Ditesa Ngeyi-Meni Theti
Katula theti mudikita miti wenina mu disu dyaku-meni, buna wamona wanga mu kukatula kitswala kyenina mu disu dya phangi waku. Lomba, buna bakúheka. Fundisa balongi mu mbutu ya bawu. Amana mambu ma phasi: kuzimbula «Pfumu, Pfumu» amana kuhanga biphadi, kufwananaku yi kuhanga luzolu lwa Tata wetu.
7 1«Lufundisaku, hanga balúfundisaku benu phi. 2Mukuma, muna pfundusu yina lwisi fundisila, bakálufundisa benu phi; amana muna kitesu kina lwisi tesila, bakálutesa benu phi. 3Kikuma kya biki wisi tadila kitswala kyenina mu disu dya phangi waku, amana wubatiku mona mudikita miti wenina mu disu dyaku-meni? 4Kondilo, mu khi mutindu walenda kamba phangi waku: «Yambula ndakatula kitswala kina mu disu dyaku», buna mudikita miti wenina mu disu dyaku meni? 5Kavungalosi, katula theti mudikita miti wenina mu disu dyaku-meni; buna wamona wanga mu kukatula kitswala kyenina mu disu dya phangi waku.
6«Luhanaku kwena bambwa kima kyatoma, amana lulosaku misanga menu ku thwala ya bangulu; mukuma mina bakámidyatikisa ha tsi, buna bakábaluka amana bakáluyata benu.
Tata Kisi Hana Kwena Bana Bisi Lomba
7«Lombenu benu, balúheka; sandenu benu, lwaséngumuna; khokwatilenu benu, balúyafwadila. 8Mukuma kosu mutu wuna wisi lomba, kisi tambula; wuna wisi sanda, kisi finda; amana kwena wuna wisi khokwatila, mwelu bayámukangwala. 9Kondilo, khi mutu mu kati dya benu, yuka ni mwana wandi kamulomba mapha, buna kamuheka tadi? 10Kondilo, yuka kamulomba tsema, buna kamuheka nyoka? 11Buna, yuka ni benu, bwosu lwenina batu ba mbi, luzayi kuhana bana benu makabu ma mboti, khi lawu kwena Tata wenu wenina mu mazilu, yandi kahana bima bya mboti kwena bana bisi mulomba!
12«Buna, mu mambu moosu, hangenu kwena batu bwosu luzodini ni bawu bahanga benu; mukuma yayi yenina Mutsiku yi Bambikudi.
13«Kotenu mu mwelu wafitakana; mukuma mwelu wenina wanene, nzila yenina yanda, yina yisi nata ku kuzangana, amana balawu bisi kotila muna yawu. 14Kaasi mwelu wenina wafitakana, nzila yenina yafitakana, yina yisi nata ku luzingu; kaasi batu ba khunda bana bisi yisengumuna.
Bazayila Ku Bibundu bya Bawu
15«Dikengenu yi bambikudi ba luvunu; bisi kwisa kwena benu mu miledi mya mikoku, kaasi mu kati benina bambwa-ngongu ba nganzi. 16Muna bibundu bya bawu, lukábazaya benu. Kweti bibundu bya vinu bisi hela mu minzumbila, kondilo bibundu bya fiki mu kisoma? 17Kitesu kimosi, miti wosu wamboti wisi ha bibundu bya mboti, kaasi miti wambi wisi ha bibundu bya mbi. 18Miti wamboti wulendaku ha bibundu bya mbi, mutindu mosi yi miti wambi wulendaku ha bibundu bya mboti. 19Miti wosu wuna wisiku ha bibundu bya mboti, bisi wukwanga amana bisi wutimbula muna mbawu. 20Buna, muna bibundu bya bawu, lukábazaya benu.
Kaka Bana Bisi Hanga Luzolu lwa Tata
21«Ka batu boosu ku bana bisi thedila: «Pfumu, Pfumu», bakwisa kota mu Kipfumu kya Tata wetu; kaasi kaka wuna wisi hanga luzolu lwa Tata wama wenina mu mazilu. 22Balawu bakwisa zimbula kwena meni muna tangwa dina: «Pfumu, Pfumu, kweti ka mu khumbu yaku ku twábikula, amana mu khumbu yaku twákukwasa bitembu bya mbi, amana mu khumbu yaku twásala biphadi bya lawu?» 23Buna yikábazimbwala wengele: «Ka yáluzaya benu nkutu ku; katukenu kwena meni, benu bakuludi ba mutsiku!»
Tunga Ha Thandu ya Ditadi
24«Buna, wosu wuna wisi yuka ndaka zama zazi amana wisi zihanga, kafwánana yi mutu wa ngangu, wuna wátunga nzu yandi ha thandu ya ditadi. 25Mvula yánoka, mamba mákwisa, pfunzi zátuka amana zábeta nzu yina, kaasi yábwaku, mukuma yátungama ha thandu ya ditadi. 26Amana wosu wuna wisi yuka ndaka zama zazi, kaasi wisiku zihanga, kafwánana yi mutu wukondi ngangu, wuna wátunga nzu yandi ha thandu ya tsekengi. 27Mvula yánoka, mamba mákwisa, pfunzi zátuka amana zábula nzu yina, amana yábwa; amana kubwa kwandi kwákala kwanene.»
28Kunima dya Yesu kumana zimbula ndaka zazi, milumba-lumba mya batu báyituka ku malongi mandi, 29mukuma kakala balonga hanga mutu wuna wakala yi hamu, amana ka hanga balongi ba mitsiku ba bawu ku.
