Kuvutuka ku Mesa ma Kimenga

Kimvwama kyálubula ngyuma hana kati dya bahungi ba Abalami yi ba Loti, yi hakana Abalami wáyambula mwana wa phangi wandi kasola theti. Loti wábonga mbata ya Yolutani yina yákala yi mamba mamboti amana wátambwasa kwena Sotomu. Mu mana másala, Tata wetu wuzimbudi kwena Abalami katala mu bisika byosu: byosu byenina bya mbutu yandi.

Tata wetu kisi zonza mu mavese 14–17

Kapitulu 13.

Abalami wákatuka mu Ngiphiti wenda ku Negebi, yandi, mukhetu wandi, yi bima byandi byosu, amana Loti ha kimosi yi yandi. Amana Abalami wákituka mvwama wambuta mu bibulu, mu phalata, yi mu wolu. Wákatuka ku Negebi wenda ndambu-ndambu yi kuna Beteli, kuna homa hana kati dya Beteli yi Ayi, kwakuna sombolu yandi yákala theti, amana kwakuna katungila theti mesa ma kimenga. Kwakuna Abalami wátela khumbu ya Tata wetu. Amana Loti, wuna wákala kangala yi Abalami, yandi phi kákala yi mameme, yi bangombi, yi masombolu. Tsi yálendaku kubasadisa mu kuzingila ha kimosi; bima byawu byákala byalawu ngolu, hanga balendaku kala ha kimosi. Ngyuma yálubuka hana kati dya bahungi ba Abalami yi bahungi ba Loti. Muna tangwa medina, bisi Kanana yi bisi Pelezi bákala zingila mu tsi. Abalami wuzimbudini Loti: «Tuyúmanaku, meni yi ngeyi, ho bahungi baku yi ba meni, mukuma betu tuyenina baphangi. Keti tsi yosu yenina ku thwala yaku? Ndombele, dihambula yi meni: yuka ni ngeyi wenda ku lumoso, meni yikwenda ku lubakala; yuka ni ngeyi wenda ku lubakala, meni yikwenda ku lumoso.»

Loti wáthuta mesu wumoni ni mbata yosu ya nzadi Yolutani yi kuna Zowali yákala yi mamba mamboti muma mwosu, hanga kilanga kya Tata wetu, hanga tsi ya Ngiphiti. (Byabina byáhita theti, hana Tata wetu katótisaku kedi Sotomu yi Ngomolu.) Loti wásola mbata yosu ya Yolutani kwandi mosi, amana wákatuka wenda ku tsosu; bawu bodi badihambula. Abalami wázingila mu tsi ya Kanana; Loti wázingila mukati dya mbanza za mbata, amana wátula masombolu mandi tii yi kuna Sotomu. Amana batu ba Sotomu bákala ba mbi, bakala sumuka lawu ku thwala ya Tata wetu.

Kunima dya Loti kudihambula yi yandi, Tata wetu wuzimbudini Abalami: «Thuta mesu tuka homa hana wutelamini: ku londi, ku banda, ku tsosu, yi ku ndamba. Mukuma tsi yosu yina wisi mona, yawu yosu yikuheka kwena ngeyi yi kwena bana baku, mvula yi mvula. Yikakitula bana baku hanga fusyangeni dya mafu: yuka ni mutu kalenda tanga fusyangeni dya mafu, buna bana baku phi bafwani bátangama. Telama, kangala mu tsi, mu lengu lwandi yi mu buhange bwandi, mukuma yawu yikuheka kwena ngeyi.»

Abalami wátula masombolu mandi, wenda kala ku miti mya Mamule ku Hebeloni, amana kwakuna wátunga mesa ma kimenga kwena Tata wetu.