Yelemiya Wukutumuki yi Wuvutukisi Mboti
Bwosu bámuyambula mu miyololu ku Lama kwa pfumu mosi wa batsinzidi wa Babiloni wuna wumuzimbwadi ni kenda kwosu kuma kuna kazola, Yelemiya wánanga yi Gedaliya ku Mizipa. Bana ba Yuteya bana bámwangana bávutuka amana bákesa mboti. Bwosu bámuzimbwadi ni Yisimaeli wisa mu kumuhonda, Gedaliya wakolama mu kukwikila bwawu.
40 1Ndinga yina yátula kwena Yelemiya kutuka kwena Tata wetu, kunima dya Nebuzaladani, pfumu wa batsinzidi, kumutumuna ku Lama, buna kábonga yandi mu miyololu muna kati dya bakangadi boosu ba Yelusalemi yi Yuta bana bákala nata ku Babiloni. 2Pfumu wa batsinzidi wábonga Yelemiya amana wumuzimbwadini: «Nzambi waku wázimbula disa dyadi kikuma kya homa dyadi. a a v2 Ndinga zazi zitukini kwena pfumu wa basuta ba Babiloni, heku kwena mutu wa Nzambi ku; ihana wutedila Pfumu hanga Nzambi wa pfundusu, kaasi heku hanga Tata; kufikama kwabuna kwenina kwena bana ba Nzambi. 3Pfumu Nzambi wásala bwabuna amana wáhanga bwosu kázimbula, mukuma benu boosu lwásumuka kwena Pfumu, amana lwámukolama. Ihana bwabuna bwálubwakila. 4Tala, lelu yikutumuna mu miyololu mina mina hana moku maku. Yuka ni bwenina bukheti mu kwisa yi meni ku Babiloni, wisa - yikukengila. Kaasi yuka wuzodiku, wukwisaku: tsi yosu yenina ku thwala yaku; wenda kwosu kuma kuna kwenina bukheti.» 5Buna Yelemiya kakondi kedi kulubuka, Nebuzaladani wázimbula: «Vutuka kwena Gedaliya mwana wa Ahikami, mwana wa Safani, wuna kinga kya Babiloni kámusya ha thandu ya mbanza za Yuta - zinga yi yandi muna kati dya batu, holo wenda kwosu kuma kuna wisi banza ni bwenina bukheti.» Hanga pfumu wa batsinzidi wámuheka madya yi kabu, amana wámusindika.
6Yelemiya wendi kwena Gedaliya mwana wa Ahikami ku Mizipa, amana wánanga yi yandi muna kati dya batu bana básala mu tsi.
Gedaliya Wukutikisi Ndambu Yisadini
7Buna bapfumu boosu ba basuta bana bákala mu mahata yi batu ba bawu báyuka ni kinga kya Babiloni kámusya Gedaliya mwana wa Ahikami ha thandu ya tsi, amana kámuheka ha moku mandi bayakala, bakhetu yi bana - batsukami ba tsi bana bákalaku nata ku kinzenza ku Babiloni. 8Kwena Gedaliya ku Mizipa bakwísa: Isimayeli mwana wa Netaniya, Yowani yi Yonatani bana ba Kaleya, Selaya mwana wa Tanumeti, bana ba Ephafwasi mwisi Netofa, yi Yezaniya mwana wa mwisi Maaka - bawu yi batu ba bawu. 9Gedaliya mwana wa Ahikami, mwana wa Safani, wázenga ndefi kwena bawu yi kwena batu ba bawu: «Lubwaku bweya mu kusadila batu ba Babiloni. Zingilenu mu tsi, sadilenu kinga kya Babiloni, amana lwakála kwenu mboti. b b v9 Mu ndinga ya kiebeleyo: basi Kalideya — bawu bazonzilama haha kikuma kya bapfumu yi basuta ba Babiloni. 10Meni, yakála ku Mizipa, ndangu yitelama ku thwala ya batu ba Babiloni bana bakwísa kwena betu kikuma kya benu. Kaasi kutikisenu vinu, mbutu za minyanga, yi masi, lumbikenu byawu mu mindungu myenu, amana zingilenu mu mbanza zina lwábonga.»
11Batu ba Yuta boosu bana bákala ku Mowaba, ku Amoni, ku Edomi, yi mu tsi zoosu, bawu phi báyuka ni kinga kya Babiloni kásisa ndambu yisadini mu Yuta, amana kámusya ha thandu ya bawu Gedaliya mwana wa Ahikami, mwana wa Safani. 12Batu ba Yuta boosu bávutuka kutuka kwosu kuma kuna bámwangana, bisa kwena Gedaliya ku Mizipa mu Yuta, amana bákutikisa vinu dya lawu yi mbutu za minyanga za lawu.
13Yowani mwana wa Kaleya yi bapfumu boosu ba basuta bana bákala mu mahata bisa kwena Gedaliya ku Mizipa, 14amana bázimbula: «Wuzayiku ni kinga kya Amoni Baalisi káthuma Isimayeli mwana wa Netaniya hanga kakuhonda?» Kaasi Gedaliya mwana wa Ahikami kákwikilaku mwena bawu.
15Hanga Yowani mwana wa Kaleya wumuzimbwadini Gedaliya ku Mizipa mu kitsweki: «Yambula yihonda Isimayeli mwana wa Netaniya - ka mutu ku kazaya. Kikuma kya mbi wisi kumuyambudila kabonga moya waku amana kamwanga batu ba Yuta boosu bana bákutakana kwena ngeyi, ndangu ndambu yisadini ya Yuta yafwa?»
16Kaasi Gedaliya mwana wa Ahikami wumuzimbwadini Yowani mwana wa Kaleya: «Wusalaku bwabu; wisi huna kikuma kya Isimayeli.»
