निर्गम 11

11 ¹आमचा पिता मोशेला म्हणाला, “मी फारोवर व मिसरावर आणखी एक पीडा आणीन. त्यानंतर तो तुम्हांला येथून पाठवून देईल; आणि जेव्हा तो पाठवेल, तेव्हा तो तुम्हांला पूर्णपणे येथून घालवून देईल. ²लोकांना सांग: प्रत्येक पुरुषाने आपल्या शेजाऱ्याजवळ आणि प्रत्येक स्त्रीने आपल्या शेजारणीजवळ चांदी व सोन्याच्या वस्तू मागाव्यात.”

³आणि आमच्या पित्याने लोकांवर मिसरी लोकांची कृपादृष्टी होईल असे केले. शिवाय, मोशे स्वतः मिसर देशात फारोच्या सेवकांच्या व लोकांच्या दृष्टीने फार थोर होता.

⁴मोशे म्हणाला, “आमचा पिता असे म्हणतो: मध्यरात्रीच्या सुमारास मी मिसरातून फिरेन,

⁵आणि मिसर देशातील प्रत्येक प्रथमजन्मलेला मरेल — सिंहासनावर बसणाऱ्या फारोच्या प्रथमजन्मलेल्यापासून तो जात्यामागे बसणाऱ्या दासीच्या प्रथमजन्मलेल्यापर्यंत, आणि जनावरांतील प्रत्येक प्रथमजन्मलेलेही मरेल. ⁶सर्व मिसर देशात मोठा आकांत होईल; असा आकांत यापूर्वी कधी झाला नाही व पुन्हा कधी होणारही नाही. ⁷परंतु इस्राएलाच्या लोकांपैकी कोणावरही, मनुष्यावर किंवा जनावरावर, एखादा कुत्राही गुरगुरणार नाही; यावरून तुम्हांला कळेल की आमचा पिता मिसर व इस्राएल यांच्यात भेद ठेवतो. ⁸तुझे हे सर्व सेवक माझ्याकडे उतरून येतील, माझ्यापुढे नमन करून म्हणतील, ‘तू व तुझ्यामागून येणारे सर्व लोक निघून जा.’ त्यानंतर मी निघून जाईन.” मग मोशे संतापाने पेटून फारोपासून निघून गेला.

⁹आमचा पिता मोशेला म्हणाला, “फारो तुमचे ऐकणार नाही, यासाठी की मिसर देशात माझी अद्भुते वाढावीत.”

¹⁰मोशे व अहरोन यांनी फारोपुढे ही सर्व अद्भुते केली; परंतु आमच्या पित्याने फारोचे मन कठीण केले, आणि त्याने इस्राएल लोकांना आपल्या देशातून जाऊ दिले नाही.