Musamu wa Bukheti wa Pholu wázyama ku Yelusalemi
Pholu wánata Musamu wa Bukheti wandi ku Yelusalemi, amana makunzi mayikaku kima mu wawu. Kunima wátelama kwena Phetelu luse mu luse kikuma kya kuvutuka ku mesa ma Baphani mu wonga. Ka mutu ku wukitukidi mutu wa masonga mu kulemvuka ku mutsiku; Pholu buthwena wisi zinga mu lukwikilu mwena Mwana wa Tata wetu.
2 1Kunima dya mvula kumi yi maya, yátombuka hika ku Yelusalemi ni Balanabasi, yábonga phi Titi. 2Yátombuka mu nzila ya tsengumuka amana yábasongila Musamu wa Bukheti wuna yisi samuna hana kati dya Baphani—mu kingenga, kwena babana ba luzitu—ndangu yakalaku takalala mu phamba, ho yátakalala mu phamba kedi. 3Kaasi ata Titi, wuna wákala yi meni, mbatanana kenina mwisi Ngeleti, bámulundikaku mu kuyotiswa. 4Dyadi dyákala kikuma kya baphangi ba luvunu, bana bákotisa mu kitsweki, bana bákota mu kingenga mu kutala kiphwanza kyetu kina twenina muna Kidisitu Yesu, ndangu batukitula ku kihika. 5Tubalemvukaku kwena bawu ata muna tangwa dya khunda, ndangu kyedika kya Musamu wa Bukheti kyasala yi benu. 6Kaasi kikuma kya babana ba luzitu—kima kyosu kina bákala kweku diswaswanu kwena meni; Tata wetu kisiku yekula batu—babana ba luzitu bayikaku kima kwena meni. 7Kaasi, bámona ni bápheka meni Musamu wa Bukheti kwena bangulungu, bwosu buna bápheka Phetelu kwena bana bákota mukhanda. 8Mukuma wuna wásala muna Phetelu mu kithumwa kwena bana bákota mukhanda, wásala phi muna meni mu kithumwa kwena Baphani. 9Buna básengumuna khenda yina yámphekwa, Yakobi, Phetelu yi Yowani—bana batángama ni makunzi—bátuheka, meni yi Balanabasi, koku dya kithwadi: betu twakwénda kwena Baphani, bawu kwena bana bákota mukhanda. 10Balomba kaka ni twasungimina batsukami—kyawu kima kina yákala yi mupfunu mu kuhanga.
Pholu wutendana Sefwasi ku Atyosi
11Kaasi, buna Phetelu kátula ku Atyosi, yántendana ku mesu mandi, mukuma kenina yi kikalu. 12Mu thwala ya kukwisa kwa batu bahika bana bátuka kwena Yakobi, Phetelu kakala dya yi Baphani; kaasi buna bátula, wáyombuka amana wádihambula, mu bweya bwa bana ba mukhanda. a a v12 «Bana ba mukhanda» — Bakidisitu Bayuta bana básya ngolu ni bakwikidi Baphani bafwani kuyotiswa hanga batambulwa buna bufwanini. 13Bayuta bahika bálanda yandi muna kivungalosi kyaki, hanga kivungalosi kya bawu kyánata ata Balanabasi. 14Kaasi, buna yámona ni bakalaku dyatila mboti mu kyedika kya Musamu wa Bukheti, yázimbwala Phetelu ku thwala ya batu boosu: «Yuka ni ngeyi, wenina Muyuta, wisi zinga bwosu Muphani, kaasi ka bwosu Muyuta ku, abweti wulenda mu kulundika Baphani ndangu bazinga bwosu Bayuta?»
15Betu-betu twenina Bayuta mu mbutukulu, amana ka basumuki ba Baphani ku, 16Kaasi tuzayini ni mutu kakitukaku mutu wa masonga kwena Nzambi mu mihangu mya mitsiku, kaasi mu nzila ya lukwikilu mu Yesu Kidisitu. Betu phi twákwikila mu Kidisitu Yesu, hanga tukituka batu ba masonga mu lukwikilu mu Kidisitu, ka mu mihangu mya mitsiku ku—mukuma mihangu mya mitsiku mikitulaku mutu wosu mutu wa masonga. 17Kaasi, yuka ni, mu kusanda kukituka batu ba masonga mu Kidisitu, betu-betu phi tusololwa ni twenina basumuki, disongidila Kidisitu kenina musadi wa disumu? Bwalendakanaku! 18Mukuma, yuka ni yitúngulula kina yáwulumuna, yisi dongila meni-meni ni yenina mukoli wa mutsiku. 19Mukuma, mu nzila ya mitsiku, yáfwa kwena mitsiku, hanga yázinga kwena Tata wetu. 20Yákomwa ha kitakani hamosi yi Kidisitu. Ka meni ku wisi zinga longa, kaasi Kidisitu wisi zinga muna meni. Luzingu luna yisi zinga buthwena mu kimutu, yisi zinga mu lukwikilu mu Mwana wa Tata wetu, wuna wánzola amana wádihana kikuma kya meni. 21Yilozaku khenda ya Tata wetu; yuka ni masonga makwísa mu nzila ya mitsiku, buna Kidisitu wáfwa mu phamba.
