Muna Suka Wisi Yuka
Kikuma kya mutwadisi wa mikunga; mu misitu. Mukunga wa Tavidi.
Lombilu lwa suka, lwasonzolwa amana lwahingilwa, hanga mukanu wasonzolwa muna suka. Madinga ma bambeni ma yandi menina mazyamu ma muhululu, amana ndinga za bawu zenina mazasa. Tavidi wisi lomba kwena Tata wandi ni kamuthwadisa mu nzila yasonga, mu kuhita batu bana bisi tanikina kubwa kwandi.
5 1Yuka ndinga zama, A Tata; banza bibimu byama. 2Yuka ndinga ya nkalungu wama wa kusadisa, Pfumu wama yi Tata wama, mukuma yisámbila kwena ngeyi.
3A Tata, muna suka wuyuki ndinga yama; muna suka yinata lombilu lwama kwena ngeyi amana yitala mu kivuvu. 4Mukuma ngeyi, Tata wetu, kusi bonga tsambu mu kayengu ku; kima kyambi kifwaniku zingila mwena ngeyi. 5Bakwa mitsiki bafwaniku telama kuna thwala ya mesu maku; wisi menga boosu bana bisi hanga mambi. 6Wisi zanga boosu bana bisi huna; Tata wama wisi menga batu ba menga yi ba bukamvi.
7Kaasi meni, mu bungi bwa khenda yaku ya bulunda, yikwisa kota mu nzu yaku; yifukama kuna thwala ya nzu yaku yatoma mu bweya bwaku. 8A Tata, wunthwadisa mu masonga maku kikuma kya batu bana bisi tanikina kubwa kwama; sungika nzila yaku kuna thwala yama. 9Mukuma kweku kima kya kyedika muna munwa mya bawu; kati dya bawu dyenina kuzangana. Madinga ma bawu menina mazyamu ma muhululu; bisi hukumuna batu ni lulaka lwa bawu. 10Zengila bawu mukanu, A Tata; babwa mu bimeka bya bawu meni. Lubula bawu kuna phenza kikuma kya kubalwakila kwa bawu kwa lawu, mukuma bákubalwakila ngeyi. a a v10 Tavidi wisi nata nkalungu wandi wa masonga mu busonga kwena Tata wetu, wuna wisi wawu tambula, kaasi kawu losaku ku manima. Luzolu lwa mambi malembwa lwisi baka mvutu wawu wa lungana mwena Yesu, wuna kenina, mu bufwana, mutu wa masonga amana, mu bufwana, mutu wa kyadi.
11Kaasi boosu bana bisi swama mwena ngeyi basángwala; bayímbila mu kyesi mvula yi mvula. Yala kitemba kyaku hana bawu, ndangu boosu bana bisi zola khumbu yaku babasa yi kyesi mwena ngeyi. 12Mukuma ngeyi, A Tata, wakúsakumuna batu ba masonga; wisi bazyeta ni khenda hanga ni kibalaka.
