Malaku 15 FHB Father's Heart Bible™

15 ¹Muna suka, bambuta ba banganga Nzambi, bambuta ba batu, balongi ba mitsiku yi kimvuka kyosu básala lukutakanu hakimosi; bákanga Yesu, bámunata amana bámulambula kwena Philatu.

²Philatu wumuhyudini: «Ngeyi wenina kyamvu wa Bayuta?» Yesu wávutula: «Ngeyi wuzimbudi bwabuna.»

³Bambuta ba banganga Nzambi bakala mufunda mu mambu malawu. ⁴Buna Philatu wumuhyudini hika: «Kuvutudiku keti kima? Tala buna mambu malawu babati kufundila.»

⁵Kaasi Yesu kázonzaku hika keti kima, amana Philatu wáyituka.

⁶Muna mukinzi, Philatu wisi sula mutu mosi wa boloku kwena bawu, wosu wuna bakala lomba. ⁷Mutu mosi khumbu yandi Balabasi wákala mu boloku kumosi yi batu bana bátombula, bana báhonda mutu muna ntombudulu. ⁸Mulumba-lumba wa batu wákwisa amana wáyandika kulomba kwena Philatu ndangu kábasadila bwosu kisi sadilaka kosu mbala. ⁹Philatu wávutula: «Luzolele ni yisula kwena benu kyamvu wa Bayuta?» ¹⁰Mukuma kakala zaya ni mu kikuma kya kiphala bambuta ba banganga Nzambi bámulambula. ¹¹Kaasi bambuta ba banganga Nzambi bálundika mulumba-lumba wa batu ndangu kabasulila Balabasi. ¹²Philatu wábahyula hika: «Buna luzolele ni yihanga khi mu mutu wuna lwisi tela kyamvu wa Bayuta?»

¹³Bawu bákalunga: «Bamukhoka ha kitakani!»

¹⁴Philatu wubahyudi: «Kikuma kya khi? Mbi khi kasadi?» Kaasi bawu bákalunga ngolu kuluta: «Bamukhoka ha kitakani!»

¹⁵Hanga Philatu, ndangu kalungisa luzolu lwa mulumba-lumba wa batu, wábasulila Balabasi. Amana wutumi ni bazyatula Yesu mafimbu, kunima wámulambula ndangu bamukhoka ha kitakani.

Baphumbulu baseya Kyamvu

¹⁶Baphumbulu bámunata Yesu muna nzu ya pfumu, disongidila muna nganda ya kilolu, amana bákhundikisa kibuka kyosu kya baphumbulu. ¹⁷Bámuvwatisa muzaka wa kabengi, bátunga mukhonzi wa tsaku amana bámuvwatisaya kuna mutwa. ¹⁸Amana báyandika kumuheka mboti: «Mboti, kyamvu wa Bayuta!» ¹⁹Bakala muzyatula muna mutwa ni koka, bakala muhuma metya, amana bakala fukama ku thwala yandi mu kingana. ²⁰Kunima dya kumuseya, bámuwomuna muzaka wa kabengi, bámuvwatisa hika miledi myandi, amana bámunata kuna nganda ndangu benda mukhoka ha kitakani.

Bakhoka Mwana ha kitakani

²¹Bálundika mutu mosi wákala luta, wátuka ku mahata, disongidila Simoni mwisi Sileni, tata wa Alekizandi yi Difusi, ndangu kanata kitakani kyandi. ²²Bámunata Yesu homa hana bisi tela Ngolungota, disongidila «Kizika kya Kibelengenzi kya mutwa.» ²³Bámuheka vinu dya kubundikisa yi mila, kaasi katámbulaku.

²⁴Bámukhoka ha kitakani. Amana básanzana miledi myandi mu kati dya bawu, mu kubetila zeki ndangu bazaya keti mutu mutu watámbula khi. ²⁵Kyákala tangwa dya vwa dya mene buna bámukhoka ha kitakani. ²⁶Masonama ma mfundu wandi mákala: «KYAMVU WA BAYUTA.» ²⁷Bámukhoka ha kitakani kumosi yi batu bodi bana bátombula, mosi ku koku dya kitata, mukwawu ku koku dya kimama. ^a a v27 Mikanda mya theti kuluta myena yi fundu dya 28 haku; mikanda mya kunima mibuti buta: «Buna Masonuku málungidila mana mazimbula: “Báyika yandi kumosi yi bavangi ba mbi.”»

