Bidilu ku banzadi ba Babiloni
Banzenza ha banzadi ba Babiloni bisi hungula mahongi ma bawu mukuma bana bábakhanga bisi lomba mukunga wa kyesi wa ku nzu. Bisi dya ndefi mu kuzimbakanaku Yelusalemi kana mbala mosi, amana mukunga wisi suka mu lusingu lwa ngolu lwa Edomu yi Babiloni lwina kalusi lembika.
137 1Ku banzadi ba Babiloni, kuna twázakala amana twádila, bwosu twáyubuka Siyoni. 2Ha miti, kuna twáhungula mahongi metu. 3Mukuma kuna, bana bátukhanga bátulomba mikunga, amana bana bátunyokuna bálomba kyesi, mu kuzonza: «Lutuyimbila mosi wa mikunga mya Siyoni!»
4Abweti twalenda yimbila nkunga wa Tata wetu mu tsi ya kinzenza? 5Yuka ni yikuzimbakana ngeyi, Yelusalemi, koku dyama dya kitata dyazimbakana mudimu wandi. 6Lulaka lwama lwakhundakana ha mudilu wa munwa wama, yuka ni yikuyubukaku ngeyi, yuka ni yisyaku Yelusalemi kuluta kyesi kyama kya lawu.
7Yubuka, Tata wetu, bana ba Edomu mu kilumbu kina Yelusalemi dyabwa, buna bázimbula: «Lukulula! Lukulula! Tii yi ha mipfundila myandi!» 8Mwana wa ndumba wa Babiloni, ngeyi wuna wátangama mu kuzangana, kyesi kwena mutu wuna wukufuta ngeyi mu mana wáhanga kwena betu! 9Kyesi kwena mutu wuna wubongi bana baku ba khunda amana kababula ha tadi! a a v9 Yesu wánata dilu dya masonga ku kitakani, mu kulombila: «Tata, baloloka» — amana wálonga batu bandi mu kuzola bambeni ba bawu. Khabu ya kyedika ya batu ba kinzenza yisi natwa kwena Tata wetu, wuna yandi mosi wulenda kuyivutula.
