Muyimbidilenu Mukunga wa Pha

Mbila ya mukunga wa pha yisikidila hana dyambu dimosi: tsi yenina mukuma Tata wetu wázonza. Kisi kitula mabanza ma makanda kima kya phamba, kisi tala muna mbundu zoosu zina kásema, amana kasephilaku mu batu ba mvita yi phunda za mvita. Disu dyandi disi sikama hana bana bisi hingila luzolu lwandi.

Kapitulu 33.

Sangwalenu mwena Tata wetu, benu batu ba masonga; lukumu lufwanani kwena batu basungama. Vutulenu matondu kwena Tata wetu ni lwinda; sikilenu mikunga kwena yandi ni lwinda lwa misinga kumi. Muyimbidilenu mukunga wa pha; sikilenu ni ngangu, ni ndinga ya kyesi ya ngolu.

Mukuma ndinga ya Tata wetu yenina ya masonga, amana kisalu kyandi kyosu kyenina mu kwikama. Yandi kisi zola masonga yi mukanu walungila; tsi yizedi khenda za Tata wetu.

Mu ndinga ya Tata wetu mazilu másalama, amana bibuka byosu bya mawu mu mwela wa munwa wandi. Yandi kisi kutikisa mamba ma yanga, kisi malumbikila kumosi; kisi sweka dingu dya yanga mu bitsweki byandi. Batu ba tsi yosu babanga Tata wetu; boosu bana bisi zinga mu tsi bakala yi bweya ku thwala yandi. Mukuma yandi wázonza, amana byáhangama; wátuma, amana byázyama.

Tata wetu kisi kitula mabanza ma makanda kima kya phamba; kisi manisa mabanza ma batu ba tsi. Dibanza dya Tata wetu ditelama mvula yi mvula, mabanza ma mbundu yandi muna makula moosu.

Kanda dyenina dya kyesi, dina Tata wandi kenina Tata wetu, batu bana kásola banga kimvwama kyandi. Tuka ku zilu Tata wetu kisi tala ku tsi; kisi mona batu boosu. Tuka ku homa handi, kisi tala batu boosu bana bisi zinga ha tsi. Yandi kisi yidika mbundu za bawu zoosu; kisi bakula moosu mana babati hanga.

Ka pfumu ku wisi huluka mu kuvula kwa masodi mandi; mutu wa kikesa káhulukaku mu kuvula kwa ngolu zandi. Mvalu wisi hana kivuvu kya luvunu kya kinunga; ata kuvula kwa ngolu zandi, kalendaku kuhulula.

Kaasi disu dya Tata wetu dyenina hana batu bana bisi muzitisa, hana batu bana bisi sya kivuvu kyawu mu khenda zandi, ndangu kahulula moya wa bawu ku lufwa, amana kabazingisa muna nzala.

Moya wetu wibati hingila Tata wetu; yandi kenina lusadisu lwetu yi kibalaka kyetu. Mukuma mbundu yetu yenina yi kyesi mwena yandi, mukuma tubati kwikila mu khumbu yandi yatoma. Khenda zaku, A Tata wetu, zakala hana betu, bwosu tubati sya kivuvu kyetu mwena ngeyi.