Ndambudu kwena Nkundi wama Mosi
Kikuma kya mfidisi wa mikunga: ni misinga mya kuyimbila. Mukunga wa mudimu wa Tavidi.
Bweya yi matekita; Tavidi wisi zola mahela ma yembi hanga kadumuka kwenda vunda ku dikanga. Phasi yaluta ngolu kayenina mvwalangani yina yisi zala mu mbanza ku, kaasi nduku wandi wa kyedika, wuna wadyata yandi kumosi ku nzu ya Tata wetu amana wábebisa lukwikilu.
55 1Yuka lusambulu lwama, A Tata wama, amana kudiswamaku ku ndombolo yama ya khenda. 2Wunlemvu amana wumvutula; meni yisiku lembwa mu kuniongu kwama, amana yisi kunga, 3kikuma kya ndinga ya mbeni, kikuma kya luyamisu lwa batu ba mbi. Mukuma bisi kukulumuna phasi hana thandu yama, amana mu khabu bisi kungwatila kikudi-kudi. 4Mbundu yama yisi ningana mu kati dyama; mambu ma bweya ma lufwa mábwa hana thandu yama. 5Bweya yi matekita bisi kubwila hana thandu yama, amana kitswi kimvukumwini meni. 6Amana yizimbula: «Ewu! Nzodi yikala yi mahela hanga yembi! Yikádumuka, yikwenda vunda.
7Kyedika, yikáhukumuka thama; yikatula homa ha kuyamba ku dikanga. a a v7 Sela: ndinga ya mu kizamba holo ya mu lusambulu, yina tsundu yandi yisi zayakanaku mboti, nanga kivundu kya kuyindula holo kivundu kya kizamba. 8Yikábaka tswatsu homa hama ha kuyamba, thama yi pfunzi yina yisi tukula ngolu yi kimbongila.» 9Vwalanganisa bawu, A Pfumu Tata; kabula ndinga za bawu, mukuma mboni mvwalangani yi tsita mu mbanza. 10Mwini yi phipha bisi zyetanga hana bibaka byandi; mambi yi phasi byenina mu kati dyandi. 11Kuzangana kwenina mu kati dyandi; luyamisu yi bukamvi bisiku katuka mu mabala-bala mandi. 12Mukuma ka mbeni ku wuna wisi nseva— kyaki yilenda kukanga mbundu; ka mutu ku wisi mbenga wuna wadítombula hana thandu yama—kwena yandi yilenda diswama. 13Kaasi ngeyi, mutu wafwana yi meni, nkundi wama yi nduku wama wa bela-bela. 14Betu bana twásya kithwadi kya kyesi kumosi, bana twákangala yi mulumba-lumba kwenda ku nzu ya Tata wetu. 15Yambula lufwa lwabwila hana thandu ya bawu; yambula bakulumuka ku kalunga bazínga, mukuma mambi menina mu nzu za bawu, mu kati-kati dya bawu. 16Kaasi meni yisi tela kwena Tata wama, amana Tata wama kamphúlusa. 17Masika yi suka yi mu tsinzi yisi boka amana yisi kunga, amana yandi wisi yuka ndinga yama. 18Wákula moya wama mu ngemba muna mvita yina bánwanisa yi meni, kana balawu bákala mu kunwanisa meni.
19Tata wetu kayúka amana kabákulumuna—yandi wuna wavwandidi mu kiti kya kipfumu tuka mu bilumbu bya khulu. Mukuma bawu basobukaku, basi yukaku bweya bwa Tata wetu. 20Wuna wálambula watombwedi moku mandi mu kunwanisa bana bena mu ngemba yi yandi; wábukuna bulunda bwandi. 21Nzonzidi yandi yákala ya lebakani kuluta manteka, kaasi mvita yákala mu mbundu yandi; mambu mandi mákala ma lebakani kuluta masi, kaasi mákala mbedi zina zihasukidi. 22Timbula zitu dyaku kwena Tata wetu, amana yandi kakúsimba; kayambulaku kosu tangwa mutu wa masonga kanikana. 23Kaasi ngeyi, A Tata wama, kabákulumuna ku dibulu dya kuzangana; batu ba menga yi ba bukamvi bazingaku kyati kya bilumbu byawu. Kaasi meni, yikásya mbundu yama mwena ngeyi.
