Daw Ano Kahalangdon ang Imo Ngalan
Sa direktor sang ambahanon: suno sa Gittit. Isa ka salmo ni David.
Sa pagtan-aw sa langit sa gab-i, ginapamangkot sang salmista kon ngaa ang Manunuga sang bulan kag mga bituon magtalupangod pa gid sa sining magagmay nga mga tinuga. Ang sabat indi nga dalagko ang mga tawo, kundi nga ginkoronahan sila sang aton Amay sang kadungganan kag gintugyan sa ila ang iya mga binuhatan.
8 1O Amay namon nga Gamhanan, daw ano kahalangdon sang imo ngalan sa bug-os nga duta! Ginbutang mo ang imo himaya sa ibabaw sang mga langit. 2Gikan sa mga baba sang mga lapsag kag sang mga nagasuso nga mga bata ginpalig-on mo ang kusog, tungud sa imo mga kaaway, agud pahipuson ang kaaway kag ang manugbalos. 3Kon tulukon ko ang imo mga langit, ang buhat sang imo mga tudlo, ang bulan kag ang mga bituon nga ginbutang mo sa ila nahamtangan, 4ano bala ang tawo nga ginadumdom mo sila, ang anak sang tawo nga ginatatap mo sia? a a v4 Gin-aplikar sang manunulat sang Hebreo ini nga mga pulong kay Jesus — ang Anak sang tawo nga ginhimo nga manubo sa mga anghel sa malip-ot nga tion, dayon ginkoronahan sang himaya kag dungog (Hebreo 2:6-9). 5Apang ginhimo mo sia nga diotay lang nga manubo sa mga langitnon nga mga tinuga kag ginkoronahan mo sia sang himaya kag dungog. 6Ginhatagan mo sia sang paggahum sa mga binuhatan sang imo mga kamot; ginbutang mo ang tanan nga butang sa idalum sang iya mga tiil: 7ang tanan nga mga karnero kag mga baka, kag subong man ang talunon nga mga sapat, 8ang mga pispis sa kahanginan, kag ang mga isda sa dagat, ang bisan ano nga nagaagi sa mga banas sang kadagatan. 9O Amay namon nga Gamhanan, daw ano kahalangdon sang imo ngalan sa bug-os nga duta!
