Chapngachā Khavai Mamayāma Shimkhur
Mi kharakhatna awui avāwui nuli pamkhui kala kachamchaona awui ngachaikhaya eina ngaranghai. Paulna hangkhui, nangthumna phakhui ngasāsa, ali Setanli sunbaphaklu awui manglā kachuikhavai. Kakhui yeast ngāphāklu; kachamchao ngasali ngaraikhavai nangthumwui rāichan, ngasali lei mili ithumwui Avāna ngaraira.
5 1Nathumwui ngachaili maningakha khamathang-khamarang lei da pao kashā samphanga. Chikathā khamathang-khamarang chiya Avāli makatheiabingwui ngachaili eina tangda matheipaimara: mi akhana awui avāwui preiva̱li ngavai. 2Kha nathum hiklaka! Hi kasā mi chi nathumwui ngachai eina horhaikasā khavai, nathumna chapngachā mamashungmala? 3Khikhalajila iwui phasāli mangasopamsālala manglāli ngasopamda, ina samkaphanglila thada hi kasā mi chili arui bichar sāhaira. 4Nathumna ithumwui Proho Jishuwui ming eina rākazip tharan, imanglā ngasopamda, ithumwui Proho Jishuwui pangshap eina, 5aphasāli sāshimān khavai hi mipa chi Satanwui pāngli horsanglu; chithākha awui manglā chi ithumwui Proho Jishuwui zimiksholi kahui samphangra.
6Nathumwui langkaso chi mamashungmana. Khawok kateokhana khamui khongsaikhali kapchung ngasaka da nathum matheimalā? 7Khawok kachā chi horhaolu, chithākha nathum khamui kadhar onra, kaja nathum khawok makazangana. Khikhalajila ithumwui Makānkhami yaonao Khrista taithat kahaira. 8Chiwui vang eina khawok kachā, makaphā kala makhayāwui khawok eina maningla, kha ningkathar kala khamashungwui khawok makazang khamui eina ithumna phanit chi mayonsa.
9Shāmkasābingli mangasoalu da ina iwui chithi eina nathumli kapihaira. 10Chi okathui hiwui shāmkasābing, lah kākharāmbing kala khaleekasa̱bing, lah meoma̱li khokharumbing pongli maningmana. Chithā jisi kaja nathum okathuiwui eina shokphalungra. 11Kha aruila ina nathumli kagapina: chinaongarā da khahongaipaisālala shāmkasā, lah kākharāma, lah meoma̱li khokharuma, lah mashātkazar, lah khamaripa, lah khaleekasa̱ khalei mi chili mangasoalu; chikathā mi eina tangda phazā masaalu. 12Khisāda ina church ayarli khalei mibingli bichar sākhala? Alungli khalei mibingli nathumna bichar masāmarala? 13Ayarli khalei mibingli ithumwui Avāna bichar sāra. "Makaphā mi chi nathumwui ngachai eina kashamshoklu."
