Mwana wa mukoku Wukángula Binyeminu
Bana bazakala hana maphunda balubuka dimosi-dimosi: kununga, kuhonda, mfutu wa kilumbu kimosi mu dipha dimosi, buna Lufwa. Ku tsi ya mesa ma kimenga, bambangi bahyula Tata wetu Mukwa ngolu zoosu nate kweti, amana bazimbwala ni basunga fyoti hika. Muna kinyeminu kya sambanu, batu ba ngolu basweka amana balomba matadi mababwa ha bawu.
6 1Yátala Yesu, Mwana wa mukoku, buna kákangula kinyeminu kimosi mu binyeminu tsambwadi, amana yáyuka kimosi mu bima biya bya moya buna kázimbula ni ndinga ya thungidi: «Wisa!» 2Yátala: phunda ya phembi, wuna wazakala hana thandu wasimba uta. Bámuheka mukhonzi, amana wálubuka mu kununga, hanga kanunga.
3Muna kákangula Mwana wa mukoku kinyeminu kya zyodi, yáyuka kima kya moya kya zyodi buna kázimbula: «Wisa!» 4Phunda yikwawu ya kabengi hanga mbawu yálubuka. Wuna wazakala hana thandu yandi báheka kiyeka mu kukatula ngemba ha tsi, hanga batu bahonda bawu yi bawu, amana bámuheka mbedi ya mbuta.
5Muna kákangula Mwana wa mukoku kinyeminu kya tatu, yáyuka kima kya moya kya tatu buna kázimbula: «Wisa!» Yátala — phunda ya kaphindi, wuna wazakala hana thandu yandi wasimba kilezo kya kuteza mu koku. 6Hana kati dya bima biya bya moya yáyuka kima hanga ndinga: «Ndambu ya bule mu fwalanga dimosi, bindambu bitatu bya odizi mu fwalanga dimosi — wuhangaku mbi kwena masi yi vinu!»
7Muna kákangula Mwana wa mukoku kinyeminu kya ya, yáyuka ndinga ya kima kya moya kya ya buna kázimbula: «Wisa!» 8Yámona phunda ya mbwaki. Wuna wazakala hana thandu yandi, khumbu yandi Lufwa, amana kalunga kakála kulanda yandi. Lufwa yi kalunga báheka kiyeka hana kitini kimosi mu bitini biya bya tsi, mu kuhonda ni mbedi, ni nzala, ni mbefu, yi ni bambisi ba mu musitu ba ha tsi.
9Muna kákangula kinyeminu kya tanu, yámona mu sina dya mesa ma kimenga moya mya bana báhonda kikuma kya ndinga ya Tata wetu yi kikuma kya kimbangi kina basimbidilaka. 10Bákalunga: «A Tata, Mukwa Ngolu zoosu, ngeyi wenina watoma amana wa kyedika, nate ni tangwa kweti wafundisa amana wavutula mbela ya menga metu kwena bana bisi zingila ha tsi?» a a v10 «Mukwa Ngolu zoosu» khumbu yina Luwawanu lwa Pha lusidila kikuma kya kiyeka kya lawu kya Tata wetu — batu bana bahonda kikuma kya lukwikilu bisi munlombila hanga wuna wasimba ngolu zoosu mu kusongila mambu. 11Kosu mutu báheka muledi wa phembi, amana bábazimbwala ni bavunda ntangu yifyoti diaka, tii basadi bakundi ba bawu yi baphangi ba bawu, bana bafwana kuhonda hanga bawu, thalu ya bawu yalungila.
12Yátala Mwana wa mukoku buna kákangula kinyeminu kya sambanu: mafu máningana ngolu ya lawu, tangwa dyákituka kaphindi hanga muledi wa mwika, ngondi yosu yákituka hanga menga, 13amana bathetimbwa bya zilu bábwa ha tsi, hanga bibundu bya fiki bina bikondiku yela, bina mufiki wusi losa buna wusi ningana ni pfunzi ya ngolu. 14Zilu dyávungama hanga mukanda wa kuvunga, amana mongu myosu yi mazawala moosu mákatuka mu bihoma bya mawu. 15Bakyamvu ba tsi, batu ba luzitu, bapfumu ba baphumbulu, bakwa kimvwama, bakwa ngolu, kosu muhika yi kosu mutu wukondi muhika, bádisweka mu mabulu yi mu matadi ma mongu. 16Bázimbula kwena mongu yi kwena matadi: «Tubwilenu, tuswekenu mu mbunzu ya Nzambi wuna wazakala hana kiti kya luyalu, amana mu khabu za Mwana wa mukoku! 17Mukuma kilumbu kya mbuta kya khabu za Nzambi yi za Mwana wa mukoku kyalwákidi, amana nati wafwana kuzyama ku thwala kwandi?»
