Luka 9 FHB Father's Heart Bible™

9 ¹Yesu wátedisa kumi yi bodi, wábaheka ngolu yi luyalu ha thandu ya bitembu bya mbi byosu, amana mu kubelula maladi. ²Amana wábatuma mu kusamuna Kipfumu kya Tata wetu amana mu kubelula bambefu.

³Yesu wuzimbudi kwena bawu: «Lunataku kima mu nzila: keti koka, keti waba, keti dipha, keti phalata, amana lunataku bikutu byodi. ⁴Nzu yosu lwakota, luzakala muna, amana ku meni luna kalubukila. ⁵Amana kuna batu bakonda kuluyamba, mu kukatuka mu mbanza yina, khukumunenu fusyangeni dya bitambi byenu: kyakála kimbangi kikuma kya bawu.»

⁶Buna bákatuka amana bakala kwenda mu mahata yi mahata, bakala samuna Musamu wa Mboti amana bakala belula kwosu-kwosu.

⁷Wáyuka Eloti, wuna wákala mosi wa bakyamvu baya, mambu moosu mana mábina, amana mabanza mámuvwalangana, mukuma bamosi bakala zimbula ni Yowani wufutumukini mu bafwa, ⁸bahika ni Diya wámonika, amana bahika hika ni mosi wa bambikudi ba khulu wáfutumuka. ⁹Eloti wuzimbudi: «Meni yibukwasa Yowani mutwa. Buna nani yandi wuna, wuna yisi yuka mambu ma bwabuna?» Amana kakala sosa mu kumona.

Mapha Matanu Mádisa Batu Mili Tanu

¹⁰Kunima dya kuvutuka kwa bathumwa, bázimbula kwena Yesu mambu moosu mana báhanga. Yesu wábabonga amana wábakatula ku phungamu, ku mbanza yimosi yina bisi tela Betisayita. ¹¹Kaasi mulumba-lumba wa batu wázaya amana wámulanda. Yesu wábayamba, wábazonzila Kipfumu kya Tata wetu, amana wábelula bana bákala yi mupfunu. ¹²Buna tangwa dyayandika kufwa, kumi yi bodi bísa kwena yandi, bazimbula: «Vutula mulumba-lumba wa batu, hanga bawana kunanga yi madya mu mahata yi mu mazunga mana matuzyedi — betu twenina mu tseki kwakuku.»

¹³Yesu wuzimbudi: «Benu bahekenu bima bya kudya.» Bawu bazimbula: «Twenina kaka yi mapha matanu yi batsema bodi — ho ni twenda sumba madya kikuma kya mulumba-lumba wa batu wosu.»

¹⁴Mukuma bayakala bakala tukidila mili tanu. Yesu wuzimbudi kwena balonguki bandi: «Luzakadisa bawu mu bibuka, kosu kibuka tukidila makumatanu.»

¹⁵Báhanga bwabuna, amana bázakadisa batu boosu. ¹⁶Yesu wábonga mapha matanu yi batsema bodi, wázanza mesu ku zilu, wásakumuna amana wábukuna, kunima wákala baheka kwena balonguki ndangu bakabisila mulumba-lumba wa batu. ¹⁷Boosu bádya amana báyukuta; bitini bina byásala byázadisa bitunga kumi yi byodi.

Nani Lwisi Zimbula ni Meni?

¹⁸Kilumbu kimosi, bwosu Yesu kakala lombila yandi hika, yi balonguki bandi bela-bela, wábahyula: «Mulumba-lumba wa batu wisi zimbula ni meni nani?»

¹⁹Bawu bávutula: «Yowani Mbotika. Bahika bazimbula ni Diya. Bahika hika ni mbikudi mosi wa khulu wáfutumuka.»

²⁰Yandi wábahyula: «Kaasi benu, lwisi zimbula ni meni nani?» Phetelu wávutula: «Kidisitu wa Tata wetu.» ^a a v20 Tangwa Phetelu kabokila Yesu «Kidisitu wa Tata wetu», wisi zimbula kimbangi ni Yesu kenina wuna wásyangama mafuta, watumwa kwena Tata — Mwana wuna kenina kaka mukhambu wa Tata wuna wámutuma.

