Kukatulwa mu Thoba
Kwena pfumu wa bayimbidi. Mukunga wa Tavidi.
Wisi yandika mu luhulusu lwaheka kala: wukatulwa mu thoba, malu masiwa ha thandu ya tadi, mukunga wa pha. Buna wisi balukila ku thwala, mukuma kuhanga luzolu kuludini kimenga — amana wisi manisina kani mu phasi, masumu maludini kutanga, wisi lomba Tata wandi ni kakwisa tswatsu.
40 1Yákala hingila Tata wetu mu kikwamina; wámbalukila amana wáyuka kindanda kyama. 2Wunkatudi mu dibulu dya kuzanga, mu thoba yina ya lawu; wásya malu mama ha thandu ya tadi, mu kusimbikisa bidyatila byama.
3Wásya mukunga wa pha mu munwa wama, mukunga wa kumisa Tata wetu. Batu balawu bamóna amana bakabánga, amana bakasya kivuvu kyawu mwena Tata wetu. 4Kyesi kwena mutu wuna wásya kivuvu kyandi mwena Tata wetu, wuna kabalukilaku kwena batu ba lulendu, kwena bana bisi sanda mavunu.
5A Tata wama, byalawu bidimbu bya biphadi byabina wabati hanga, yi mabanza maku matadidini betu; ka mutu ku wafwana kufwanikisa yi ngeyi. Yuka ni yazonza amana yasamuna mawu, melawu kuluta kutanga. 6Kimenga yi mulambu wázolabyoku, kaasi wátemuna makutu mama. Kimenga kya kuyoka yi kimenga kya ndoluka ya masumu wálombabyoku. 7Buna yázimbula: «Awu meni, yisini — muna mukanda wa kuvunga básonikina kikuma kya meni.»
8Yisi zola mu kuhanga luzolu lwaku, A Tata wama; mitsiku myaku myenina muna mbundu yama. 9Yásamuna musamu wa bukheti wa masonga muna kibuka kyambuta; yákangaku malebu mama, A Tata wama, bwosu wuzayi ngeyi.
10Yáswekaku masonga maku muna mbundu yama; yázonza kwikama kyaku yi luhulusu lwaku. Yáswekaku khenda yaku yi kyedika kyaku kwena kibuka kyambuta. 11Wukakidikaku kyadi kyaku kya lungongu kwena meni, A Tata wama; khenda yaku yi kyedika kyaku binkhulula kosu tangwa.
12Mukuma biwayi bikonda thalu binzinga meni; masumu mama mámbwila, amana yilendaku kumona. Mawu malawu kuluta tsuki za mutwa wama, amana mbundu yama yimanisini. 13A Tata wama, wunhulula; A Tata wama, awisa tswatsu amana wunsadisa. 14Boosu bana bisi sanda kukatula luzingu lwama bakwátuka tsoni amana balewuka; bana bisi zola kuzanga kwama bavutuka ku manima yi tsoni.
15Bana bisi nzimbwala: «Aa! Aa!» bayituka kikuma kya tsoni za bawu. 16Kaasi boosu bana bisi sanda ngeyi basangwala amana bamona kyesi mwena ngeyi; bana bisi zola luhulusu lwaku bazimbula kosu tangwa: «Tata wetu kenina wambuta!» 17Meni, yenina nsukami, yenina mu phasi; Pfumu Tata kabanza kikuma kya meni. Ngeyi wenina musadisi wama yi muhuludi wama; wuzingidilaku, A Tata wama.
