Kyamvu Wisi Sangwala
Kwena mutwadisi wa bayimbidi. Mukunga wa Tavidi.
Batu bisi sangwala kyamvu wuna wálomba luzingu amana wátambula lwawu, wakwísa mutundakana ni makheti ma lawu amana wavwatiswa mukhonzi wa wolu. Kivuvu kyandi kaku ha mihangu myandi meni kisi telama, kaasi mu kukwikila mwena Tata wetu, wuna koku dyandi dikakwáta batu boosu bisi kasila fwongu kwena yandi.
21 1A Tata wetu, mu ngolu zaku kyamvu wisi sangwala; mu luhulusu lwaku, wisi sephila kingolu-ngolu! 2Wámuheka tsambu ya mbundu yandi, amana wátunaku mana malebu mandi málomba kwena ngeyi. 3Mukuma wakwísa mutundakana ni makheti ma lawu; wásya mukhonzi wa wolu watoma kuna mutwa wandi. 4Wálomba kwena ngeyi luzingu, amana wámuheka lwawu—bilumbu bya lengu, mvula muna mvula. a a v4 Kabu dya «luzingu lwa mvula yi mvula» dya kyamvu wa Tavidi dyisi lungana mu buzima mwena Yesu, Kyamvu wuna wáfutumuka, wuna lufwa lwáfwaniku kunsimba. 5Khembu yandi yenina ya lawu muna luhulusu lwaku; wámuheka mutsyenzya yi kineni. 6Kyedika, wámuheka makheti makonda suka, amana wákhitula wa kyesi ni kyesi kya kukala ha thwala yaku. 7Mukuma kyamvu wisi kwikila mwena Tata wetu; muna lungongu lukondi mana lwa Wuna Kuluta Zoosu, Tata wetu, kaníkanaku.
8Koku dyaku dikakwáta bambeni baku zoosu; koku dyaku dya kitata dikakwáta bana bisi kúmenga. 9Muna tangwa wámonika, kubakhítula hanga ziku dya mbawu yina yisi lema. Tata wetu kabamína muna khabu zandi, amana mbawu yandi yabayóka. 10Kubatotisa butuka dya bawu mu tsi, bana ba bawu mu kati dya batu. 11Mbatanana bakúkasila fwongu ya mbi amana bákasa kifwandu, bafwaniku mu kununga. 12Mukuma kubakhítula ndangu bábalula makunda ma bawu, tangwa kusya phunza zaku ku mbunzu za bawu.
13Watombulwa, A Tata wetu, muna ngolu zaku! Tuyímbila amana tukumisa ngolu zaku.
