Keti Kivuvu Kyenina Kwena Mutu?
Miti wuna wakwángawa wisi mena hika ha wisi bakula mamba, kaasi mutu wisi lala amana kasíkamaku. Yobi wisi dihyula yuka ni bafwa balenda zinga; wisi zola ni Nzambi kámuswámisa tii yi kuna khabu zihita, hanga kambokwa hika, amana wisi zimbula ni Nzambi wisi mana kivuvu bwosu mamba masi dya tadi.
14 1«Mutu, wuna wábutuka kwena mukhetu, bilumbu byandi bya khufi amana wabasa yi phasi. 2Wisi lubuka hanga kifulu amana wisi yumuka; wisi tina hanga kininga amana wisiku zinga. 3Ngeyi wisi hungula mesu maku kwena mutu wa phila yina? Amana wisi kunata mu pfundusu kumosi yi ngeyi? 4Nani walenda totula kima kyasema mu kyakonda sema? Ka mutu ku. 5Mukuma bilumbu byandi byayilama, thalu ya ngonda zandi yenina kwena ngeyi, amana wasya mitsiku mina kalendaku hyoka, 6katula mesu maku kwena yandi, hanga kalembwila, tii yi kuna kamanisa kilumbu kyandi hanga musadi wuna babongi mu kisalu.
7«Mukuma kivuvu kyenina kwena miti: yuka ni wakwángawa, wamena hika, amana mihandi myandi myisiku tota. 8Yuka ni musodi wandi wánanga mimvu mya lawu mu mafu amana kisina kyandi kyafwa mu tsi, 9Ha wisi bakula mamba, wabufula amana wahana mihandi hanga miti wa pha. 10Kaasi mutu wisi fwa amana wisi bwa ha tsi; mutu wisi manisa moya wandi, amana yandi wenina ku biki? 11Bwosu mamba masi disa mu yanga, amana nzadi yisi mana amana yisi yuma, 12bwabuna mutu wisi lala amana wisiku telama; tii yi kuna mazilu masuka, kasíkamaku amana kasíkumunwaku mu kilu kyandi.
13«A kadi wásweka meni mu kalunga, wandiswámisa tii yi kuna khabu zaku zaluta, wasya tangwa diyilama kwena meni, amana wandibámba! 14Yuka ni mutu wafwa, kakála moya hika? Bilumbu byosu bya kisalu kyama kya phasi, yihingila, tii yi kuna lufutumuku lwama lwakwísa. 15Ngeyi watéla, amana meni yikuvútula; ngeyi wazóla kisalu kya moku maku. 16Mukuma muna tangwa dina watánga bitambi byama; wakebaku disumu dyama. 17Kulemvuka kwama kwazyámikwa mu dikuta, amana ngeyi wafídinga disumu dyama.
18«Kaasi bwosu mongu wisi bwa amana wisi bukumuka, amana tadi dyisi katuka mu homa handi, 19bwosu mamba masi fwasa matadi amana mamba ma kizalu masi katula mafu ma tsi, bwabuna ngeyi wisi fwasa kivuvu kya mutu. 20Ngeyi wisi munungina mvula yi mvula, amana yandi wisi luta; wisi kasa mbunzu wandi amana wisi mukukwasa. 21Bana bandi bisi kituka ba luzitu, amana yandi kázayaku dyawu; bisi kúlumunwa, amana yandi kábakulaku. 22Yandi wisi mona kaka phasi ya lutu lwandi, amana wisi dila kaka kikuma kya yandi meni.»
