Yandi Wazakala ha Kiti kya Luyalu
Mu mbala tatu mukunga wisi telama mu kuzonza: watoma kenina. Tata wetu, kyamvu wuna wisi zakamisa tsi, kisi zola phi masonga, amana mbandu za mawu zenina Moyize, Loni yi Samwela — bayakala bana kábavutwala tuka mu kunzi kya tuti, kábalolula, amana wabáfundisa kaka.
99 1Tata wetu kisi yala; bikanda bimona bweya! Wazakala ha kiti kya luyalu, hana thandu ya syedibe; tsi yazakama! 2Tata wetu kenina mbuta mu Siyoni; yandi katombula hana thandu ya bikanda byosu. 3Bakumisa khumbu yaku ya mbuta yi ya bweya; watoma kenina!
4Kinga wa ngolu kisi zola masonga. Ngeyi wátunga bufwanini; wáhanga mambu ma masonga yi busonga mu Yakobi. 5Tombulenu Tata wetu; fukaminenu ha kidyatilu kya bitambi byandi! Watoma kenina!
6Moyize yi Loni bákala mu kati dya banganga Nzambi bandi, amana Samwela kákala mu kati dya bana bisi tela khumbu yandi. Bátela kwena Tata wetu, amana wábavutwala. 7Muna kunzi kya tuti wázonza kwena bawu; bálunda mikuku myandi yi mitsiku mina kábaheka.
8A Tata wetu, ngeyi wábavutwala; wákala kwena bawu Tata wuna wisi lolula, kaasi wabáfundisa kikuma kya kukonda kwa masonga kwawu. 9Tombulenu Tata wetu, amana fukaminenu ha mongu wandi watoma; mukuma Tata wetu kenina watoma!
