Yesu wátela balonguki bandi ba theti
Phetelu wáloba phipha yosu konda kukwata kima, kunima mu ndinga ya Yesu wákwata lawu hamingi tii yi wámulomba ni kakatuka. Mutu wena yi mbefu ya lutu wásimbwa. Mutu wafwa nitu wákululwa mu mutu wa nzu amana wálolukwa mu ngolu ya Tata wetu, kyokyafuemisa balongi ba mukanda. Lefi wásisa kifulu kya phaku dyandi.
5 1Kilumbu kimosi, bwosu mulumba-lumba wa batu wakála mufitikisaka Yesu tselu yi tselu hanga bayuka Ndinga ya Tata wetu, Yesu wátelama bela-bela yi yanga dya Ngenezaleti. a a v1 Yanga dya Ngenezaleti dyenina khumbu yikwawu ya yanga dya Ngadidi. 2Wámona midimba myodi mina myátelama bela-bela yi yanga; balobi básula myo amana bákala sukula mawanda ma bawu. 3Wákota mu mudimba wumosi, wuna wa Simoni, amana wámulomba ni kábwesuka koma yi tseki. Kunima, wázakala amana wálonga milumba-lumba mya batu tuka mu mudimba.
4Kunima dya kumanisa kuzonza, wuzimbudi kwena Simoni: «Bwesuka ku mamba ma nda amana wakulumuna mawanda maku kikuma kya kulobila.»
5Simoni wávutula: «Pfumu, tusadi kisalu phipha yosu amana tukwataku kima. Kaasi mu ndinga yaku, kakúlumuna mawanda.» 6Bwosu báhanga bwabu, bákwata batsema ba lawu hanga mawanda ma bawu máyandika kuyatuka. 7Báheka dimbu kwena bakundi ba bawu bana bakála mu mudimba wukwawu ni bakwisa basadisa; bakwísa amana bázadisa midimba myodi myosu hanga myáyandika kutika. 8Bwosu kámona bwabuna, Simoni Phetelu wábwa ha makungulu ma Yesu amana wuzimbudi: «Katuka kwena meni, Pfumu, mukuma yenina musumuki!» 9Mukuma kuyituka kwa lawu kwámukwata yandi yi boosu bana bakála yi yandi kikuma kya batsema ba lawu bana bakwata,
10bwabu phi Zyaki yi Yowani, bana ba Zebeteya, bakundi ba Simoni. Yesu wuzimbudi kwena Simoni: «Kuyukaku bweya; tuka bwabu kaukwata batu.»
11Buna bálubula midimba mya bawu ku tseki, básula byosu, amana bámulanda.
Yesu wásemisa mutu wumosi
12Bwosu Yesu kákala mu mbanza yimosi, kwákala yi mutu wumosi wuna wákala yi mbefu ya mbi ha lutu lwandi. Bwosu kámona Yesu, wábwa yi zizi ha tsi amana wámubokwadila: «Pfumu, yuka ni wuzodi, wulenda kusemisa meni.»
13Yesu wáyuna koku dyandi, wámuthetika: «Meni yizodi. Sema.» Muna mbala mosi, mbefu ya lutu yámukatuka.
14Yesu wámukanikina ni kazimbulaku dyambu kwena mutu: «kaasi ndawenda disongila kwena nganga Nzambi amana tambika mana Moyize kálonga kikuma kya kudisemisa kwaku, kyakála kimbangi kikuma kya batu.»
15Kaasi musamu wandi wámwangana kuluta; mulumba-lumba wa batu ba lawu wákutakana ndangu bayuka yandi amana babeluka ku bimbefu bya bawu. 16Kaasi Yesu kakala kwenda ku phungamu mu mbala za lawu amana kakala lombila.
