रोमकरांस 3

3 ¹मग यहूद्याला कोणता अधिक लाभ आहे? किंवा सुंतेचे मोल काय? ²प्रत्येक बाबतीत पुष्कळ. सर्वात प्रथम, आमच्या पित्याची वचनेच त्यांच्यावर सोपवण्यात आली. ³मग काय? जर काहीजण अविश्वासू ठरले, तर त्यांच्या अविश्वासूपणामुळे आमच्या पित्याचा विश्वासूपणा रद्द होईल काय? ⁴नाही! प्रत्येक माणूस लबाड असला, तरी आमचा पिता सत्य ठरो. असे लिहिले आहे: “तू आपल्या वचनांत नीतिमान ठरतोस, आणि तुझा न्याय होतो तेव्हा तू विजयी होतोस.”

⁵पण जर आमच्या दुष्कृत्यांमुळे आमच्या पित्याची नीतिमत्ता उठून दिसते, तर आपण काय म्हणावे? आमच्यावर क्रोध आणणारा आमचा पिता अन्यायी आहे काय? (मी माणसाच्या रीतीने बोलतो.). ⁶मुळीच नाही! कारण मग आमचा पिता जगाचा न्याय कसा करील? ⁷पण जर माझ्या लबाडीमुळे आमच्या पित्याचे सत्य त्याच्या गौरवासाठी विपुल होते, तर मग माझा अजूनही पापी म्हणून न्याय का केला जातो? ⁸आणि—काहीजण आमची निंदा करत म्हणतात त्याप्रमाणे—“चांगले घडावे म्हणून आपण वाईट करू या” असे का म्हणू नये? अशांना मिळणारा न्यायदंड योग्यच आहे.

कोणीही नीतिमान नाही

⁹मग काय? आपण अधिक चांगले आहोत काय? मुळीच नाही—यहूदी आणि ग्रीक हे सर्वच पापाच्या पकडीखाली आहेत, असा आरोप आपण आधीच केला आहे, ¹⁰असे लिहिले आहे: “कोणीही नीतिमान नाही, एकही नाही; ¹¹कोणी समजत नाही; कोणी आमच्या पित्याचा शोध घेत नाही. ¹²सर्व बहकले आहेत; एकत्रितपणे ते निरुपयोगी झाले आहेत; कोणी बरे करत नाही, एकही नाही. ¹³त्यांचा गळा उघडी कबर आहे; ते आपल्या जिभेने कपट करतात.” “त्यांच्या ओठांखाली सापांचे विष आहे. ¹⁴त्यांचे तोंड शाप आणि कडूपणाने भरले आहे. ¹⁵रक्त पाडण्यास त्यांचे पाय चपळ आहेत; ¹⁶नाश आणि विपत्ती त्यांच्या मार्गांवर आहेत, ¹⁷आणि शांतीचा मार्ग त्यांनी जाणला नाही. ¹⁸त्यांच्या डोळ्यांपुढे आमच्या पित्याचे भय नाही.”

¹⁹आपल्याला ठाऊक आहे की, नियमशास्त्र जे काही सांगते ते नियमशास्त्राच्या अधीन असलेल्यांना लागू आहे, यासाठी की प्रत्येक तोंड बंद व्हावे आणि सगळे जग आमच्या पित्यापुढे उत्तरदायी ठरावे. ²⁰नियमशास्त्राच्या कृत्यांनी त्याच्यापुढे कोणीही नीतिमान ठरत नाही; नियमशास्त्र पापाची जाणीव करून देते.

येशूवरील विश्वासाने नीतिमान ठरणे

²¹पण आता, नियमशास्त्रावाचून, आमच्या पित्याची नीतिमत्ता प्रकट झाली आहे, आणि नियमशास्त्र व संदेष्टे यांनी तिच्याविषयी साक्ष दिली आहे. ²²आमच्या पित्याची ही नीतिमत्ता येशू ख्रिस्तावरील विश्वासाद्वारे, विश्वास ठेवणाऱ्या सर्वांना मिळते, कारण काही भेदभाव नाही, ²³कारण सर्वांनी पाप केले आहे आणि ते आमच्या पित्याच्या गौरवाला उणे पडले आहेत, ²⁴आणि ख्रिस्त येशूमध्ये असलेल्या खंडणीद्वारे त्याच्या कृपेने ते फुकट नीतिमान ठरवले जातात. ²⁵आमच्या पित्याने त्याला त्याच्या रक्तावरील विश्वासाद्वारे प्रायश्चित्ताचे अर्पण म्हणून सादर केले, यासाठी की त्याने आपली नीतिमत्ता दाखवावी; कारण त्याने आपल्या सहनशीलतेने पूर्वी केलेल्या पापांकडे दुर्लक्ष केले होते, ²⁶यासाठी की त्याने आता आपली नीतिमत्ता दाखवावी, म्हणजे तो स्वतः न्यायी असावा आणि येशूवर विश्वास ठेवणाऱ्या प्रत्येकाला नीतिमान ठरवणाराही असावा.

²⁷मग अभिमान कोठे राहिला? तो वगळला गेला. कोणत्या नियमाने? कृत्यांच्या? नाही—विश्वासाच्या नियमाने. ²⁸कारण आपले ठाम मत आहे की, मनुष्य नियमशास्त्राच्या कृत्यांवाचून विश्वासाने नीतिमान ठरतो. ²⁹किंवा आमचा पिता केवळ यहूद्यांचाच पिता आहे काय? परराष्ट्रीयांचाही पिता नाही काय? होय, परराष्ट्रीयांचाही, ³⁰कारण आमचा पिता एकच आहे, तो सुंता झालेल्यांना विश्वासाने आणि सुंता न झालेल्यांना विश्वासाद्वारे नीतिमान ठरवील.

³¹मग या विश्वासाने आपण नियमशास्त्र रद्द करतो काय? मुळीच नाही—उलट आपण नियमशास्त्र दृढ करतो.