Nagapatawad kag Nagaayo ang Anak sang tawo

Ang pagpatawad sang mga sala sang isa ka paralisado nagpasakit sa mga escriba, ang pagkaon sa lamesa ni Mateo nagpasakit sa mga Fariseo. Ang isa ka nagakamatay nga bata nga babayi kag ang isa ka babayi nga nagadugo parehong ginpaayo sa isa lamang ka lakat. Sang makita niya ang kadam-an nga wala sing manugbantay, ginsugo niya ang mga disipulo nga mangayo sa Amay sing mga manugpangani.

Kapitulo 9.

Nagsakay si Jesus sa isa ka sakayan, nagtabok, kag nag-abut sa iya kaugalingon nga banwa.

May nagdala sa iya sing isa ka paralitiko nga nagahigda sa higdaan. Sang nakita ni Jesus ang ila pagtuo, nagsiling sia sa paralitiko, “Magpakalig-on ka, anak; ginpatawad na ang imo mga sala.”

Tungud sini, nagsiling sa ila kaugalingon ang iban sang mga manunudlo sang kasuguan, “Nagapasipala ini nga tawo.”

Sang nahibaluan ni Jesus ang ila mga hunahuna, nagsiling sia, “Ngaa nagatipig kamo sing malain sa inyo mga tagipusuon? Diin bala ang mas mahapos: ang pagsiling, ‘Ginpatawad na ang imo mga sala,’ ukon ang pagsiling, ‘Bangon kag maglakat’? Apang agud mahibaluan ninyo nga may gahum ang Anak sang tawo sa duta sa pagpatawad sang mga sala”—dayon nagsiling sia sa paralitiko, “Bangon, kuhaa ang imo higdaan, kag pauli sa imo balay.”

Kag nagbangon ang tawo kag nagpauli sa iya balay. Sang nakita ini sang mga kadam-an, nagkatingala sila kag gindayaw nila ang aton Amay, nga naghatag sing amo sini nga gahum sa mga tawo.

Gintawag ni Jesus si Mateo

Sang naglakat si Jesus gikan didto, nakita niya ang isa ka tawo nga ginatawag si Mateo nga nagapungko sa pungkoan sang manugsukot sang buhis. Nagsiling sia sa iya, “Sunod ka sa akon.” Nagtindog si Mateo kag nagsunod sa iya.

Samtang nagakaon si Jesus sa balay ni Mateo, madamu nga manugsukot sang buhis kag mga makasasala ang nag-upod sa iya kag sa iya mga gintuun sa lamesa. Sang nakita ini sang mga Fariseo, nagpamangkot sila sa iya mga gintuun, “Ngaa nagakaon ang inyo manunudlo upod sa mga manugsukot sang buhis kag sa mga makasasala?”

Sang nabatian ini ni Jesus, nagsiling sia, “Indi ang mga maayo sing lawas ang nagakinahanglan sing manugbulong, kondi ang mga masakit. Apang lakat kamo kag tun-i ninyo kon ano ang kahulugan sini: ‘Kalooy ang luyag ko, kag indi halad.’ Kay wala ako mag-abut sa pagtawag sang mga matarung, kondi sang mga makasasala.”

Ang Bag-ong Alak Nagakinahanglan sang Bag-ong Panit nga Suludlan

Niyan nagkadto sa iya ang mga gintuun ni Juan kag nagpamangkot, “Ngaa sing masunson nagapuasa kami kag ang mga Fariseo, apang ang imo mga gintuun indi?”

Nagsabat si Jesus, “Makapangasubo bala ang mga abyan sang pamanhonon samtang kaupod pa nila sia? Apang magaabut ang mga adlaw nga kuhaon sa ila ang pamanhonon—kag dayon magapuasa sila. Wala sing tawo nga nagatapak sing bag-ong panapton nga wala pa makalubong sa daan nga bayo; kay magaguyod ang tapak sa bayo, kag mangin labi pa ka malain ang gisi. Indi man magbutang ang mga tawo sing bag-ong alak sa daan nga mga panit nga suludlan; kay kon himuon nila, mabuthi ang mga panit, mauyang ang alak, kag magaraa ang mga suludlan. Kondi ginabutang ang bag-ong alak sa bag-ong mga panit nga suludlan, agud nga mabantayan ang duha.”

