
