Mwana wa Mutu Kafweti Mona Mpasi

²¹Yesu wátoma kubakandisa, wábabwisisa ndangu bazimbulaku dyambu dina kwena mutu,

²²wuzimbudi: «Mwana wa mutu kafweti mona mpasi za lawu, amana kaloswa kwena bambuta, bambuta ba banganga Nzambi yi basoniki, amana kahondwa, buna mu kilumbu kya ntatu kafutumuka.»

²³Amana wuzimbudi kwena bawu boosu: «Wosu wuna wazola kwisa ha nima yama kafweti kudibusa yandi-meni, kabonga kuluunsi kwandi kosu kilumbu amana kandanda. ²⁴Mukuma wosu wuna wazola kuhulula luzingu lwandi kaluzimbisa, kaasi wosu wuna wazimbisa luzingu lwandi kikuma kya meni kaluhulula. ²⁵Mukuma, yuka ni mutu kavwa tsi yosu, kaasi kazimbisa keti katotisa yandi-meni, khi mupfunu kena kwena yandi? ²⁶Wosu wuna wisi mona nsoni kikuma kya meni yi kikuma kya mambu mama, Mwana wa mutu phi kamona nsoni kikuma kyandi, tangwa kakwísa mu khembu yandi-meni yi mu khembu ya Tata yi ya banzyo batoma. ²⁷Kaasi kyedika yiluzimbwadini: bamosi bana batelama kwaku bamonaku lufwa, ku thwala ya kumona Kipfumu kya Tata wetu.»

Tata Wisi Khembisa Mwana Wandi

²⁸Kunima dya mambu mana, tukidila bilumbu nana, Yesu wábonga Phetelu, Yowani yi Yakobi, amana wázanza yi bawu ku mongu mu kulombila. ²⁹Bwosu kakala lombila, kifwani kya mbunzu yandi kyáhiluka, amana miledi myandi myákala kedyamina mu phembi. ³⁰Amana batu bodi bakala zonza yi yandi — Moyize yi Diya, ³¹bana bámonika mu khembu, bakala zonza kikuma kya kukatuka kwandi, kuna kakala zodi kulungisa ku Yelusalemi.

³²Phetelu yi bana bákala yi yandi bakala yi bizitu bya tulu; bwosu bátokama mboti-mboti, bámona khembu yandi yi batu bodi bana batelama yi yandi. ³³Bwosu bakala katuka kwena yandi, Phetelu wázonza kwena Yesu: «Mulongi, bwena mboti betu twenina kwaku. Tutungenu masombolu matatu: dimosi kwena ngeyi, dimosi kwena Moyize, dimosi kwena Diya.» Kaasi kázayaku biki kakala zimbula.

³⁴Bwosu kakala zonza, dituti dyakwísa amana dyábafukidila mu kiidi; bwosu bákota muna, bawu bakala mona bweya.

³⁵Ndinga yituka mu dituti yázimbula: «Wuna meni Mwana wama, Musodulu wama — luhinikina yandi!» ^b b v35 Muna tangwa dya kuhiluka kwa Yesu, ndinga ya Tata yandi-meni yábokila Yesu khumbu «Mwana wama, Musodulu wama» — Mwana wuna wawu kaka Tata wisi yangalala muna, wuna buthwena wásongama mu khembu.

³⁶Buna ndinga yámanisa, Yesu wásala yandi hika. Bawu bádibata, bazimbulaku kwena mutu, muna bilumbu bina, mana bámona.

Mwana wa Tata Walubulwa mu Phipha

³⁷Kilumbu kyalanda, buna bákulumuka mu mongu, mulumba-lumba wa batu wa lawu wámufindana. ³⁸Mutu mosi wa mu mulumba-lumba wa batu wákalunga: «Mulongi, yikubokwadidi, tala mwana wama, mukuma yandi mwana wama mosi kaka. ³⁹Kitembu kisi mukwata, amana mu kithulumukina wisi boka; kyisi munikisa ngolu tee kalubuka mafulu-fulu, amana kisiku muyambula kwandi, kisi munyokuna. ⁴⁰Yibabokwadidiki balonguki baku mu kukwasa kitembu kina, kaasi balendaku.»

