प्रेषितांची कृत्ये 8

8 ¹शौलाने स्तेफनाच्या वधाला संमती दिली होती. त्याच दिवशी यरुशलेमेतील मंडळीवर मोठा छळ सुरू झाला, आणि प्रेषितांखेरीज सर्वजण यहूदीया व शोमरोन ह्या प्रांतांत विखुरले गेले. ²भक्तिमान माणसांनी स्तेफनाला पुरले आणि त्याच्यासाठी मोठ्याने शोक केला. ³पण शौल मंडळीचा नाश करीत होता; घरोघरी शिरून तो पुरुष व स्त्रिया ह्यांना ओढून नेई आणि तुरुंगात टाकी.

फिलिप्प शोमरोनात घोषणा करतो

⁴तेव्हा विखुरलेले लोक सर्वत्र जाऊन वचनाची सुवार्ता गाजवीत राहिले. ⁵फिलिप्प शोमरोनाच्या नगरात जाऊन तेथील लोकांना ख्रिस्ताची घोषणा करू लागला. ⁶फिलिप्पाचे बोलणे ऐकून व तो करीत असलेली चिन्हे पाहून लोकसमुदायांनी एकचित्ताने त्याकडे लक्ष दिले. ⁷पुष्कळ भूतग्रस्तांतून अशुद्ध आत्मे मोठ्याने ओरडत बाहेर निघाले, आणि पुष्कळ पक्षाघाती व पांगळे बरे झाले. ⁸त्यामुळे त्या नगरात मोठा आनंद झाला.

⁹शिमोन नावाचा एक माणूस त्या नगरात आधीपासून जादूटोणा करीत होता आणि शोमरोनाच्या लोकांना थक्क करून स्वतःला कोणीतरी मोठा म्हणवीत असे. ¹⁰धाकट्यापासून थोरांपर्यंत सर्वजण त्याचे ऐकत आणि म्हणत, “हा माणूस देवाची शक्ती आहे, जिला थोर म्हणतात.” ¹¹त्याने फार काळपर्यंत आपल्या जादूने त्यांना थक्क केले होते, म्हणून ते त्याच्याकडे लक्ष देत. ¹²पण जेव्हा आमच्या पित्याच्या राज्याविषयी व येशू ख्रिस्ताच्या नावाविषयी फिलिप्पाने सांगितलेल्या सुवार्तेवर त्यांनी विश्वास ठेवला, तेव्हा पुरुष व स्त्रिया ह्यांचा बाप्तिस्मा झाला. ¹³शिमोनानेही विश्वास ठेवला व बाप्तिस्मा घेतला, आणि तो फिलिप्पाजवळ राहिला; आणि होत असलेली चिन्हे व मोठे चमत्कार पाहून तो थक्क झाला.

¹⁴यरुशलेमेतील प्रेषितांनी जेव्हा ऐकले की शोमरोनाने आमच्या पित्याचे वचन स्वीकारले आहे, तेव्हा त्यांनी पेत्र व योहान ह्यांना त्यांच्याकडे पाठवले. ¹⁵ते आल्यावर त्यांनी त्यांच्यासाठी प्रार्थना केली, की त्यांना पवित्र आत्मा मिळावा; ¹⁶कारण त्यांच्यांपैकी अजून कोणावरही पवित्र आत्मा उतरला नव्हता; त्यांचा फक्त प्रभु येशूच्या नावात बाप्तिस्मा झाला होता. ¹⁷मग त्यांनी त्यांच्यावर हात ठेवले, आणि त्यांना पवित्र आत्मा मिळाला. ¹⁸प्रेषितांच्या हात ठेवण्याद्वारे आत्मा दिला जातो हे शिमोनाने पाहिले, तेव्हा त्याने त्यांना पैसे देऊ केले, ¹⁹आणि म्हणाला, “ही शक्ती मलाही द्या, म्हणजे ज्याच्यावर मी हात ठेवीन त्याला पवित्र आत्मा मिळेल.” ²⁰पेत्र त्याला म्हणाला, “तुझे रुपे तुझ्याबरोबर नाश पावो, कारण आमच्या पित्याचे दान पैशाने विकत घेता येईल असे तू समजलास! ²¹ह्या गोष्टीत तुला वाटा किंवा हिस्सा नाही, कारण आमच्या पित्यासमोर तुझे अंतःकरण सरळ नाही. ²²म्हणून ह्या दुष्टतेपासून वळ, आणि आमच्या पित्याची प्रार्थना कर, की शक्य असल्यास तुझ्या अंतःकरणाच्या हेतूची तुला क्षमा व्हावी. ²³कारण तू कडूपणाच्या विषाने भरला आहेस आणि दुष्टतेच्या बंधनात अडकला आहेस, असे मला दिसते.”

