Lukanu lwa Nawomi
Nawomi watuma Luti ku buala bwa bule muna phipha, ndangu kalomba Bowasi kayala nzenzi ya muzaka wandi ha yandi. Yandi wayituka, buna mbundu yandi yawaba: watela yandi ni wafwana, wasakumuna yandi kwena Tata wetu, amana watuba ni kahulula yandi ho ni muhuludi wa kanda wukufi wakondi hulula yandi.
3 1Amana Nawomi, nzitu wandi, wumuzimbwadini: «Mwana wama, ka yifwaniku ku kusanda ngeyi nzu ya luvundilu, hanga bwakala mboti kwena ngeyi? 2Bowasi, yandi wuna wákala yi bandumba bandi, keku kiwutu kyetu? Muna phipha yayi, kabati hambula odizi ha buala bwa bule. 3Disukula, divwata mananasi ma tsunga, vwata muzaka waku amana tuluka ku buala bwa bule. Wudimenikaku kwena yakala tii yi kuna kamanisa kudya yi kunwa. 4Muna tangwa dina kalala, bakula buala bwina kalala; wenda katula mufidingu ha malu mandi amana lala. Yandi kakuzimbwala bina wufwani kuhanga.»
5Amana Luti wumuzimbwadini: «Mana moosu wuzimbudi, yihánga.» 6Buna kátuluka ku buala bwa bule, wáhanga mana moosu nzitu wandi kázimbula. 7Bowasi wádya, wanwa amana mbundu yandi yáwaba; buna wálala ha tsuka dya khoba dya bule. Luti wísa mu kitsweki, wákatula mufidingu ha malu mandi amana wálala. 8Muna kati dya kisuku, yakala wáyituka, wábaluka, amana tala, mukhetu wálala ha malu mandi! 9Wuhyudi: «Ngeyi nati?» Yandi wávutula: «Meni Luti, musadi waku.» «Yala nzenzi ya muzaka waku ha musadi waku, mukuma ngeyi wenina muhuludi.» a a v9 Kuyala nzenzi ya muledi ha mutu kwákala ndombolo ya makwela yi ya lutaninu.
10Yandi wuzimbudi: «Khi kyesi kwena ngeyi kwena Tata wetu, mwana wama. Buweti bwaku bwa tsuka buhitini bwa theti, mukuma wulandidiku bangunza, yuka baphutu yuka bamvwama. 11Buthwena, mwana wama, wuyukaku bweya. Yihánga mana moosu wulombi, mukuma mbanza yama yosu yizayi ni ngeyi wenina mukhetu wa luzitu. 12Buthwena, kyedika ni meni ndenina muhuludi; kaasi mwenina muhuludi wankaka wenina bela-bela yi kuhita meni. 13Nanga muna phipha yayi. Muna suka, yuka ni kakulubula, mboti, muyambula kalubula. Kaasi yuka ni kalubulaku, bwosu Tata wetu kenina moya, meni yikakulubula. Lala tii yi suka.»
14Wálala ha malu mandi tii yi suka, amana wátelama ku thwala mutu kalenda zaya; mukuma Bowasi wázimbula: «Ka mutu ku kazaya ni mukhetu wísa ku buala bwa bule.» 15Wuzimbudi: «Nata muledi wuna wuvwatikini; sungika wawu.» Yandi wásungika wawu. Wátesa bitesu sambanu bya odizi, wámuheka byawu, amana wákota ku mbanza.
16Buna Luti wísa kwena nzitu wandi, Nawomi wuhyudi: «Bwevi bwábwidi, mwana wama?» Yandi wámuzimbwala mana moosu yakala kámuhangila. 17Yandi wuzimbudi: «Wámpheka bitesu sambanu byabi bya odizi, mu kuzimbula: “Wuvutukaku kwena nzitu waku moku ma khatu.”»
18Nawomi wuzimbudi: «Yukana, mwana wama, tii yi kuna wuzayi bwana mambu mámanana, mukuma yakala kakavundaku tii yi kuna katabula dyambu dina mu kilumbu kyaki.»
