Nzadi Wuna Wisi Lubuka mu Nzu ya Nzambi
Mamba masi lubuka tuka ku tsi ya homa dya nzu ya Nzambi, amana, mu kutezwa ha bifulu-bifulu, masi tombuka tii yi ku bikhosu bya malu, ku makungulu, ku mbunda, amana kunima makaluta kusaya. Masi vedisa yanga dya lufwa, masi dizadisa ni mbisi, amana masi lonza makhungu ni miti mya lawu misi bonga bibundu mu kosu ngonda. Banzenza bisi bonga tsatsidi ya tsi mu lutumu lwa Tata wetu.
Tata wetu kisi zonza mu mavese 13–23
47 1Amana wávutula meni ku mwelu wa nzu ya Nzambi, amana mamba makala lubuka tuka ku tsi ya mwelu, mesi kwenda ku tsosu, mukuma nzu ya Nzambi yátala ku tsosu. Mamba meni makala kuluka tuka ku tsi ya sambwa dya banda dya nzu ya Nzambi, ku banda dya mesa ma kimenga. 2Wánata meni ku lubuka ku mwelu wa londi amana wántwadisa ku nzyengila ku phenza tii yi kuna mwelu wa phenza wuna watála ku tsosu; amana mamba makala lubuka ndambu-ndambu tuka ku banda.
3Bwosu mutu yina kákala kwenda ku tsosu yi musinga wa kutesa mu koku, watésa, fwana-fwana bitambi 1.500, amana wántwadisa mu mamba mana makala tula ku bikhosu bya malu. 4Watésa dyaka bitambi 1.500, amana wántwadisa mu mamba — mamba mátula ku makungulu. Watésa dyaka bitambi 1.500, amana wántwadisa mu mamba — mamba mátula ku mbunda. 5Watésa dyaka bitambi 1.500 — nzadi wuna ndilendaku kusabuka, mukuma mamba máyunduka, mamba madima buna bufwani kusaya, nzadi wuna wulendaku kusabuka.
6Wázimbula kwena meni: «Mwana wa mutu, wumoni mama?» Amana wávutula meni ku khungu ya nzadi.
7Bwosu yávutuka, yámona miti mya lawu mu makhungu modi ma nzadi. 8Wázimbula kwena meni: «Mamba mama mesi kwenda ku kizunga kya tsosu, makuluka ku Alaba, amana makota mu yanga dya mbuta, yanga dya mamba mana mafwa, amana mamba makituka ma tulu. 9Kwosu kuma kuna nzadi wisi kwenda, kosu kima kya moya kyosu kina kisi tamuka kakála yi luzingu, amana batsema bakála ba lawu; mukuma mamba mama mátula kwakuna, amana mamba ma yanga makituka ma tulu, amana byosu bikála yi luzingu kwosu kuma kuna nzadi wisi kwenda. 10Balobi bakála telama ku kabeta ka yanga; tuka ku Eni-Ngedi tii yi kuna Eni-Engalayimi, homa ha kuyala mawanda. Batsema bandi, mitindu yi mitindu, hanga batsema ba yanga dya Medina. Ba lawu kibeni. 11Kaasi mamba mandi mana madimana yi mahomba mandi makitukaku ma tulu; masisyilu kikuma kya mungwa. 12Miti myosu mya mitindu yi mitindu mya bibundu myakála mena mu makhungu modi. Makaya mandi masiku yumuka amana bibundu byandi bisiku manisa; kosu ngonda myakála buta bibundu bya pha, mukuma mamba mandi mesi lubuka mu kikumbu kya Nzambi. Bibundu byandi bikála madya, makaya mandi makála ma kubelula.» a a v12 Nzadi wuna wisi lubuka mu kikumbu kya Tata wetu, wuna miti myenina ku makhungu mandi, mina makaya mandi manata kubelula, wisi lubuka dyaka mu mbonokono ya Yowani — nzadi wa luzingu wuna wisi lubuka tuka ku kiti kya luyalu, yi muti wuna makaya mandi mena kikuma kya kubelula makanda (Nzengolo 22:1-2).
Tata Wisi Kaba Tsi
13Pfumu Tata wisi zimbula: «Wuwu wena muma mwa kukaba tsi hanga kuvwa mu kati dya bikanda kumi yi byodi bya Kiseledi: Yozefu kakála tambula bitini byodi. 14Kabenuyo phila mosi; yidya ndefi mu kuyihana kwena batata benu, amana tsi yayi yábwila kwena benu hanga kuvwa kwenu.
15Wuwu wena muma mwa tsi: ku londi, tuka ku yanga dya Medina, mu kuhyoka ku Hetheloni tii yi kuna Lebo-Hamati, Tsedadi,
16Belota, Sibelayimi (ha kati dya muma mwa Tamasi yi Hamati), yi Hatseli-Hatikoni, ha muma mwa Hawulani. 17Bwabuna muma mwenda tuka ku yanga tii yi kuna Hatsali-Enani, ha muma mwa Tamasi, amana muma mwa Hamati ku londi. Dyadi dyena sambwa dya londi.
18Sambwa dya tsosu dyenda ha kati dya Hawulani yi Tamasi, mu kulanda Yolutani ha kati dya Ngaladi yi tsi ya Kiseledi, tii yi kuna yanga dya tsosu tii yi kuna Thamadi. Dyadi dyena sambwa dya tsosu.
19Sambwa dya banda dyenda tuka ku Thamadi tii yi kuna mamba ma Meliba-Kadesi, amana mu kulanda mwanzadi wa Ngiphiti tii yi kuna yanga dya Medina. Dyadi dyena sambwa dya banda, kuna Negebi.
20Ku sambwa dya ndamba, yanga dya Medina dyakála muma tii yi kuna homa ha dyatalana yi Lebo-Hamati. Dyadi dyena sambwa dya ndamba.
21Bwabuna kabulenu tsi yayi mu kati dya benu-benu bwosu bwena bikanda bya Kiseledi. 22Kabulenuyo hanga kuvwa kikuma kya benu-benu yi kikuma kya banzenza bana bisi zingila mu kati dya benu, bana babuta bana mu kati dya benu. Bahangilenu hanga bisi Kiseledi ba mukwandi; yi benu batámbula kuvwa mu kati dya bikanda bya Kiseledi.» 23Mu kanda dyosu dina munzenza kasi zingila, muhekenu kuvwa kwandi kwakuna, kazimbudini Pfumu Tata.
