Wɔda Oguamanfo Kɛse No Adi
Ɔbɔfo bi kyerɛ Yohane ɔbaa bi a ɔhyɛ afasebiri ntade, a Yesu adansefo mogya abow no, na ɔte aboa kɔkɔɔ bi so. Ɛyɛ Yohane nwonwa; ɔbɔfo no kyerɛkyerɛ ati ne mmɛn no ase. Awiei koraa no, aboa no ne n'ahene sɔre tia no hyew no, na wɔyɛ yɛn Agya pɛ.
17 1Abɔfo ason a wokura nkuruwa ason no mu baako baa me nkyɛn bɛkasa kyerɛɛ me se, “Bra, mɛkyerɛ wo atemmu a ɛbɛba oguamanfo kɛse a ɔte nsu bebree so no so. 2Asase so ahemfo ne no bɔɔ aguaman, na asase so nnipa nom nʼaguamammɔ nsa no bowee.” 3Ɔde me kɔɔ sare so wɔ Honhom no mu. Ɛhɔ na mehuu ɔbaa bi sɛ ɔte aboa kɔkɔɔ bi so; din a ɛkasa tia Onyankopɔn ahyɛ aboa no ho ma, na ɔwɔ ti ason ne mmɛn du. 4Ɔbaa no hyɛɛ ntade beredum ne kɔkɔɔ, na ɔde sika kɔkɔɔ, aboɔ a ɛsom bo ne nhwene pa asiesie ne ho. Ɔkuraa sika kɔkɔɔ kuruwa bi wɔ ne nsam a akyiwade ne nʼaguamammɔ mu efi ayɛ no ma. 5Wɔ ne moma so no, wɔakyerɛw din bi a ɛyɛ ahintasɛm se, “Babilon Kɛse no, aguamanfo ne asase so akyiwade nyinaa maame.”
6Mehuu ɔbaa no sɛ wanom ahotefo mogya, Yesu adansefo no mogya, abow. Bere a mehuu no no, ɛyɛɛ me nwonwa yiye.
7Ɔbɔfo no bisaa me se, “Adɛn nti na ɛyɛ wo nwonwa? Mɛka ɔbaa no ne aboa a ɔsoa no no ho ahintasɛm akyerɛ wo; aboa a ɔwɔ ti ason ne mmɛn du no. 8Aboa a wuhuu no no, na ɔwɔ hɔ kan, seesei onni hɔ, nanso ɔrebɛfi amoa a ɛnni ase no mu apue, na ɔbɛkɔ ne sɛe mu. Sɛ asase so atefo a wɔankyerɛw wɔn din wɔ nkwa nhoma no mu fi wiase fapem no hu aboa no a, ɛbɛyɛ wɔn nwonwa, efisɛ na ɔwɔ hɔ kan, seesei onni hɔ, nanso ɔbɛba.
9Eyi hwehwɛ adwene a nyansa wom: ti ason no yɛ mmepɔ ason a ɔbaa no te so no, na wɔyɛ ahemfo ason nso. 10Wɔn mu baanum ahwe ase, baako wɔ hɔ seesei, na nea ɔka no mmae ɛ; sɛ ɔba a, ɛsɛ sɛ ɔtena hɔ bere tiaa bi. 11Aboa a na ɔwɔ hɔ kan na seesei onni hɔ no ankasa ne ɔtɔ so awotwe, nanso ɔyɛ ason no mu baako, na ɔrekɔ ne sɛe mu. 12Mmɛn du a wuhuu no no yɛ ahemfo du a wonnya nnyaa ahenni, nanso wɔne aboa no nya tumi sɛ ahemfo dɔnhwerew baako. 13Wɔn nyinaa adwene yɛ baako, na wɔde wɔn ahoɔden ne wɔn tumi ma aboa no.
14Wɔne Oguammaa no bɛko, na Oguammaa no bedi wɔn so nkonim, efisɛ ɔno ne awuranom mu Awurade ne ahemfo mu Hene; na wɔn a wɔka ne ho no yɛ wɔn a wɔafrɛ wɔn, wɔapaw wɔn, na wodi nokware.” 15Ɔbɔfo no ka kyerɛɛ me se, “Nsu a wuhuu no, baabi a oguamanfo no te no, yɛ nnipa, nnipadɔm, aman ne kasa ahorow. 16Mmɛn du a wuhuu no no ne aboa no bɛtan oguamanfo no. Wɔbɛsɛe no ama wada mpan na wada adagyaw, wɔbɛwe ne nam, na wɔde ogya ahyew no pasaa. 17Efisɛ yɛn Agya de ahyɛ wɔn koma mu sɛ wɔnyɛ nʼapɛde, wɔnyɛ adwene baako, na wɔmfa wɔn ahenni mma aboa no, kosi sɛ yɛn Agya nsɛm bɛba mu. a a v17 Ahemfo atuatefo a wɔsom aboa no mpo di yɛn Agya apɛde so. Ɔkyerɛ abakɔsɛm kwan de kɔ Oguammaa no nkonimdi so. 18Ɔbaa a wuhuu no no ne kuropɔn kɛse a edi asase so ahemfo so hene no.”
