Kubwa kwa Yelusalemi
Kuzyeta mbanza kumanisa. Luphangu lwazibuka, Zedekiya watina amana wakwatama, watala bana bandi bahondwa, amana wafidingwa mesu yi wakaswa mu miyololu. Mbanza yayokwa ku mbawu amana batsukami basiswa bilanga. Yelemiya wayambulwa mu mitsiku mya Nebukadinezali meni; Tata wetu kisila Ebedi-Meleki moya wandi mu kikuma kyakwikila yandi.
Tata wetu kisi zonza mu mavese 16–18
39 1Muna mvula ya vwa ya kyamvu Zedekiya wa Yuta, muna ngonda ya kumi, Nebukadinezali kyamvu wa Babiloni wakwísa yi basuta bandi boosu mu kunwanisa Yelusalemi amana bázingidila yawu. 2Muna mvula ya kumi yi mosi ya kyamvu Zedekiya, muna ngonda ya zya, mu kilumbu kya vwa kya ngonda, mbanza yátolukwa. 3Amana bazusi boosu ba kyamvu wa Babiloni bakwísa amana bazakala muna Mwelu wa ha kati: Nelingali-Salezeli, Samingali-Nebo, Salisekimi Labi-salisi, Nelingali-Salezeli Labi-magi, yi bazusi bakwawu boosu ba kyamvu wa Babiloni. a a v3 Labi-salisi yi Labi-magi makála mazina ma luzitu ma bazusi bakineni ba kyamvu wa Babiloni. 4Muna bátala Zedekiya kyamvu wa Yuta yi basuta boosu, bátina mu mbanza phipha-phipha, mu nzila ya kilanga kya kyamvu, mu mwelu wuna wenina ha kati dya bibaka byodi; amana wálubuka ku Alaba. 5Kaasi basuta ba Babiloni bábalanda amana bámukwata Zedekiya mu tseki ya Yediko. Bámubonga amana bámunata kwena Nebukadinezali kyamvu wa Babiloni ku Libila mu tsi ya Amati, kuna kámufundisila. 6Kyamvu wa Babiloni wáhonda bana ba Zedekiya ku Libila, ku mesu mandi, amana wáhonda batu ba luzitu boosu ba Yuta. 7Amana wáfidinga mesu ma Zedekiya amana wámukasa mu miyololu mya mbembu ndangu kamunata ku Babiloni.
8Bisi Babiloni báyokisa nzu ya kyamvu yi nzu za batu ku mbawu, amana bámwanga bibaka bya Yelusalemi. 9Nebuzaladani, pfumu wa batsinzidi, wánata mu kinzenza ku Babiloni batu bakwawu bana básala mu mbanza, yi batu bana bádiyekula kwena yandi, yi batu bakwawu bana básala. 10Nebuzaladani, pfumu wa batsinzidi, wásisa batu bahika baphutu, bana bakondaku kuvwa kima, mu tsi ya Yuta, amana wábaheka bilanga bya vinu yi bilanga mu kilumbu mekina.
11Nebukadinezali kyamvu wa Babiloni wáhana muswa mu mana matadidini Yelemiya mu nzila ya Nebuzaladani, pfumu wa batsinzidi, mu kuzimbula: 12«Mubonga amana mukebila; kumuhekaku keti mbi, kaasi hanga mana moosu kalomba.»
13Buna Nebuzaladani, pfumu wa batsinzidi, wáhitika ndinga, kumosi yi Nebushazabani Labi-salisi, Nelingali-Salezeli Labi-magi, yi bazusi bakineni boosu ba kyamvu wa Babiloni. 14Bámubonga Yelemiya mu kyanzala kya batsinzidi amana bámuheka kwena Ngedaliya, mwana wa Ayikami, mwana wa Safani, ndangu kamunata ku nzu. Buna wázinga ha kati dya batu.
15Ndinga ya Tata wetu yakwisa kwena Yelemiya, buna kákala watsinzwa mu kyanzala kya batsinzidi:
16«Wenda zimbula Ebedi-Meleki mwisi Kusi: Bwabu buzimbula Tata, Mukwa ngolu zoosu, Tata wa Kiseledi: Meni ngisa nata ndinga zama mu mbanza yayi mu mbi, ka mu mamboti ku, amana mu kilumbu mekina ndinga zina zalungila ku thwala yaku. 17Kaasi mu kilumbu mekina yakúhulula ngeyi, kazimbudini Tata wetu; ngeyi kuyékulwaku ku moku ma batu bana wisi bweya. 18Yakúhulula ngeyi; kufwaku ku mbedi ya phoku. Luzingu lwaku lwakála lufutu lwaku lwa mvita, mukuma wákwikila mwena meni, kazimbudini Tata wetu.»
