Bakasa Nyoka wa Mbuta
Satana wakaswa ni miyololu mvula funda dimosi, mu tangwa bambangi bana bakondi fukamina mbisi bayadila. Mu kulubuswa, wakutikisa makanda mu mbala ya tsuka, amana mbawu yituka kwena Tata wetu yibadya. Buna mikanda miyafulwa amana bafwa basambusu mu mambu mana bahanga. Lufwa lwaweni lwalosa ku phenza.
20 1Yímona anzyo mosi, wukwisa kukulumuka tukidila ku zilu, wusimbi tsabi ya kalunga yi muyololu wa mbuta mu moku. 2Wákwata nyoka wa mbuta, nyoka wuna wa khulu, kiphidi-mutu yi Satana, amana wámukasa mvula funda dimosi. 3Wámutimbula mu kalunga, wáyafika amana wánamika kidimbu hana yandi, hanga kahunaku nati, kuhingila ni mvula funda dimosi dyamana; kunima dya bwabuna, kafweti lubuka mu tangwa dya khunda.
4Yímona biti bya luyalu; bana bázakala hana biti bina bátambula hamu mu kusambisa. Yímona phi moya mya batu bana bábukwasa mutwa kikuma kya kimbangi kya bawu kya Yesu yi kikuma kya ndinga ya Tata wetu—bana bakondi fukamina mbisi kondilo kifwani kyandi, amana bakondi tambula kidimbu kyandi hana mbulu kondilo hana koku. Bázinga amana bayádila ha kimosi yi Kidisitu mvula funda dimosi. 5(Bafwidi bakwawu bana basidi bazingaku kuhingila ni mvula funda dimosi dyamana.) Lwalu lwenina lufutumuku lwa theti. 6Wa lusakumunu yi watoma mutu wuna wisi bonga ndambu mu lufutumuku lwa theti; lufwa lwa mbodi lweku ngolu hana bawu, kaasi bakála banganga ba Tata wetu yi ba Kidisitu, amana bakála yadila ha kimosi yi yandi mvula funda dimosi.
Balubula Satana
7Tangwa mvula funda dimosi dyamana, Satana kalubuka mu boloku bwandi. 8Kalubuka hanga kahuna nati muna tsongi ziya za tsi—Ngogi yi Mangogi—mu kubakútikisa kikuma kya mvita, bavudi hanga tsenga za yanga dya mbuta. a a v8 Ngogi yi Mangogi basiku nati zodi za kyedika, kaasi benina bidimbu, bina bábonga mu mukanda wa mbikudi Ezekyele, kikuma kya batu boosu ba tsi bana bisi tombuka, bana bakútakana mu kunwanisa batu ba Tata wetu. 9Bénda tukidila muna tsi yosu, amana bazingidya kizika kya batu ba Nzambi yi mbanza yina yitondama, kaasi mbawu yátuka kwena Tata wetu, mu zilu, amana yábadya. 10Kiphidi-mutu wuna wábahuna, bámutimbula mu yanga dya mbawu yi bupfundu, kuna kwenina mbisi yi mbikudi wa bukamvi. Bakála tambula minyanga mwini yi phipha, mvula muna mvula.
Kiti kya Luyalu kya Mbuta kya Phembi
11Yímona kiti kya luyalu kya mbuta kya phembi yi wuna wázakala hana. Tsi yi zilu byátina ku thwala yandi, amana kifulu kyasidilaku kikuma kya bawu. b b v11 Kiti kya luyalu kya mbuta kya phembi kya pfundusu ya tsuka, kyenina kiti kya luyalu kya Tata wetu. Batu boosu bana bázinga ha tsi yayi, batelama ku thwala yandi. 12Yímona bafwidi, bambuta yi batu ba khunda, batelama ku thwala ya kiti kya luyalu. Mikanda myákanguka, amana mukanda wukwawu—mukanda wa luzingu. Bafwidi báfundisama mu mana másonama muna mikanda, kosu mutu kikuma kya mihangu myandi. 13Yanga dya mbuta dyáhana bafwidi ba dyawu; Lufwa yi kalunga byáhana bafwidi ba bawu; kosu mutu wáfundisama kikuma kya mana káhanga. 14Lufwa yi kalunga byátimbulwa mu yanga dya mbawu. Lwalu lwenina lufwa lwa mbodi—yanga dya mbawu. 15Wosu wuna khumbu yandi yasonikaku muna mukanda wa luzingu, bámutimbula mu yanga dya mbawu.
