ማዘንን እምቢ ያለ ቤተ ሰብ

አንድ ሰው ከአባቱ ሚስት ጋር ይተኛል፤ ቤተ ክርስቲያኒቱም በመቻቻልዋ ትታበያለች። ጳውሎስ ማዘን ይገባቸው እንደ ነበር ይናገራል፤ መንፈሱም እንዲድን ያንን ሰው ለሰይጣን አሳልፈው እንዲሰጡት ያዛል። አሮጌው እርሾ መወገድ አለበት፤ በውስጥ ያሉትን መፍረድ የእነርሱ ድርሻ ነው፤ በውጭ ባሉት ላይ አብ ይፈርዳል።

ምዕራፍ 5።

በመካከላችሁ ዝሙት እንዳለ በርግጥ ተወርቷል፤ ይህም አባትን በማያውቁ ሰዎች ዘንድ እንኳ የማይገኝ ዐይነት ነው፤ አንድ ሰው የአባቱን ሚስት አግብቷል። ነገር ግን እናንተ ትዕቢተኞች ናችሁ! ከዚህ ይልቅ ይህን ያደረገው ሰው ከመካከላችሁ እንዲወገድ ልታዝኑ አይገባችሁም ነበረን? ምንም እንኳ በሥጋ ብርቅም በመንፈስ ከእናንተ ጋራ ስለማለሁ፣ በዚያ እንዳለሁ ሆኜ ይህን ያደረገውን ሰው አስቀድሜ ፈርጄበታለሁ። በጌታችን በኢየሱስ ስም በተሰበሰባችሁ ጊዜ፣ መንፈሴ ከእናንተ ጋራ ሆኖ፣ በጌታችን በኢየሱስ ኀይል፣ መንፈሱ በጌታችን በኢየሱስ ቀን እንዲድን ሥጋው እንዲጠፋ ይህን ሰው ለሰይጣን አሳልፋችሁ ስጡት።

መመካታችሁ መልካም አይደለም። ጥቂት እርሾ ሊጡን ሁሉ እንደሚያቦካ አታውቁምን? አዲስ ሊጥ እንድትሆኑ አሮጌውን እርሾ አስወግዱ፤ በርግጥም እናንተ እርሾ የሌላችሁ ናችሁ። የፋሲካችን በግ ክርስቶስ ታርዷልና። ስለዚህ የተንኰልና የክፋት እርሾ በሆነው በአሮጌው እርሾ ሳይሆን፣ በቅንነትና በእውነት ቂጣ በዓሉን እናክብር።

ከሴሰኞች ጋራ እንዳትተባበሩ በመልእክቴ ጽፌላችሁ ነበር። ይህን የምለው የዚህን ዓለም ሴሰኞች ወይም ስግብግቦችና ቀማኞች ወይም ጣዖት አምላኪዎች ፈጽሞ ለማለት አይደለም፤ እንዲያ ቢሆንማ ከዚህ ዓለም ልትወጡ በግድ ባስፈለጋችሁ ነበር። አሁን ግን የምጽፍላችሁ፣ ወንድም ወይም እኅት ነኝ የሚል ሆኖ ሳለ ሴሰኛ ወይም ስግብግብ ወይም ጣዖት አምላኪ ወይም ተሳዳቢ ወይም ሰካራም ወይም ቀማኛ ከሆነ ማንም ሰው ጋራ እንዳትተባበሩ ነው። እንደዚህ ካለ ሰው ጋራ ምግብ እንኳ አትብሉ። በውጭ ባሉት ላይ ልፈርድ ለእኔ ምን አግብቶኝ? በውስጥ ባሉት ላይ የምትፈርዱ እናንተ አይደላችሁምን? በውጭ ባሉት ላይ አባታችን ይፈርዳል። “ክፉውን ሰው ከመካከላችሁ አስወግዱ።”