Ezekiele 18 FHB Father's Heart Bible™

18 ¹Ndinga ya Tata wetu yakwísa kwena meni:

²«Kikuma kya biki lubati zonza kingana kyaki hika kikuma kya tsi ya Kiseledi: “Batata bádya bibundu bya vinu bya ngani, amana menu ma bana mabati bela”?»

³«Bwosu yenina moyu, kazimbudini Pfumu Tata, lukásadilaku kingana kyaki hika mu Kiseledi.» ⁴«Moya wosu wenina wama: wa tata yi wa mwana, phila mosi. Mutu wuna wisi sumuka, yandi kafwa. ⁵Yuka ni kwena mutu wa masonga wuna wisi hanga mana masonga yi mana masungama. ⁶Kadyaku ku miongu muna nzu za nzambi keti katala biteki bya kanda dya Kiseledi. Kataku mbongi yi mukhetu wa ngani keti kalekaku yi mukhetu mu tangwa dya khukhu yandi. ⁷Kanyokunaku mutu, kaasi wisi vutula kilekwa kina kábonga mu pfuka. Kayibaku keti kabwotula, kaasi wisi hana mapha mandi kwena wuna wena yi nzala amana wisi vwatisa khonga ni miledi. ⁸Kalefisaku mbongu ni muluta keti kabonga mbongu, kaasi wisi tina ku mambu ma mbi, amana wisi zenga mambu mu masonga ha kati dya mutu yi mutu wahika.» ⁹Wisi landa nzengulu zama amana wisi lunda mitsiku myama ni lukwikilu. Mutu yandina wenina wa masonga; mu kyedika kazínga, kazimbudini Pfumu Tata.

¹⁰«Yuka ni kena yi mwana mukwa kingolu-ngolu wuna wisi honda batu keti wisi hanga kimosi kya mambu mama makwawu. ¹¹(tata wandi kahángaku kimosi kya mama): wisi dya muna nzu za nzambi za ku miongu, wisi sumuna mukhetu wa ngani, ¹²wisi nyokuna batsukami yi bana bena mu phasi, wisi bwotula, kavutulaku kima kina kábonga mu pfuka, wisi tala biteki, amana wisi hanga mambu ma nzanzi. ¹³Wisi lefisa mbongu ni muluta amana wisi bonga mbongu. Mutu yandina kazínga? Loni, kazingaku! Mukuma wáhanga mambu mama moosu ma nzanzi, mu kyedika kafwa, amana menga mandi makála ha mutwa wandi yandi meni.»

¹⁴«Kaasi yuka ni mwana yandi kabuta mwana wuna wisi mona masumu moosu ma tata wandi, amana buna kámamona, kahángaku kimosi kya mawu: ¹⁵Kadyaku ku miongu muna nzu za nzambi keti katala biteki bya kanda dya Kiseledi. Kataku mbongi yi mukhetu wa ngani. ¹⁶Kanyokunaku mutu amana kabongaku kilekwa mu pfuka. Kayibaku keti kabwotula, kaasi wisi hana mapha mandi kwena wuna wena yi nzala amana wisi vwatisa khonga ni miledi. ¹⁷Wisi tina ku mambu ma mbi amana kabongaku muluta keti mbongu. Wisi lunda mitsiku myama amana wisi landa nzengulu zama. Kafwaku kikuma kya disumu dya tata wandi; mu kyedika kazínga.»

¹⁸«Kaasi tata wandi kafwa kikuma kya disumu dyandi yandi meni: wáyiba ni ngolu, wábwotula phangi wandi, amana wáhanga mambu ma mbi ha kati dya batu bandi.»

¹⁹«Kaasi benu lubati hyula: “Kikuma kya biki mwana kanataku ndola ya tata wandi?” Mukuma mwana wáhanga mana masonga yi mana masungama amana wálunda nzengulu zama zoosu bukheti-bukheti, mu kyedika kazínga. ²⁰Mutu wuna wisi sumuka, yandi kafwa. Mwana kanataku ndola ya tata wandi, keti tata kanataku ndola ya mwana wandi. Masonga ma mutu wa masonga menina ha yandi meni; mbi ya mutu wa mbi yenina ha yandi meni.»

²¹«Kaasi yuka ni mutu wa mbi kakatuka ku masumu mandi moosu, kalunda nzengulu zama zoosu, amana kahanga mana masonga yi mana masungama, mu kyedika kazínga, kafwaku. ²²Mambi moosu mana káhanga makáyubukaku hika; kikuma kya masonga mana káhanga, kazínga.» ²³Ni yisi sephila mu lufwa lwa mutu wa mbi, kazimbudini Pfumu Tata? Keti yisi zola kaka ni kakatuka ku nzila zandi amana kazínga? ^a a v23 Tata wetu kasephilaku mu kuzangana kwa mutu wosu. Luzolu lwandi lwa ngolu ni wuna wádizimbikisa nzila kabaluka amana kavutuka ku nzu, ku luzingu.

²⁴«Kaasi yuka ni mutu wa masonga kakatuka ku masonga mandi, kasumuka, amana kahanga mambu mamosi ma nzanzi mana bisi hanga batu ba mbi, ni kazínga? Mihangu myandi myosu mya masonga mikáyubukaku hika. Kikuma kya kukonda kwandi kwa lukwikilu yi masumu mandi, kafwa.»

²⁵«Kaasi benu lubati zimbula: “Nzila ya Tata wetu yeku masonga.” Yukenu, kanda dya Kiseledi: Ni nzila yama yeku masonga? Keti nzila zenu zawu zeku masonga?» ²⁶Yuka ni mutu wa masonga kakatuka ku masonga mandi amana kahanga mambu ma mbi, kafwa kikuma kya mawu; kikuma kya mbi yina káhanga, kafwa. ²⁷Kaasi yuka ni mutu wa mbi kakatuka ku mbi yina káhanga amana kahanga mana masonga yi mana masungama, kahúlula moya wandi. ²⁸Mukuma wisi banza mambi mandi moosu amana wisi katuka ku mawu, mu kyedika kazínga, kafwaku. ²⁹Kaasi kanda dya Kiseledi dibati zimbula: «Nzila ya Tata wetu yeku masonga.» Ni nzila zama zeku masonga, kanda dya Kiseledi? Keti nzila zenu zawu zeku masonga?

³⁰Buna, yikalufundisa, benu kanda dya Kiseledi, mutu wosu mu nzila zandi, kazimbudini Pfumu Tata. Vutukenu! Katukenu mu mambu menu mambi moosu, hanga disumu dikalaku kuzangana kwenu. ³¹Losenu masumu moosu mana lwasála; disalenu mbundu ya pha yi kitembu kya pha. Kikuma kya biki lwafwa, benu kanda dya Kiseledi? ³²Mukuma yikálaku yi tsambu ya lufwa lwa mutu wosu, kazimbudini Pfumu Tata. Buna, vutukenu, amana zingilenu!