⁴¹Yesu wuvutudini: «Mbandu yakonda lukwikilu yi yavwalangana! Yi kuna khi tangwa yikádiki yi benu amana yilútambwasiki? Natina mwana waku kwaku.»

⁴²Bwosu mwana kákala kwisa, kitembu kya mbi kyámulemba ha tsi amana kyámunikisa ngolu. Kaasi Yesu wakayakya kitembu kya mbi, wábelula mwana, amana wámuvutula kwena tata wandi.

Mwana wa Mutu Kalámbulama

⁴³Boosu báyituka kikuma kya khembu ya Tata wetu. Bwosu boosu bákala yituka kikuma kya byosu bina Yesu kahánga, wázimbula kwena balonguki bandi:

⁴⁴«Lulumbika mambu mama mu matu menu: Mwana wa mutu kalámbulama mu moku ma batu.»

⁴⁵Kaasi bázayaku ndinga yina, yakala yiswekama kwena bawu ndangu bálendaku sudika; amana bákala yi bweya bwa kumuhyula kikuma kyaki.

⁴⁶Amana tendu dyátelama hana kati dya bawu, kikuma kya kuzaya nani hana kati dya bawu wena mbuta kuluta. ⁴⁷Kaasi Yesu, bwosu kázaya mabanza ma mbundu za bawu, wábonga mwana amana wámutelamisa bela-bela yi yandi,

⁴⁸amana wázimbula kwena bawu: «Wosu wuna watámbula mwana wawu mu khumbu yama, meni katámbula; amana wuna watámbula meni, watámbula wuna wáthuma. Mukuma wuna wena kineni hana kati dya benu boosu, yandi wena mbuta.»

⁴⁹Yowani wázimbula: «Mulongi, twamonini mutu mosi wisi kukwasa bitembu bya mbi mu khumbu yaku, amana tusandikini mu kumukandisa, kikuma kisiku landa yi betu.»

⁵⁰«Lumukandikaku,» Yesu wumuzimbwadi, «mukuma wuna kalubedisaku, yandi wena kikuma kya benu.»

Yesu Wásia Mbundu mu Kwenda ku Yelusalemi

⁵¹Muna tangwa bilumbu byabwesuka bya kumuzanza ku zilu, Yesu wásya mbundu yandi mu kwenda ku Yelusalemi. ⁵²Wátuma bambambala ku thwala yandi. Bawu benda amana bákota mu hata dya bisi Samadiya hanga bamukubikila, ⁵³kaasi batu ba kwakuna bámuyambaku, mukuma kakala kwenda ku Yelusalemi. ⁵⁴Bwosu bámona bwabuna, balonguki Yakobi yi Yowani bázimbula: «Pfumu, wuzodi ni twatela mbawu yikulumuka tuka ku zilu ndangu yibayoka?»

⁵⁵Kaasi wábaluka amana wábakaya. ⁵⁶Amana benda ku hata dikwawu.

Ntalu ya Kulanda Yesu

⁵⁷Bwosu bákala kwenda muna nzila, mutu mosi wumuzimbwadi: «Yikúlanda kwosu kuma wukwenda.»

⁵⁸Yesu wumuvutudi: «Banuni ba zilu benina yi mazamba, mikengi myenina yi binzenzi, kaasi Mwana wa mutu keku homa ya kuzenzika mutwa wandi.»

⁵⁹Kwena mukwawu wuzimbudi: «Ndanda.» Yandi wuvutudini: «Pfumu, yambula theti ndenda kuzika tata wama.»

⁶⁰Kaasi Yesu wumuzimbwadi: «Yambula bamvumbi bazika bamvumbi ba bawu, kaasi ngeyi, kwenda samuna Kipfumu kya Tata wetu.»

⁶¹Mukwawu phi wuzimbudi: «Yikúlanda, Pfumu, kaasi pheka nzila theti ya kuheka mboti ya tsuka kwena bana benina ku nzu yama.»

⁶²Yesu wuvutudini: «Wosu wuna wusidi koku mu kubundula amana watála ku nima, kafwaniku mu Kipfumu kya Tata wetu.»