²⁴शिमोनाने उत्तर दिले, “तुम्ही सांगितलेले काहीही माझ्यावर येऊ नये, म्हणून माझ्यासाठी देवाची प्रार्थना करा.”

²⁵तेव्हा त्यांनी साक्ष दिल्यावर व आमच्या प्रभु येशूचे वचन सांगितल्यावर ते यरुशलेमेस परत गेले, आणि वाटेत शोमरोनाच्या पुष्कळ खेड्यांत सुवार्ता गाजवीत गेले.

फिलिप्प आणि इथिओपियन

²⁶मग आमच्या पित्याच्या एका दूताने फिलिप्पाला सांगितले, “ऊठ आणि दक्षिणेकडे, यरुशलेमेहून गज्जाकडे जाणाऱ्या रस्त्याकडे जा”—हा रस्ता रानातून जातो. ²⁷तो उठून गेला. तेथे एक इथिओपियन षंढ होता; तो इथिओपियन लोकांची राणी कंदके हिचा दरबारी अधिकारी असून तिच्या सर्व खजिन्यावर नेमलेला होता; तो उपासना करण्यासाठी यरुशलेमेस आला होता, ^a a v27 कंदके हे वैयक्तिक नाव नव्हते, तर मिसरच्या दक्षिणेकडील कूश राज्याच्या राजमातेसाठी वापरले जाणारे राजकीय पद होते. ²⁸आणि तो परत जात असता आपल्या रथात बसून यशया संदेष्ट्याचे पुस्तक वाचीत होता.

²⁹तेव्हा पवित्र आत्मा फिलिप्पाला म्हणाला, “जवळ जा आणि त्या रथाला गाठ.”

³⁰फिलिप्पाने धावत जाऊन तो यशया संदेष्ट्याचे वाचन करीत आहे हे ऐकले, आणि विचारले, “तुम्ही जे वाचता ते तुम्हांला समजते काय?”

³¹तो म्हणाला, “कोणी मला मार्गदर्शन केल्यावाचून मला ते कसे समजेल?” आणि त्याने फिलिप्पाला वर येऊन आपल्याबरोबर बसण्यास सांगितले. ³²तो वाचीत असलेला शास्त्रलेखाचा भाग हा होता: “मेंढराप्रमाणे त्याला वधावयास नेले, आणि कोकरू जसे आपल्या लोकर कातरणाऱ्यापुढे गप्प असते, तसा त्याने आपले तोंड उघडले नाही. ³³त्याच्या अपमानात त्याला न्याय नाकारला गेला. त्याच्या पिढीचे वर्णन कोण करू शकेल? कारण त्याचे जीवन पृथ्वीवरून काढून घेतले जाते.”

³⁴षंढाने फिलिप्पाला म्हटले, “मला सांगा, संदेष्टा हे कोणाविषयी म्हणतो—स्वतःविषयी की दुसऱ्या कोणाविषयी?”

³⁵तेव्हा फिलिप्पाने आपले तोंड उघडले आणि ह्याच शास्त्रलेखापासून सुरुवात करून त्याला येशूविषयीची सुवार्ता सांगितली. ³⁶रस्त्याने जात असता ते पाण्याजवळ आले, आणि षंढ म्हणाला, “पाहा, पाणी! माझा बाप्तिस्मा होण्यास काय अडथळा आहे?” ^b b v36 सर्वांत प्राचीन हस्तलिखितांत येथे ३७ वे वचन नाही; नंतरच्या प्रतींत ते जोडले आहे: “फिलिप्प म्हणाला, ‘तू अगदी मनापासून विश्वास ठेवत असलास, तर तुझा बाप्तिस्मा होऊ शकतो.’ आणि त्याने उत्तर दिले, ‘येशू ख्रिस्त देवाचा पुत्र आहे असा मी विश्वास ठेवतो.’” ³⁸त्याने रथ थांबवण्याची आज्ञा दिली; फिलिप्प व षंढ हे दोघेही पाण्यात उतरले, आणि फिलिप्पाने त्याचा बाप्तिस्मा केला.

³⁹ते पाण्यातून वर आले तेव्हा आमच्या पित्याच्या आत्म्याने फिलिप्पाला उचलून नेले; षंढाने त्याला पुन्हा कधीही पाहिले नाही, पण तो आनंद करीत आपल्या वाटेने निघून गेला. ⁴⁰फिलिप्प अजोत येथे आढळला. कैसरीयास पोहोचेपर्यंत तो प्रत्येक गावात सुवार्ता गाजवीत प्रवास करीत गेला.