Loma 1 FHB Father's Heart Bible™

1 ¹Pholu, musadi wa Kidisitu Yesu, watedilu mu kukala thumwa, wavambunu mu Musamu wa Bukheti wa Tata wetu, ²Musamu wawu wa Bukheti wuna kasila tsila tuka thama muna bambikudi bandi, mu Masonuku matoma, ³kitadidini Mwana wandi, wuna muna luzingu lwandi lwa ha tsi kábutukila mu kikanda kya Tavidi, ⁴amana wazayakanisu ni kenina Mwana wa Tata wetu mu ngolu, bwosu bwenina Kitembu kya kuditomisa, mu kufutumuka kwandi ha kati dya bafwa—Yesu Kidisitu Pfumu wetu. ⁵Muna yandi twátambula khenda yi kithumwa mu kunata makanda moosu mu bulemvu bwa lukwikilu, kikuma kya khumbu yandi, ⁶amana benu phi lwenina ha kati dya babana batedilu mu kukala ba Yesu Kidisitu. ⁷Kwena batu boosu benina ku Loma, bana Tata wetu kazola amana batedilu mu kukala batu bandi batoma: Khenda yi ngemba byakala kwena benu, bituka kwena Tata wetu yi Pfumu Yesu Kidisitu.

Luzolu lwa Ngolu lwa Kunata Musamu wa Bukheti

⁸Ku theti, mvutudi matondu kwena Tata wama muna Yesu Kidisitu kikuma kya benu boosu, mukuma lukwikilu lwenu lusamunu muna tsi yosu. ⁹Mukuma Tata wetu kenina mbangi wama, wuna yisi sadila mu kitembu kyama muna Musamu wa Bukheti wa Mwana wandi, ni yikulubambuka kosu tangwa muna bisambu byama, ¹⁰yisi lomba ni, ho bwalendakana, mu luzolu lwa Tata wetu, buthwena yafwana mu kwisa kwena benu. ¹¹Mukuma thondi yilumona, mu kulukabudila kabu kya kitembu kina kiluheka ngolu, ¹²disongidila, ndangu twahekana kikesa benu yi benu mu lukwikilu lwa mutu yi bakwenu, lwenu yi lwama.

¹³Nzodi ni luzayi, baphangi: mbala zalawu yábonga lukanu lwa kwisa kwena benu, kaasi yábuyisu tii yi buthwena—ndangu yahela ndambu ya bibundu ha kati dya benu phi, bwosu ha kati dya makanda makwawu moosu. ¹⁴Yenina yi mfuka kwena Bangeleki yi bana bakondi kala Bangeleki, kwena batu badimuka yi bilawu. ¹⁵Yi hana ni, yisi zola ngolu mu kusamuna Musamu wa Bukheti kwena benu bana lwenina ku Loma phi.

¹⁶Yímonaku tsoni mu kikuma kya Musamu wa Bukheti—kyenina ngolu za Tata wetu mu kuhulula wosu wuna wisi kwikila, kwena mwisi Yuta ku theti, amana kwena mwisi Ngeleki phi.

¹⁷Mukuma muna kyawu masonga ma Tata wetu masengumunu, tuka mu lukwikilu tii yi mu lukwikilu, bwosu básonika: «Mutu wa masonga kazínga mu lukwikilu.» ^a a v17 «Tuka mu lukwikilu tii yi mu lukwikilu»: Musamu wa Bukheti wunatwa mu lukwikilu mu nzila yosu—tuka ku theti tii yi ku tsuka.

Nganzi ya Tata wetu Kwena Disumu

¹⁸Mukuma nganzi ya Tata wetu yisengumunu tuka ku zilu kwena mambu moosu ma kusafula Nzambi yi ma kukonda masonga ma batu, bana bisi fitikisa kyedika mu kukonda masonga. ¹⁹Mana malenda zayakana matadidini Tata wetu masongidi kwena bawu, mukuma wábasongila mana. ²⁰Tuka mu kuhanga tsi, bima byandi bina byisiku monika—bunzambi bwandi yi ngolu zandi za mvula yi mvula—bisi monika kedi, byabakisu mu bina kahanga. Yi hana ni, bawu balólukaku. ²¹Keti bázaya Tata wetu, bámuzitisaku bwosu Nzambi, holo kumuvutudila matondu—kaasi mabanza mama mákituka ma phamba, amana mbundu zama zikonda ngangu zakituka phipha. ²²Mu kutambwasa ni badimuka bawu, bákituka bilawu, ²³amana básoba khembu ya Tata wetu wuna wisiku fwa mu biteki bina bisi hala bwosu mutu wisi fwa yi banuni yi bambisi yi bina bisi landanda. ²⁴Yi hana ni, Tata wetu wábaheka ku tsatu za mbundu zama, mu mambu ma mvindu, mu kulewula lutu lwa bawu, bawu yi bawu, ²⁵mukuma básoba kyedika kya Tata wetu mu luvunu, mu kufukamina yi kusadila bihangwa, kaasi ka Muhangi ku, wuna wenina wasakumunu mvula yi mvula. Abwabuna.

²⁶Kikuma kya mama, Tata wetu wábaheka ku tsatu za tsoni. Bakhetu ba bawu básoba mambu ma kibutukulu mu mana makonda kala ma kibutukulu. ²⁷Phila mosi phi, bayakala básisa mambu ma kibutukulu yi bakhetu, mbundu zama zalema tsambu mutu yi bakwenu—bayakala bisi hanga kindumba yi bayakala, amana bisi tambula mu bawu meni ndola yina yafwanini kikuma kya kuzimbala kwa bawu. ²⁸Bwosu bábuya mu kubamba Tata wetu muna nzayilu zama, wábaheka ku mabanza mana mafwaniku, mu kuhanga mambu mana mafwaniku. ²⁹Bazala yi kukonda masonga kosu, mambu mambi, lukusu yi khu; bazala yi kiphala, luhondu, kutendana, nduka za mbi yi bumbisi; bawu benina bazonziki lawu, ³⁰batu ba mbonzi, bambeni ba Tata wetu, batu ba luzangu, bakwa lulendu, bakwa mitsiki, bana bisi yindula mambu mambi, bisiku lemvukila bibuti bya bawu, ³¹bakonda ngangu, bakonda kwikama, batu ba mbundu ya zititi, bakwa kingolu-ngolu. ³²Keti bázaya mutsiku wa masonga wa Tata wetu, ni bana bisi hanga mambu ma mutindu wuna bafwani lufwa, kaasi bawu bisi hanga mawu kaka ku, bisi sya hika kyesi kwena bana bisi hanga mawu.