Ngolu ya Tata mu kuloluka masumu
17Kilumbu kimosi, bwosu kakala longa, Bafwadisi yi balongi ba mitsiku bázakala, bawu bana bátuka mu mahata moosu ma Ngadidi, yi mu Yuteya yi ku Yelusalemi. Amana ngolu ya Tata wetu yákala hakana ndangu kabelula bambefu. 18Muna tangwa medina, bayakala bísa banata mutu wumosi wa kiwokoku ha kiphoyu, bakala sosa mu kumukotisa amana mu kumusya ku mesu ma Yesu. 19Bwosu bámonaku nzila mu kukota kikuma kya mulumba-lumba wa batu, bazanza hana mudilu wa nzu amana bákulumuna yandi ha kiphoyu kyandi mu kati dya mudilu, mu kati-kati, ku mesu ma Yesu.
20Bwosu Yesu kámona lukwikilu lwa bawu, wuzimbudi: «Nduku, masumu maku maloluki.»
21Balongi ba mitsiku yi Bafwadisi báyandika kutendana: «Nati kenina mutu yandu wutukwana Nzambi? Nati wulenda kuloluka masumu, kaasi Nzambi yandi mosi?»
22Bwosu Yesu kázaya mana bakala banza, wubavutwadi: «Kikuma kya biki lwenina mu kudizonzila mu mbundu zenu? 23Dyambu dyakonda phasi, kweti dyadi: mu kuzimbula “Masumu maku maloluki kwaku,” ho mu kuzimbula “Telama amana kangala”? 24Kaasi hanga luzaya ni Mwana wa mutu wenina yi hamu ha tsi mu kuloluka masumu» — wuzimbudi kwena kiwokoku — «Yikuzimbwala, telama, bonga kiphoyu kyaku amana ndawenda ku nzu yaku.»
25Muna mbala mosi, wátelama ku mesu ma bawu, wábonga kiphoyu kyandi, wénda ku nzu yandi mu kuzatula Tata wetu. 26Kuyituka kwábakwata boosu; báyandika kuzatula Tata wetu, bweya bwábazala, bazimbula: «Tumoni mambu ma khumbwa mu kilumbu kyaki.»
Yesu wátela Lefi
27Kunima dya mambu mama, Yesu wálubuka amana wámona kalaki ka phaku wumosi, khumbu yandi Lefi, wazakala hana homa ha kufutisila phaku. Wuzimbudi: «Ndanda!»
28Buna Lefi wátelama, wásisa byosu, amana wámulanda. 29Amana Lefi wáta mukinzi wa mbuta kikuma kya Yesu ku nzu yandi, amana mulumba-lumba wa batu ba lawu, bakalaki ka phaku yi batu bahika, bazakala ku mesa hakimosi yi bawu. 30Kaasi Bafwadisi yi balongi ba mitsiku ba bawu bábokuta kwena balonguki bandi: «Kikuma kya biki lwenina dila yi kunwa yi bakalaki ka phaku yi basumuki?»
31Yesu wubavutwadi: «Batu ba kola mu lutu bisi vwaku mupfunu wa munganga; kaasi bambefu kaka bawu bena yi mupfunu wandi. 32Yísaku tela batu ba masonga, kaasi basumuki ndangu basoba bikalulu.»
Kyufu kya kuzila madya
33Bawu bazimbudi kwena yandi: «Balonguki ba Yowani bisi zila madya mu mbala za lawu amana bisi lombila, bwabu phi balonguki ba Bafwadisi, kaasi ba ngeyi bisi dila yi kunwa.»
34Yesu wuzimbudi: «Lulenda kusya ni bakundi ba mukwedi bazila madya bwosu kenina yi bawu? 35Kaasi bilumbu byakwísa bina bakatula mukwedi kwena bawu, buna, muna bilumbu bina, bazíla madya.»
36Wubazimbudila kingana phi: «Ka mutu ku wisi zenga sengi dya muledi wa pha amana walonda dyo yi muledi wakhulu. Kondilo, wayáta muledi wa pha, amana sengi dya pha difwánanaku yi muledi wakhulu. 37Ka mutu ku wisi longulula vinu dya pha mu bilungu bya khulu; kondilo vinu dya pha dyabúla bilungu, dyatyakana, amana bilungu byazangana. 38Nana, vinu dya pha difwana kulongululwa mu bilungu bya pha. 39Amana ka mutu ku, kunima dya kunwa vinu dya khulu, wisi zola dya pha, mukuma kazimbula: “Dya khulu dyenina dya mboti.”»
