Hana hakondi nzayikusu ya Nzambi
Kikuma kya bapfumu, khabu yi bana. Tangwa batu ba masonga bisi kituka ba lawu, batu bisi sangwala, kaasi tangwa batu ba mbi bisi yala, batu bisi humwakina. Zoba wisi losa khabu zandi zoosu, amana mutu wa kuzawuka mu kuzonza kenina wa mbi kuluta zoba. Kuna kukondi lusongulu lwa Nzambi, batu bisi kangala konda nsiku.
29 1Mutu wuna bisi mubeta mbala mu mbala kaasi kazodiku kuyukila, katóluka mu kithulumukina, konda kubeluka. 2Tangwa batu ba masonga bisi kituka ba lawu, batu bisi sangwala, kaasi tangwa batu ba mbi bisi yala, batu bisi humwakina. 3Yakala dina disi zola ngangu disi hana kyesi kwena tata wandi, kaasi nduku wa bandumba disi fwasa kimvwama kyandi. 4Mu masonga kinga kisi kitula tsi mu kukwámina, kaasi mutu wuna wa lukusu lwa makabu ma kitsweki wisi zanga tsi. 5Yakala dina disi kembisa nduku wandi disi timbula wanda ha bitambi byandi. 6Mutu wa mbi wisi bwila mu mutambu wa disumu dyandi, kaasi batu ba masonga bisi yimbila amana bisi sangwala. 7Batu ba masonga bisi banzila masonga ma batsukami, kaasi batu ba mbi kabeninaku yi ngangu bwabuna. 8Baseya bisi yoka mbanza, kaasi batu ba ngangu bisi lembika khabu. 9Tangwa mutu wa ngangu kenda ku pfundusu yi zoba, zoba wisi kala mu khabu amana wisi seya, amana ngemba yeku. 10Batu ba kuhonda bisi menga mutu wakonda kifu, amana bisi sosa kuhonda batu basungama. 11Zoba wisi losa khabu zandi zoosu, kaasi mutu wa ngangu wisi yikakidila amana wisi dikala mu talala. 12Yuka ni pfumu kisi yukila luvunu, basadi bandi boosu bisi kituka ba mbi. 13Mutsukami yi mutu wisi suna, bawu boodi benina yi dyambu dimosi dya kimvuka: Tata wetu wisi kitula mesu ma babodi mu kumona. 14Yuka ni kinga kisi fundisa batsukami mu masonga, kiti kyandi kya luyalu kyakála kyasikidika kyamakulu. 15Fimbu yi ndinga ya kubeta bisi hana ngangu, kaasi mwana wuna basisi yandi mosi disi kwatisa ngudi wandi tsoni. 16Tangwa batu ba mbi bisi kituka ba lawu, masumu masi lutila, kaasi batu ba masonga kabamóna kubwa kwa batu ba mbi. 17Beta mwana waku, amana kakúhana ngemba; kakútula kyesi muna mbundu yaku. 18Hana hakondi nzayikusu ya Nzambi, batu bisi tyakula konda nzila, kaasi mutu wuna wisi lunda mitsiku, wasakumunu kenina. 19Musadi kalendaku kubeta mu ndinga lwesi; keti bu kabakula mambu, kalemvukaku. 20Wisi mona mutu wuna wisi zonza konda kuyindula? Kivuvu kyenina kwena zoba kuluta kwena yandi. 21Lunda musadi waku mboti-mboti tuka kimwana kyandi, amana ku tsuka kakítwakila hanga swana. 22Mutu wa khabu wisi heka tsita, amana mutu wa khabu za mbawu wisi sumuka masumu ma lawu. 23Lulendu lwa mutu lwisi mukulumuna, kaasi mutu wa mbundu ya kudikulumuna wisi tambula luzitu. 24Nduku wa mwifi wenina mbeni wandi meni; wisi yuka kusinga kaasi kazonzaku kima. a a v24 «Kusinga» kwenina ndefi ya ha thwala ya batu yisi kanikisa mutu wosu wuna wamona mbi ni kasa ku thwala amana kata kimbangi. 25Bweya bwa mutu bwisi tula mutambu, kaasi mutu wuna wisi kwikila mwena Tata wetu kalundama mboti-mboti. 26Batu ba lawu bisi sosa khenda ya pfumu, kaasi masonga ma mutu masi tuka kwena Tata wetu. 27Mutu wa kukonda masonga wenina nzanzi ku mesu ma batu ba masonga, amana mutu wasungama wenina nzanzi ku mesu ma batu ba mbi.
