Ezekiele 4 FHB Father's Heart Bible™

4 ¹«Ngeyi, Mwana wa mutu, bonga ditadi, sya dyawu ku thwala yaku, amana sonika hana dyawu mbanza—Yelusalemi. ²Zyeta yawu: tunga kibaka kya nzyeta mu kuzyeta yawu, telamisa mongu kwena yawu, sya mala ma mvita kwena yawu, amana sya bima bya kubula kibaka mu kuzyeta yawu. ³Bonga longa dya sengu; sya dyawu bwa kibaka kya sengu hana kati dya ngeyi yi mbanza. Balula mbunzu yaku kwena yawu; yawu yakála mu kuzyetwa, amana ngeyi wakafítikisa nzyeta kwena yawu. Kyaki kyenina kidimbu kwena nzu ya Kiseledi.

⁴«Ngeyi, lala ku luhati lwaku lwa kimoso amana sya hana dyawu masumu ma nzu ya Kiseledi. Mu bilumbu bina wakalála hana dyawu, wakanáta masumu ma bawu. ⁵Mukuma yikuhekini mvula za masumu ma bawu bwa thalu ya bilumbu—bilumbu khama tatu yi makumi vwa—ndangu wakanáta masumu ma nzu ya Kiseledi.

⁶«Kunima dya kumanisa mana, lala hika ku luhati lwaku lwa kibakala amana nata masumu ma nzu ya Yuta bilumbu makumaya; yikuhekini kilumbu kimosi kikuma kya kosu mvula. ⁷Balula mbunzu yaku kwena nzyeta ya Yelusalemi, ni koku dyaku dyazibuka, amana bikula kwena yawu. ⁸Tala, yikakúkasa ni misinga ndangu wafwanaku kubalula tuka ku luhati lumosi kwena lukwawu, tii yi kuna wakamanísa bilumbu bya nzyeta yaku.

⁹«Bonga bule, odizi, madezo, ndelo, masangu, yi tswala; sya mawu mu kalondu kamosi amana yidika mawu mapha. Dya mawu mu bilumbu bina wakalála ku luhati lwaku—bilumbu khama tatu yi makumi vwa. ¹⁰Tesa madya mana wukadya—bwa bitesu nana bya zitu mu kosu kilumbu; amana dya mawu mu tangwa dyahekama. ¹¹Nwa mamba matesama—bwa kati-kati dya mulangi mu kosu kilumbu; amana nwa mawu mu tangwa dyahekama. ¹²Wakádya mawu bwa mapha ma odizi, ni kuyoka mawu ku mesu ma batu boosu hana tuvi twa batu.» ¹³Amana Tata wetu wuzimbudi: «Bwabuna bana ba Kiseledi bakádya mapha ma bawu ma mukuku hana kati dya makanda kuna yikabábinga.»

¹⁴Amana meni yízimbula: «A Pfumu Tata! Khaku kedi yidikhitula wa mukuku. Tukidila kileki kyama tii yi buthwena bwabu, khaku kedi ndya kima kyafwa kyawu meni keti kina bambisi byakanzuna, amana mbisi ya mbi yikotaku mu munwa wama.»

¹⁵Amana wunzimbwadi: «Tala, yikuyambudi mu kusadila tuvi twa ngombi muna khyandu kya tuvi twa batu mu kuyoka mapha maku.»

¹⁶Amana wunzimbwadi: «Mwana wa mutu, tala, yikabúkuna koka dya mapha mu Yelusalemi. Bakádya mapha mu kitesu kya zitu, ni phasi za mbundu, amana bakánwa mamba mu kitesu, ni boma, ¹⁷mukuma mapha yi mamba makála ma phasi. Bakatálasana mesu ni tsisi amana bakazángana mu masumu ma bawu.»