Krayi Kemutsü Usazüjüra
Thepu mipüe püpo cemi zü neyo, mu kehuo pü toleno la müswü keta. Paul-e po, uko kemezhe mori mezhe, mu pü rüpü ngoyi keto la Satan ce melü süte. Khre küvüo khavate; kehulü kebako sheco thi süo uko mhatho zo, vele cejülü kebako ha Poe sheco thito.
5 1Keregü kerezhü neko mhüjülü bazo zita pota—hio kekremi sü Poo semo thümako mhüjülü ri phu kemopü zo: thepu mipü pü püpo cemi neyo. 2Süri neko kemeha tazo! Hio thi kesüo neko mhüjülü celü khiva keto la, neko krayi mesü zomo me? 3Kekrelamori I apho neko zü bamo, vele rüpülü neko züba, I presa bide hio thi kesüo mejo kesü tazo. 4Neko Niepoo Jisu zalü kengu keyice, a rüpü presa bide, Niepoo Jisu keku zü, 5hio thepu upho khava keto la Satan ce melü süte, sülize Niepoo Jisu zholü pü rüpü ngoyi keto la.
6Neko kemeha veo kemo zo. Khre kedopü la pükro metü kra tayo, siti neko semo zome? 7Khre küvüo khavate, sülize neko pükro kesa thiyi keto la—neko khre kemoko bazo bide. Kekrelamori ha cukevo teko Khrista reshü thi kesü tazo. 8Süla khre küvüo zü lamo, mali mu mha kesu khre zü lamo, vele müsamüzi mu kethoo khre kemo mha zü, uko nye unü tolekhe.
9I a lesilü neko po thopü kola, keregükerezhü miko zü sepü bayi zisü. 10Hio cejü keregü kerezhü miko, mori mhakemehoko mu mizhü süti ketako, mori marhe kereshüko po lamo—sülize neko cejü lüno ta prayi keto la. 11Vele I neko po thozo, thüma kehopüri usazüjüra zo kepo, vele keregü kerezhü, mori mhakemeho, mori marhe kereshü, mori mishemeli kethi, mori mezü keta, mori mizhü süti keta kesüo, pü zü sepü bayi zisü. Sümi thüma zü mha sheri ne keti hino sü. 12Kehu chozuco miko I dipü na mejoyi? Kehulü miko neko mejo mesümo me? 13Chozuco miko ha Poe mejoyo. “Neko mhüjülü celü kürüzü thüma khavate.”
