Yambenu Babana Beku Ngolu mu Lukwikilu
Mukwikidi wumosi wisi dya byosu, wukwawu wisi dya kaka matiti, amana kosu wisi kalewula mu kitsweki wunkwawu. Pholu kazodiku kuzenga mambu ma madya. Kosu mutu wisi vutula kwena pfumu wandi amana Tata wetu wábatambwasa bodi, buna disumu dya kyedika dyenina mu kutula tadi dya kutyelumuka hana nzila phangi kabati kangala.
Tata wetu kisi zonza mu vese 11
14 1Yambulenu mutu wuna keku yi ngolu mu lukwikilu, kaasi ka mu kufinda phaka kikuma kya mabanza mandi ku. 2Mutu mosi wenina yi lukwikilu lwa kudya byosu, kaasi wuna keku yi ngolu wisi dya kaka matiti. 3Wuna wisi dya kalewulaku wuna kadyaku, amana wuna kadyaku kafundisaku wuna wisi dya, mukuma Tata wetu wámutambwasa. 4Nani wenina ngeyi, ndangu wafundisa musadi wa mutu wahika? Ku thwala ya pfumu wandi yandi-meni wisi telama ho wisi bwa. Kaasi katelama, mukuma Pfumu kenina yi hamu dya kumutelamisa.
5Mutu mosi wisi banza ni kilumbu kimosi kiluti kikwawu; mukwawu wisi banza ni bilumbu byosu bikala phila mosi. Kosu mutu kakala yi kikumbwala kya lawu mu mabanza mandi. 6Wuna wisi zitisa kilumbu, wisi kizitisa kikuma kya Pfumu. Wuna wisi dya, wisi dya kikuma kya Pfumu, mukuma wisi vutula matondu kwena Tata wetu. Wuna kadyaku, kadyaku kikuma kya Pfumu, amana wisi vutula matondu kwena Tata wetu. 7Mukuma ka mutu ku wa betu wisi zinga kikuma kya yandi-meni, amana ka mutu ku wa betu wisi fwa kikuma kya yandi-meni. 8Yuka ni tuzinga, tuzinga kikuma kya Pfumu; yuka ni tufwa, tufwa kikuma kya Pfumu. Holo tuzinga, holo tufwa, twenina batu ba Pfumu. 9Kidisitu wáfwa amana wázinga diaka kikuma kya dyadi: hanga kakala Pfumu wa bafu yi wa bana bazinga.
10Kaasi ngeyi, mukuma mbi wisi fundisa phangi waku? Holo, mukuma mbi wisi lewula phangi waku? Betu boosu twatelama ku thwala ya kiti kya pfundusu kya Tata wetu.
11Mukuma bwásonama bwabu: «Bwosu meni yizinga, wisi zimbula Tata wetu, kungulu dyosu dyafukama kwena meni, munwa wosu wasamuna kwena meni.»
12Yihana ni, kosu mutu hana kati dya betu kasámuna mambu ma yandi-meni kwena Tata wetu.
13Yihana ni, lulembwaku benu yi benu mu kufundisa. Kaasi luzenga mukanu ni ka lwasya kisinza kya kubwila kondilo mutambu ku thwala ya phangi wenu ku. 14Meni nzayi, amana yitambwasama mwena Pfumu Yesu, ni ka kima ku kyenina kyasumuka mu kyawu-meni; kaasi kwena mutu wuna wisi banza ni kyasumuka, kyenina kyasumuka kwena yandi. 15Yuka ni madya makala vweza phangi waku, ngeyi wisi kangala diaka mu lungongu ku. Lembwa mu kubunga mutu wuna Kidisitu káfwila kikuma kyandi, mu madya maku. 16Yihana ni, kina lubati tala ni kyabukheti, ka kyazonzibwa hanga kyambi ku. 17Kipfumu kya Tata wetu kyenina kudya yi kunwa ku, kaasi masonga yi ngemba yi kyesi mu Kitembu Kyatoma. a a v17 Pholu wisi songa diaka buna bwenina Kipfumu: kyenina mitsiku mya kudya yi kunwa ku, kaasi khadidi ya masonga ku thwala ya Nzambi, ngemba ya lawu, yi kyesi kina Kitembu kyandi kisi buta. 18Wuna wisi sadila Kidisitu mu phila yayi, wisi sephidisa Tata wetu amana batu bámutambwasa. 19Yihana ni, tusandenu mambu mana misi nata ngemba yi mana misi tunga betu yi betu. 20Lulembwaku mu kubunga kisalu kya Tata wetu kikuma kya madya. Byosu byenina byatoma, kaasi kudya kuna kwisi khukula mutu kwenina mbi. 21Bwenina bukheti mu kukonda dya mbisi, kukonda nwa vinu, kondilo kuhanga kima kyosu kina kyisi bwisa phangi waku mu kisinza.
22Lukwikilu lwaku, lulunda kwena ngeyi-meni ku thwala ya Tata wetu. Kyesi kwena mutu wuna kadifundisaku yandi-meni mu kina kisi tambwasa. 23Wuna wisi findila phaka, yuka ni kadya, bisi mufundisa ndola, mukuma kadyini ku mu lukwikilu. Amana kyosu kina kyisi tuka mu lukwikilu ku, kyenina disumu.
