Ndumba-leta wa mbuta wasengwamini
Wanzyo wasongila Yowani mukhetu wavwata mvwela, wazela menga ma bambangi ba Yesu, wazakala hana thandu ya mbisi ya kabengi. Yowani wayituka lawu; wanzyo wuzimbwala mitwa yi mphoka. Ku tsuka, mbisi yi bakyamvu bandi babaluka ku yandi amana bayoka yandi, mu kusala luzolu lwa Tata wetu.
17 1Mosi wa banzyo tsambwadi, bana bakala yi mbungu tsambwadi, wisa amana wunzimbwadini: «Yiza, yikúsongila mutindu bakafundisila ndumba-leta wa mbuta, wuna wazakala hana thandu ya mamba malawu. 2Bakyamvu ba tsi báta mbongi yi yandi, amana batu ba tsi bázela vinu dya mbongi yandi.» 3Wánata meni mu Kitembu ku phungamu; mwamuna yímona mukhetu wazakala hana thandu ya mbisi ya kabengi, yina yifidingwa khumbu za kulewula Nzambi, yi mitwa tsambwadi yi mphoka kumi. 4Mukhetu wávwata mvwela yi kabengi, wádihana wolu, matadi ma thalu yi misanga; wusimbi mu koku kwandi bungu dya wolu dibati babasa bima bya nzanzi yi mvindu ya kindumba kyandi. 5Ha mbulu yandi básonika khumbu, diswekamu: «Babiloni dya mbuta, ngudi wa bandumba yi wa bima bya nzanzi bya tsi.»
6Yímona mukhetu wazela menga ma bakwikidi, menga ma bambangi ba Yesu. Buna yimumoni, yíyituka lawu.
7Nzyo wáhyula: «Kikuma kya biki wubati yituka? Yikuzimbwala diswekamu dya mukhetu yi dya mbisi yina yimunata, yina yenina yi mitwa tsambwadi yi mphoka kumi. 8Mbisi yina wámona yákala, kaasi yisiku, amana yeka kulubuka mu kalunga ndangu yenda ku kuzangana kwandi. Batu bana bazínga ha tsi, babana khumbu za bawu zasonikaku mu mukanda wa moya tuka luyandiku lwa tsi, bakáyituka mu kumona mbisi—mukuma yákala, yisiku, amana yikwísa.
9Haha hafwani mabanza ma ngangu: mitwa tsambwadi myenina myongu tsambwadi, mwamuna mukhetu wazakala, amana myenina phi bakyamvu tsambwadi. 10Bakyamvu batanu bábwa, mosi wenina, mukwawu wisa kwisiku; yuka ni wakwísa, kafweti zinga tangwa dya khunda kwandi. 11Mbisi yina yákala amana yisiku, yawu-meni yenina kyamvu kya nana, kaasi yenina mosi wa bana tsambwadi, amana yeka kwenda ku kuzangana. 12Mphoka kumi zina wámona, zyenina bakyamvu kumi babana bakonda tambula kipfumu, kaasi batámbula kiyeka kya bakyamvu mu tangwa dimosi hakimosi yi mbisi. 13Bawu baba benina yi dibanza dimosi, amana bahana ngolu zawu yi kiyeka kyawu kwena mbisi.
14Bakanwana yi Mwana wa mukoku, amana Mwana wa mukoku kakabanunga, mukuma yandi kenina Pfumu wa bapfumu yi Kyamvu wa bakyamvu, amana bana benina yi yandi, bawu bana bátela, básolama amana ba kusila mbundu.» 15Nzyo wunzimbwadini: «Mamba mana wámona, mwamuna ndumba-leta wazakala, menina batu, milumba-lumba, bikanda yi mindinga. 16Mphoka kumi zina wámona, yi mbisi, bakámenga ndumba-leta. Bakámuyambula wayamba yi wakhonga, bakadya misuni myandi, amana bakámuyoka mu mbawu. 17Mukuma Tata wetu wásya mu mbundu zawu, hanga basala dibanza dyandi, bakhundakana mu dibanza dimosi, amana bahana kipfumu kyawu kwena mbisi, tii yi kuna mambu ma Tata wetu makálunga. a a v17 Keti bakyamvu ba ndwandwa bana bisi sadila mbisi, bisi sala dibanza dya Tata wetu. Yandi wubati dyatisa mambu moosu kuna kununga kwa Mwana wa mukoku. 18Mukhetu wuna wámona kenina mbanza ya mbuta yina yisi yala bakyamvu ba tsi.»
