Ka makalu ku, kaasi Khumbu yandi
Kwena musindikila mikunga. Mukunga wa Tavidi.
Kibuka kisi sambila kikuma kya kyamvu tangwa kana kwenda ku mvita: ni Tata wetu kabambuka makabu maku, kalungisa mabanza maku amana kavutula bilomba byaku byosu. Mbalukulu yisi kwisa mu kati — makalu yi baphunda byenina byabina bahika bisi kwikila, kaasi batu baba bisi kwikila mu khumbu ya Tata wetu.
20 1Tata wetu kakúvutwala mu kilumbu kya kiwayi; khumbu ya Nzambi wa Yakobi yakutanina. 2Katuma lusadisu kwa ngeyi kutuka ku kikumbu, amana kakúzyamisa kutuka ku Siyoni. 3Kabambuka makabu maku moosu amana katala yi khenda kimenga kyaku kya kuyoka. 4Kakúheka tsambu ya mbundu yaku amana kalungisa mabanza maku moosu.
5Katúsika ndinga ya kyesi kikuma kya luhulusu lwaku, amana mu khumbu ya Tata wetu katútombula bidimbu byetu. Tata wetu kalungisa bilomba byaku byosu. 6Buthwena nzayi ni Tata wetu kisi hulula mutu wandi wuna kásita; kamuvutwala kutuka mu zilu dyandi dyatoma ni ngolu za luhulusu za koku dyandi dya kitata. 7Bahika bisi kwikila mwena makalu, bahika mwena baphunda, kaasi betu tukwikidi mu khumbu ya Tata wetu. 8Bawu bisi lengalakana amana babwa, kaasi betu tubati tokama amana tuzyama. 9A Tata wetu, hulula kyamvu! Tuvutula tangwa tubati bokwadila.