²⁹Bana bákala luta bakala mutukwana yi kunikisaka mutwa mya bawu, mu kuzimbula: «Haa! Ngeyi wisi bula nzu ya Nzambi amana wisi yitunga mu bilumbu bitatu, ³⁰dihulula amana kulumuka ha kitakani!»

³¹Phila mosi phi, bambuta ba banganga Nzambi yi balongi ba mitsiku bakala museya bawu yi bawu: «Batu bahika kahulula, kaasi yandi meni kalenda kudihulula. ³²Bika Kidisitu, kyamvu kya Iseledi, kakulumuka ha kitakani bwabu, ndangu tumona amana tukwikila.» Amana batu bana bákhoka kumosi yi yandi phi bakala mutukwana.

Mwana wa Tata wátabula moya

³³Muna tangwa dya tsinzi, phipha yábwa mu tsi yosu tii yi kuna tangwa dya tatu dya masikidika.

³⁴Muna tangwa dya tatu dya masikidika, Yesu wákalunga mu ndinga ya ngolu: «Eloyi, Eloyi, lema sabakatani?» Disongidila: «Nzambi wama, Nzambi wama, kikuma kya biki wungyambwadidi?»

³⁵Buna ndambu ya batu bana bátelama hakana báwa bwabuna, bázimbula: «Wa, kabati tela Eliya.»

³⁶Mosi wenda thinu, wábonga vuya, wávundika mu vinu dya ngani, wázitika kuna tsongi ya muswangina, amana wámuheka ndangu kanwa. Wuzimbudi: «Bika yandi, tutala keti Eliya kakwísa mukulumuna.»

³⁷Yesu wákalunga mu ndinga ya ngolu amana wátabula moya. ³⁸Amana muledi wa nzu ya Nzambi wáyatuka byati byodi, tukidila ku londi tii yi kuna banda. ³⁹Pfumu wa baphumbulu wuna wátelama ku thwala ya Yesu, buna wámona buna kátabula moya, wuzimbudi: «Kyedika, mutu yandu wákala Mwana wa Nzambi.»

⁴⁰Bakhetu phi bakala tala tuka ku thama, muna kati dya bawu Madiya mwisi Makatala, Madiya ngudi wa Zyaki wa muleki yi Zoze, yi Salomeyi. ⁴¹Bakhetu bana bakala mulanda buna kákala ku Ngadidi amana bakala musadila; bakwawu balawu bana bakwísa kumosi yi yandi ku Yelusalemi phi bákala hakana.

Kusikula Yesu mu Mazyamu

⁴²Masikidika ha mábwa. Amana bwosu kyákala kilumbu kya kuyilama, disongidila kilumbu ku thwala ya sabata. ⁴³Yozefu, mwisi Adimate, mbuta wa kimvuka, wuna yandi meni kakala hingila Kipfumu kya Tata wetu, wányota kwenda kwena Philatu amana lomba lutu lwa Yesu. ⁴⁴Philatu wáyituka ni Yesu kafwa kedi. Hanga wátedisa pfumu wa baphumbulu amana wámuhyula yuka ni thama kafwidila Yesu. ⁴⁵Kunima dya kuzaya kwena pfumu wa baphumbulu ni bwabuna bwákala, wáheka lutu lwa Yesu kwena Yozefu. ⁴⁶Yozefu wásumba muledi, wákatula lutu lwa Yesu, wázingaya mu muledi meni, amana wásikula lutu muna mazyamu mana básima muna ditadi. Hanga wábundumuna tadi ku mwelu wa mazyamu. ⁴⁷Madiya mwisi Makatala yi Madiya wuna wákala ngudi wa Zoze bámona homa básikula lutu lwandi.