Yesu, Mukwa Ngolu za Kuhulula
Mutu mosi wisi kwisa tuka ku Edomu, muna miledi mibukuluka mu menga, bwosu wanika kinyongi kya vinu yandi mosi, konda mutu wa kumusadisa. Buna mbambukulu yikituka ya khenda: Tata wetu wayela phasi mu phasi ya batu bandi, mu kubanata, tii yi básya Kitembu kyandi khondu. Yimana mu kuyuvula ni khenda zandi zayenda kwevi.
Tata wetu kisi zonza mu vese 8
63 1Nani yandu wuna wukwisa tuka ku Edomu, muna miledi mibukuluka mu kabengi tuka ku Bozla, yandu wa lukumu muna miledi myandi, wudiata muna ngolu zandi za mbuta? «Meni, yisamuna masonga, mukwa ngolu za kuhulula.» a a v1 Thumwa Yowani wámona Yesu, wávwata nledi wubukuluka mu menga, wukisi nika kinyongi kya vinu kya khabu za Tata wandi — Lusengumunu 19:11-15.
2Kikuma kya biki miledi myaku mya kabengi, amana miledi myaku mifwanana ni wuna wisi nika kinyongi kya vinu?
3«Yánika kinyongi kya vinu meni mosi, amana hana kati dya batu, ka mutu ku wákala yi meni; yábatolula muna khabu zama amana yábadyatikisa muna khabu zama; menga ma bawu mátyakana ha miledi myama, amana yábukula miledi myama myosu. 4Mukuma kilumbu kya mfundusu kyákala muna mbundu yama, amana mvula ya bana yáhulula yísa. 5Yátala, kaasi ka mutu ku wákala mu kutsadisa; yáyituka mukuma ka mutu ku wátsimbidila; buna koku dyama-meni dyántwadila luhulusu, amana khabu zama zántsimbidila. 6Yábadyatikisa batu muna khabu zama; yábazedisa muna khabu zama, amana yáfweba menga ma bawu ha tsi.»
Yikazímbula Lungongu lwa Tata wetu
7Yikazímbula khenda za Tata wetu, yi lukumu lwandi, bwosu buna byosu bina kátusadila, yi buweti bwa mbuta buna kásongila kikanda kya Kiseledi, bwosu buna kyadi kyandi, bwosu buna khenda zandi za lawu.
8Mukuma wázimbula: «Kyedika, bawu benina batu bama, bana bana bakálaku ba luvunu.» Amana wákituka Muhuludi wa bawu.
9Muna munyanga wa bawu wosu, yandi phi wákala mu munyanga, amana mbambala wa thwala yandi wábahulula; muna lungongu lwandi yi muna kyadi kyandi wábahulula; wábatombula amana wábanata bawu muna bilumbu byosu bya khulu. 10Kaasi bawu báhakuka amana báyukisa kiwayi Kitembu Kyatoma kyandi; buna wábaluka amana wákituka mbeni wa bawu, amana yandi-meni wábanwanisa. 11Buna wáyubuka bilumbu bya khulu, bya Moyize yi bya batu bandi. Kweti wuna wábatombula tuka mu yanga, kumosi yi bakalema ba kibuka kyandi? Kweti wuna wásya Kitembu Kyatoma kyandi hana kati dya bawu, 12wuna wálambula koku dyandi dya khembu ku koku dya lubakala dya Moyize, wuna wákabula mamba ku thwala ya bawu, ndangu kadikitudila khumbu ya mvula yi mvula, 13wuna wábatwadisa muna dingu? Bwosu mpunda muna nganga, bakádilaku kisinza. 14Bwosu bibulu bina bisi tuluka mu beti, Kitembu kya Tata wetu kyábalembisa. Bwabuna ngeyi wátwadisa batu baku, ndangu wudikitudi khumbu ya khembu.
Tala Tuka ku Zilu
15Tala tuka mu mazilu amana mona, tuka mu homa haku hatoma yi ha khembu. Kweti tsambu yaku yi mihangu myaku mya mbuta? Luzolu lwa mbundu yaku yi kyadi kyaku bikikandama kwena meni. 16Mukuma ngeyi wenina Tata wetu, ata Bulahami kátuzayaku, amana Kiseledi kátutambwasaku; ngeyi wenina Tata wetu; Muhuludi wetu tuka mu makula ma khulu, yenina khumbu yaku. 17Kikuma kya biki, A Tata wetu, wutuyambula twahúkumuka mu nzila zaku, amana wuzitika mbundu zetu, hanga tusi monaku woma waku? Vutuka kikuma kya basadi baku, bikanda bya kuvwa kwaku. 18Mu ndambu ya tangwa, batu baku batoma bákala yi kuvwa; bambeni betu badyátadya kikumbu kyaku. 19Tukhituki hanga batu bana ngeyi wubayalaku, hanga batu bana bisi telwaku mu khumbu yaku.
