Canê Ku Tî Ye
Ji serokê mûzîkê re. Mezmûreke şehrezayiyê ya kurên Qorah.
Ji perestgehê veqetiyayî û bi 'Xwedayê te li ku ye?' tinaz lê hatî kirin, stranbêj tîne bîra xwe ku çawa girseya cejnê dibir, ya ku êdî nikare beşdarî wê bibe. Du caran ew ji canê xwe yê xemgîn dipirse, û bi heman awayî bersivê dide: hêviya xwe bi Bavê me bîne, ezê dîsa pesnê wî bidim.
42 1Çawa ku xezal li çemên avê dikelije, wisa jî canê min li te dikelije, ya Bavê min.
2Canê min ji Bavê min re tî ye, ji Bavê jîndar re. Ez kengê dikarim werim û li ber wî xuya bibim? 3Hêsirên min bûne xwarina min bi şev û bi roj, gava ku tevahiya rojê ji min re dibêjin: “Xwedayê te li ku ye?”
4Gava ku ez canê xwe dirijînim, ez van tiştan bi bîr tînim: çawa ku ez bi girseyê re diçûm û min ew bi alayî dibirin mala Bavê me, bi qîrînên şahiyê û bi stranên pesnê, girseyeke mezin ku şahî dikir.
5Ey canê min, tu çima xemgîn î, û çima tu di hundirê min de tevlihev î? Hêviya xwe bi Bavê me bîne; çimkî ezê dîsa pesnê wî bidim, rizgariya min û Bavê min.
6Ya Bavê min, canê min di hundirê min de xemgîn e; loma ez te bi bîr tînim ji welatê Ûrdunê û yê Hermonê, ji Çiyayê Mîsarê.
7Kûrahî bi gurmîna şelaleyên te gazî kûrahiyê dike; hemû pêl û lepên te di ser min re derbas bûn. 8Bi roj Bavê me dilovaniya peymana xwe ferman dike, û bi şev strana wî bi min re ye, duayek ji Bavê jiyana min re.
9Ez ji Bavê xwe, ji zinarê xwe re dibêjim: “Te çima ez ji bîr kirim? Ez çima ji ber zordariya dijmin bi şîn digerim?” 10Mîna birîneke kujer di hestiyên min de, neyarên min tinazên xwe bi min dikin, gava ku tevahiya rojê ji min re dibêjin: “Xwedayê te li ku ye?”
11Ey canê min, tu çima xemgîn î, û çima tu di hundirê min de tevlihev î? Hêviya xwe bi Bavê me bîne; çimkî ezê dîsa pesnê wî bidim, rizgariya min û Bavê min.
