Bana ba Kola
Kwena mutwadisi wa mikunga. Mukunga wa bana ba Kola.
Tata wetu wálolula batu baba kedi, amana bisi mulomba kasala bwabuna dyaka, ka kukala mu khabu muna makula moosu ku. Mvutu yina bisi yuka yenina ngemba, yi kifwanisu: khenda yi kwikama bisi tundakana, masonga yi ngemba bisi dibumbakana, amana tsi yisi yiha mbongu yandi.
85 1Ngeyi wásongila khenda kwena tsi yaku, A Tata wetu; wávutula bima bya Yakobi. 2Ngeyi wálolula kifu kya batu baku; wáfidinga masumu ma bawu moosu. 3Ngeyi wákatula khabu zaku zoosu; wákatuka mu khabu zaku za nganzi.
4Tuvutulula, A Tata wetu, luhulusu lwetu; losa khabu zaku zina zitadidi betu. 5Ngeyi kakála mu khabu kwena betu mvula yi mvula? Kazíngila khabu zaku muna makula moosu? 6Ngeyi kutúzingisaku moya hika, hanga batu baku basangwala mwena ngeyi? 7Tusongila khenda zaku, A Tata wetu, amana tuheka luhulusu lwaku.
8Yambula yíyuka mana Tata wetu kazimbula, mukuma kazimbula ngemba kwena batu bandi, kwena bana basila mbundu; kaasi babavutukaku ku nzila za buzoba bwa bawu. 9Kyedika luhulusu lwandi lwenina bela-bela kwena bana bisi mona bweya mwena yandi, hanga khembu yazingila mu tsi yetu. 10Khenda yi kwikama bátundakana hakimosi; masonga yi ngemba byádibumbakana. 11Kwikama kisi mena tuka ha tsi, amana masonga mabati tala tuka ku zilu. 12Eeh, Tata wetu kahéka mambu mamboti, amana tsi yetu kayiha mbongu yandi. 13Masonga makakwenda ku thwala yandi amana makayidika nzila kikuma kya bitambi byandi.