Ang Pangabay sang Isa ka amay kag ang Paghikap sang Isa ka Babayi

Samtang nagahambal pa sia, nag-abut ang isa ka pangulo sang sinagoga, nagluhod sa iya atubangan, kag nagsiling, “Karon lang napatay ang akon anak nga babayi. Apang kari ka, ibutang ang imo kamut sa iya, kag mabuhi sia.”

Nagtindog si Jesus kag nagkadto upod sa iya, kag amo man ang iya mga gintuun. Sa amo man nga tion nagpalapit sa likod niya ang isa ka babayi nga napulo kag duha ka tuig na nga ginaagasan sing dugo, kag ginhikap niya ang sidsid sang iya panapton. Nagsiling sia sing pirme sa iya kaugalingon, “Kon makahikap lang ako sang iya panapton, mamaayo ako.”

Nagbalikid si Jesus kag nakita niya ang babayi. “Magpakalig-on ka, anak,” siling niya, “ang imo pagtuo nagpaayo sa imo.” Naayo ang babayi sa amo gid nga tion.

Sang nakasulud si Jesus sa balay sang pangulo sang sinagoga kag nakita niya ang mga manugtokar sang plauta kag ang nagagahud nga kadam-an,

nagsiling sia, “Halin kamo. Wala mapatay ang bata nga babayi kondi nagakatulog.” Apang ginkadlawan nila sia.

Sang napagua na ang kadam-an, nagsulud sia, ginkaptan niya ang kamut sang bata, kag nagbangon ang bata nga babayi. Naglapta ang balita sini sa bug-os nga kadutaan nga yadto.

Nakakita ang Bulag, Naghambal ang Apa

Sang naghalin si Jesus didto, may duha ka bulag nga nagsunod sa iya, nga nagasinggit, “Kaluoyi kami, Anak ni David!”

Sang nakasulud sia sa balay, nagpalapit sa iya ang mga bulag. Nagpamangkot sia sa ila, “Nagapati bala kamo nga masarangan ko ini himuon?” Nagsabat sila, “Huo, Ginoo.”

Dayon ginhikap niya ang ila mga mata kag nagsiling, “Matuman sa inyo suno sa inyo pagtuo”. Nabuksan ang ila mga mata. Ginpaandaman sila ni Jesus sing mabaskog, “Bantayi ninyo nga wala sing may makahibalo sini.”

Apang naggua sila kag ginpalapta nila ang balita parte sa iya sa bug-os nga kadutaan nga yadto.

Samtang nagagua sila, gindala kay Jesus ang isa ka apa nga tawo nga ginagamhan sang demonyo. Sang napagua na ang demonyo, naghambal ang apa. Natingala ang mga kadam-an kag nagsiling, “Wala gid sing amo sini nga natabo sa Israel.”

Apang nagsiling ang mga Fariseo, “Ginapagua niya ang mga demonyo paagi sa pangulo sang mga demonyo.”

Nagapanawag ang Amay sing mga Mamumugon sa Patubas

Ginlibot ni Jesus ang tanan nga mga banwa kag mga minuro, nga nagatudlo sa ila mga sinagoga, nagabantala sang maayong balita sang ginharian sang aton Amay, kag nagaayo sang tanan nga sahi sang balatian kag masakit. Sang nakita niya ang mga kadam-an, nagkaawa sia sa ila, kay nagkagamo sila kag wala sing bulig, kaangay sang mga karnero nga wala sing manugbantay.

Niyan nagsiling sia sa iya mga gintuun, “Madamu ang patubas apang diutay ang mga mamumugon. Busa pangabay kamo sa Amay sang patubas nga magpadala sia sing mga mamumugon sa iya talamnan nga aanihon.” ^a