Moya Wuna Wisi Fwa Mphwila
Kwena mutwadisi wa mikunga. Mukunga wa mudimu wa bana ba Kola.
Wusiswa kuna nzu ya Nzambi amana wuyangiswa ni «Kweti kenina Nzambi waku?», musoniki wisi bambuka bwosu kakala twadisa mulumba-lumba wa batu ku nzu ya Nzambi, bawu kalendaku hika kota ha kimosi yi bawu. Mbala zodi wisi hyula moya wandi wulembami, amana wisi wuvutula mu phila yimosi: sya kivuvu mwena Tata wetu, yikazatula yandi hika.
42 1Hanga nsyesi yisi fwa mphwila ya misinga mya mamba, bwabuna phi moya wama wisi fwa mphwila yaku, Tata wama.
2Moya wama wisi fwa mphwila ya Tata, ya Tata wa moya. Thangwa khi yilenda kwisa yi monika ku mesu mandi? 3Matsanga mama mákala madya mama mu mwini yi mu phipha, bwosu bakala kuzimbwala kwena meni mu kilumbu kyosu: «Kweti kenina Nzambi waku?»
4Mamana mambu yisi bambuka, mu kumwanga moya wama: bwosu yakála kwenda hakimosi yi mulumba-lumba wa batu, yi kutwadisa bawu ku nzu ya Tata wetu, ni ndinga za kyesi yi mikunga mya kuzatula, mulumba-lumba wa batu balawu wukala sangwala.
5Kikuma kya biki wubati lembama, moya wama, yi kikuma kya biki wenina mu mvwalangani mwena meni? Sya kivuvu mwena Tata wetu; mukuma yikazatula yandi hika, luhulusu lwama yi Tata wama.
6Tata wama, moya wama wubati lembama mwena meni; bwabuna yisi kubambuka ngeyi, tukidila ku tsi ya Yolutani yi ya Helemoni, tukidila ku mongu wa Mizali.
7Ndindi yisi tela ndindi ku malokosi ma mamba maku; makaka maku moosu yi mafu maku máhyoka ha thandu yama. 8Mu mwini, Tata wetu wisi hana khenda zandi za bulunda, amana mu phipha, mukunga wandi wenina yi meni, lombilu kwena Tata wa luzingu lwama.
9Yisi zimbwala kwena Tata wama, tadi dyama: «Kikuma kya biki wubati kuzimbakana meni? Kikuma kya biki yisi kangala mu khondu, kikuma kya kunwanisa kwa mbeni?» 10Hanga mputa yina yisi honda mu mifufwa myama, bambeni bama bisi kusinga meni, bwosu bakala kuzimbwala kwena meni mu kilumbu kyosu: «Kweti kenina Nzambi waku?»
11Kikuma kya biki wubati lembama, moya wama, yi kikuma kya biki wenina mu mvwalangani mwena meni? Sya kivuvu mwena Tata wetu; mukuma yikazatula yandi hika, luhulusu lwama yi Tata wama.
