Kazingram Serda Sholu

Hiya ithumwui Avāna kazingram serkhākta tāsira da seihā kasāna. Mibingwui vang ngarālak mamimana; athumwui khangarong kasāsā saikora khamakhao chonshi da hānga, kala ali ngavap khavai khipākha malei da phongshoka. Khorumshim meina chuitāserhaira. Ngahān makhalei ngahānkhami eina kakhaihaowa.

Chapter 64.

Iyavo, nana kazingram serda tāra rāsi kaja, chieina nawui mangāli kaphungbing nganukranu, meina maharthing chi chuikatā thāda, kala tara̱ hang ngasak thāda, naming nawui yangkashebingli theingasak khavai, chieina yurbing nawui mangāli nganukranu! Ithumna maphaningsālak kaji khangachee-khangachā ot nana sātharan, nana tāra rāhaira, kala nawui mangāli kaphungbing nganuka. Achālakhawui eina thuida, khipākhana khanā eina mashālak lah maphaningsalak; ali honabingwui vang otsak kasā Vare, na maningla khipā vareli mikna mathei. Khamathān eina khamashung khangarong ot kasābingli, nawui shongfali zata tharan nali phaningungbingli nana samphangkhui. Kha nana malungvāthaowa, kala ithumna morei sāhaira; ithumna sāngnā ithumwui moreili leihaira; ithum huikhui samphangrala? Ithum saikora makathar mi kathā ngasāhaira, kala ithumwui khamashung ot saikora makhaotot kahai kashankachon kathāna. Ithum saikora anah kathā thenghaowa, kala ithumwui morei, masi kathā, ithumli khuithuihaora. Naming khangakao, nali singtit khavai akhalatta mathuk ngasak mi akhala maleimana; kaja nana ithumwui eina namai ngathumhaida ithumli ithumwui morei pāngli sāthatserhaira.

Kha ara, na ithumwui Avā na; ithum leikhonna, kala na ithumwui ham kasemna; ithum saikora nawui pāngwui kasāna. O ithumwui Avā, hakmahā malungvātmihaialu, kala ithumwui morei katang makhavai maphaningungmihaialu. Yanglu, kapona, ithum saikora nawui mibingna. Nawui kathara keinungbing lamhāng ngasāhaira; Zion lamhāng ngasāhaira, Jerusalem ngachakting ngasāhaira. Ithumwui kathara kala khamathā shim, ithumwui shāvā ngarāna nali masot sochikat kahai apam, meina chuitāmihaira, kala ithumna machuk kahai ot saikora kashimān ngasāhaira. O ithumwui Avā, ot saikora hiwui thili nana kasaikha haira? Nana kasaikha pamda ithumli hakmahā machot ngasakra?