Tata wetu Wuzonza kwena Moyize
Mwana wa theti wosu kenina wa Tata wetu, wufweti lubulwa ni kima kyahika ha kifulu kyandi, mukuma yandi wábonga mwana wa theti wa Ngiphiti mu kulubula mwana wandi. Mukinzi yi dimbu hana koku yi hana mbunzu byenina ndangu khyufu kya mwana kavwa mvutu. Yandi wubanata mu nzila ya tseki, ku thwala ya bawu mu ditutu yi mu mbawu.
Tata wetu kisi zonza mu mavese 2, 17
13 1Tata wetu wázimbula kwena Moyize:
2«Solila meni mwana wosu wa theti. Mwana wa theti wosu mu kati dya bisi Kiseledi kenina wa meni, kaba wa mutu kaba wa mbisi.» a a v2 Tata wetu wutanga mwana wosu wa theti ni kenina wa yandi-meni — dina disi lungila buna bufwani mu Yesu, Mwana wa theti wuna Tata wáhana kikuma kya betu.
3Moyize wuzimbudi kwena batu: «Yubuka kilumbu kyaki wálubuka ku Ngiphiti, ku nzu ya kihika, mukuma mu koku kwa ngolu, Tata wetu wálubula ngeyi ku homa haha. Wadyáku mapha ma muvimbu. 4Lelu, mu ngonda ya Abibi, wubati lubuka. 5Tangwa Tata wetu kakunata ngeyi muna tsi ya Bisi Kanana, Bisi Iti, Bisi Amole, Bisi Ivi yi Bisi Yebusi — tsi yina kásila kwena batata baku ni kakúheka ngeyi yawu, yina yibasa midiki yi bwiki — wasadila mukinzi wawu mu ngonda yayi. 6Bilumbu tsambwadi wafweti dya mapha makonda muvimbu, amana mu kilumbu kya tsambwadi, mukinzi kwena Tata wetu. 7Mapha makonda muvimbu wafweti dya mu bilumbu tsambwadi. Kuwánamwoku mapha ma muvimbu mu kati dyaku, keti muvimbu mu binzunga byaku byosu. 8Muna kilumbu kina, wazimbula kwena mwana waku: “Mama menina kikuma kya mana Tata wetu kasadila kwena meni tangwa yálubuka ku Ngiphiti.” 9Dyawu dikakála dimbu kwena ngeyi hana koku kwaku yi kima kya kuyubuka hana mbunzu yaku, hanga mulongi wa Tata wetu wakála hana malebu maku; mukuma mu koku kwa ngolu, Tata wetu wálubula ngeyi ku Ngiphiti. 10Buna wafweti sadila mutsiku wawu mu tangwa dina diyidikila, mvula muna mvula.
11Tangwa Tata wetu kakunata ngeyi muna tsi ya Bisi Kanana amana kakúheka ngeyi yawu, bwosu kádila ndefi kwena ngeyi yi kwena batata baku, 12wasolila Tata wetu mwana wosu wa theti; mwana wosu wa yakala wa theti wa bibulu byaku kenina wa Tata wetu. 13Wulubula ane wosu wa theti mu mwana wa mukoku, kaasi yuka ni wulubulaku, watola tsingu yandi. Wulubula mwana wosu wa theti mu kati dya bana baku. 14Tangwa mwana waku kakuhyula mu bilumbu byálanda: “Biki disongidila dya mama?” wazimbula kwena yandi: “Mu koku kwa ngolu, Tata wetu wátulubula ku Ngiphiti, ku nzu ya kihika. 15Tangwa Fwalawo kázolaku kuyambula betu benda, mukuma mbundu yandi yázyama, Tata wetu wáhonda mwana wosu wa theti mu Ngiphiti, tukila mu bana ba theti ba batu tii yikuna mu bana ba theti ba bambisi. Kikuma kyokyo, yisi tambika kimenga kwena Tata wetu, mwana wosu wa yakala wa theti, kaasi yisi lubula mwana wosu wa theti wa yakala.” 16Dyawu dikakála dimbu hana koku kwaku yi mukaba hana mbunzu yaku, mukuma mu koku kwa ngolu, Tata wetu wátulubula ku Ngiphiti.»
Nzila ya Mboti
17Tangwa Fwalawo wáyambula batu benda, Tata wetu kábatwadisaku mu nzila yina yisi hita mu tsi ya Bafilisiti, ata yina yákala belabela; mukuma Tata wetu wázimbula: «Yuka ni bamona mvita, balenda balumuna mabanza ma bawu amana vutuka ku Ngiphiti.»
18Buna Tata wetu wábatwadisa batu mu kuzyeta, mu nzila ya nganga, kwena yanga dya mbuta dya Kabengi. Bisi Kiseledi bálubuka ku Ngiphiti, báyilama mu mvita. b b v18 Mu Kiebeleo: Yam Sufu, «Yanga dya Matiti.»
19Moyize wábonga bifufwa bya Yozefu, mukuma Yozefu wátuma bana ba Kiseledi ni badila ndefi: «Kyedika, kyedika, Tata wetu kakwísa kwena benu, amana lwafweti nata bifufwa byama tukila haha kumosi yi benu.» 20Bákatuka ku Sukoti amana bákala ku Etami, hana nzenzi ya nganga. 21Amana Tata wetu wénda ku thwala ya bawu mu kilumbu mu kunzi kya tuti hanga katwadisa nzila, amana mu phipha mu kunzi kya mbawu hanga kabamunika, hanga balenda landa nzila mu kilumbu yi mu phipha. 22Kunzi kya tuti mu kilumbu yi kunzi kya mbawu mu phipha, byákatukaku ku thwala ya batu.
